උපයා ගත් ආකාරය සනාථ කළ නොහැකි ලෙස අධික වත්කම් ප්‍රමාණයක් රැස්කරගෙන සිටීමේ චෝදනාව යටතේ කුරුණෑගල පොලිසිය මගින් ඉකුත් 25 වැනිදා අලුයම අත්අඩංගුවට ගත් කුරුණෑගල ශික්ෂණ රෝහලේ ජේෂ්ඨ ප්‍රසව හා නාරිවේද වෛද්‍ය මොහොමඩ් ෂාෆි සිහාබ්ඩින් නමැත්තා පිළිබඳව සිදුකළ මූලික පොලිස් පරික්ෂණවලින් අනතුරුව වැඩිදුර පරික්ෂණ කටයුතු සඳහා එදින රාත්‍රියේම සැකකරු අපරාධ පරීක්ෂණ නිලධාරීන් භාරයට ගෙන තිබේ.
අසීමාන්තිකව මුදල් ඉපයීමේ චෝදනාවට අමතරව කාන්තාවන් හාරදහසකට ආසන්න පිරිසකට ඔවුන්ගේ අනුදැනුමක් නොමැතිව වඳ සැත්කම් සිදුකර ඇති බවට සැකකරුට එරෙහිව එල්ල වී ඇති චෝදනාව පිළිබඳව පරික්ෂා කිරීම සඳහා ඔහු මෙසේ අපරාධ පරීක්ෂණ දෙපාර්තමේන්තු භාරයට ගෙන තිබේ. කුරුණෑගල, දඹුල්ල හා ගලේවෙල යන රෝහල්වල ප්‍රසව හා නාරිවේද වෛද්‍යවරයා ලෙස සේවය කරමින් සිටියදී සැකකරු එම රෝහල්වලදී ගැබිනි කාන්තාවන් සඳහා සිදුකළ සිසේරියන් සැත්කම්වලින් පසුව එම කාන්තාවන්ගේ අනුදැනුමකින් තොරව ඔවුන් වඳ භාවයට පත් කොට ඇති බව කියමින් මෙම චෝදනාව එල්ල කොට තිබේ. සැකකාර වෛද්‍යවරයා කුරුණෑගල - නුවර පාරේ ගැට්ටුවාන ප්‍රදේශයේ පදිංචිකරුවෙකි.
ඔහු 2015 මහ මැතිවරණයේදි රිෂාඩ් බදියුදින් අමාත්‍යවරයා නායකත්වය දරන සමස්ත ලංකා මහජන කොංග්‍රස් පක්ෂය නියෝජනය කරමින් එක්සත් ජාතික පක්ෂයෙන් කුරුණෑගල දිස්ත්‍රික්කයට තරග කර පරාජයට පත්වූවෙකි. එම මැතිවරණයෙන් අනතුරුව නැවත වෛද්‍ය සේවයට එක්ව ඇති මොහු වෛද්‍යවරයකුට උපයාගත නොහැකි ආකාරයට සැකකටයුතු ලෙස ඉතා ඉහළ වත්කම් රැසක් උපයාගෙන සිටීම සම්බන්ධයෙන් ලද පැමිණිලි කීපයකට අනුව විමර්ශන සඳහා සැකපිට අත්අඩංගුවට ගත් බව කුරුණෑගල දිසාව භාර නියෝජ්‍ය පොලිස්පති කිත්සිරි වසන්ත ජයලත් මහතා පැවැසීය.
සැක සහිත ලෙස කෝටි 40ක් පමණ වත්කම් උපයා ගැනීම හා වෙනත් අක්‍රමිකතා කිහිපයක් සම්බන්ධව චෝදනා එල්ල වී ඇති කුරුණෑගල ශික්ෂණ රෝහලේ සේවය කරන ෂිහාබ්ඩින් මොහොමඩ් ෂාෆි නමැති වෛද්‍යවරයා සම්බන්ධව පොලිසිය සිදුකළ විමර්ශනවලින් පසුව ඉකුත් 4 වැනිදා රාත්‍රියේ අත්අඩංගුවට ගත්තේ කුරුණෑගල - නුවර පාර ගැට්ටුවාන පදිංචි නිවෙසේදිය. පොලිසිය සිදුකළ පරීක්ෂණ අනුව සැකපිට අත්අඩංගුවට ගත් වෛද්‍යවරයාට අයත් දේපොළ අතර වෛද්‍යවරයා පදිංචි ගැට්ටුවාන වීරසිංහ මාවතේ මහල් දෙකකින් යුත් සුඛෝපභෝගි නිවෙසක්, කුරුණෑගල නගර මධ්‍යයේ පර්චස් 15ක ඉඩමක්, ගැට්ටුවාන නිවෙසට යාබදව පර්වස් 44ක ඉඩමක් හා කුරුණෑගල මැදලන්දවත්තේ සුඛෝපභෝගී නිවෙසක් හා ඉඩමක් තිබෙන බව අනාවරණය කරගෙන තිබේ.
සැකපිට අත්අඩංගුවට ගත් වෛද්‍යවරයා පසුගිය කාලයේ කෝටි 40ක පමණ දේපොළ උපයාගත්තේ කෙසේද යන්න පිළිබඳව පොලිසිය වැඩිදුර පරික්ෂණ පවත්වාගෙන යයි. එකී වෛද්‍යවරයා කුරුණෑගල ශික්ෂණ රෝහලේ මාතෘ හා කාන්තා රෝග අංශයේ කලක් සේවය කර වෙනත් රෝහලකට මාරු වී නැවතත් එම අංශයට පැමිණ වසර තුනහමාරක් ගතවී ඇති බවත් මෙම කාලය තුළදි සිසේරියන් සැත්කම් සිදුකිරීමේදි අක්‍රමිකතා සිදුකර ඇද්ද යන්න විශේෂ පරීක්ෂණයක් සිදුකරගෙන යන බව පොලිසිය කියයි.
සැකකාර වෛද්‍යවරයා රිෂාඩ් බදියුදීන් අමාත්‍යවරයාගේ නායකත්වයෙන් යුත් සමස්ත ලංකා මුස්ලිම් කොංග්‍රසයෙන් පසුගිය මහ මැතිවරණයට එක්සත් ජාතික පක්ෂයයෙන් කුරුණෑගල දිස්ත්‍රික්කයෙන් තරග කළ අපේක්ෂකයකු බවත් රිෂාඩ් බදියුදීන් අමාත්‍යවරයා සමඟ සමීප සම්බන්ධතා පැවැත්වූ අයකු බවත් කළ පරික්ෂණවලදී හෙළි වී ඇත. සැකපිට අත්අඩංගුවට ගත් වෛද්‍යවරයා පෙරේදා (25දා) කොළඹ ත්‍රස්ත විමර්ශන අංශයේ නිලධාරින්ට භාර දුන් බව කුරුණෑගල පොලිසිය කියයි.
වයඹ, උතුරුමැද දිසාව භාර ජේයෂ්ඨ පොලිස්පති ජගත් අබේසිරි ගුණවර්ධන, කුරුණෑගල දිසාව භාර නියෝජ්‍ය පොලිස්පති කිත්සිරි ජයලත් මහතාගේ උපදෙස් මත කුරුණෑගල ජේයෂ්ඨ පොලිස් අධිකාරි මහින්ද දිසානායක, සහකාර පොලිස් අධිකාරි සමන් දිසානායක යන මහත්වරුන්ගේ මූලිකත්වයෙන් කුරුණෑගල මූලස්ථාන ප්‍රධාන පොලිස් පරික්ෂාක කපිල අධිකාරි මහතාගේ මෙහෙයවීමෙන් කුරුණෑගල කොට්ඨාස අපරාධ විමර්ශන අංශයේ පොලිස් පරික්ෂක ගංගානාත් මහතාගේ ප්‍රධානත්වයෙන් කුරුණෑගල පොලිස් අපරාධ විමර්ශන අංශයේ ස්ථානාධිපති පොලිස් පරික්ෂක පුෂ්පලාල්, උප පොලිස් පරික්ෂක සිසිර, පොලිස් සැරයන් ප්‍රසන්න (39539), පොලිස් කොස්තාපල් ධනංජය (95889), පොලිස් කොස්තාපල් ක්‍රිඩා (57171), පොලිස් කොස්තාපල් රියැදුරු ජයසිරි (18712) යන නිලධාරීන් සැකකරු අත්අඩංගුවට ගෙන තිබේ.
මේ අතර කාන්තාවන් හාරදහසකට ආසන්න ප්‍රමාණයකට බලහත්කාරයෙන් ඔවුන්ගේ අනුදැනුමක් නොමැතිව වඳ සැත්කම් සිදුකර ඇති බවට හා තවත් චෝදනා කිපයක් සම්බන්ධයෙන් සැකපිට පෙරේදා (25දා) රාත්‍රි අපරාධ පරීක්ෂණ දෙපාර්තමේන්තුව විසින් අත්අඩංගුවට ගැනුණු කුරුණෑගල ශික්ෂණ රෝහලේ සේවය කළ ප්‍රසව හා නාරිවේද වෛද්‍යවරයාට එරෙහිව කාන්තාවෝ පස්දෙනෙක් ඊයේ (26දා) කුරුණෑගල ශික්ෂණ රෝහලේ පාලනාධිකාරිය වෙත සිය පැමිණිලි ඉදිරිපත් කර තිබේ.
අදාළ සැකකාර වෛද්‍යවරයාගෙන් සිසේරියන් සැත්කම් සිදුකරගත් මවුවරුන්, ඔවුන්ට එම දරු ප්‍රසූතියෙන් පසුව නැවත පිළිසිඳ ගැනීමේ කිසියම් ගැටලුකාරි තත්වයකට මුහුණදුන් පිරිස් සිටි නම් ඒ පිළිබඳව සිය පැමිණිලි කුරුණෑගල ශික්ෂණ රෝහල් පාලනාධිකාරියට දැනුම් දෙන ලෙස කළ නිවේදනයකට අනුව ඊයේ මෙම පැමිණිලි ලැබී තිබේ. කුරුණෑගල හා වාරියපොළ යන ප්‍රදේශවල පදිංචි වයස අවුරුදු විසි ගණන්වල හා තිස් ගණන්වල විවාහක කාන්තාවන් පස්දෙනකු මෙසේ සිය පැමිණිලි ඉදිරිපත් කළ බව කුරුණෑගල ශික්ෂණ රෝහලේ නියෝජ්‍ය අධ්‍යක්ෂි වෛද්‍ය චන්දන කැඳන්ගමුව මහතා පැවැසිය.
තමන් විවාහ වී කෙටි කාලයදී ගැබ් ගෙන කුරුණෑගල ශික්ෂණ රෝහලේදි කළ පළමු දරුවා බිහි කිරීමේ සිසේරියන් සැත්කමින් පසුව යළිත් ගැබ් ගැනීමක් සිදු නොවූ බවත් කුරුණෑගල ශික්ෂණ රෝහලේද්දී තමන්ට මෙම සිසේරියන් සැත්කම් සිදු කළේ මේ වනවිට අත්අඩංගුවේ පසු වන ශාෆි පියාබ්දීන් නමැති වෛද්‍යවරයා බැවින් තමන් නැවත ගැබ් ගැනීමකට ලක් නොවූයේ එම වෛද්‍යවරයා විසින් සිසේරියන් සැත්කමේදී තමන් වන්ධ්‍යාකරණයකට ලක්කර ඇතැයි සැක කරන බව ඔවුහු සිය පැමිණිල්ල මඟින් දක්වා තිබේ.
අදාළ පැමිණිලිකාර කාන්තාවන් පස්දෙනාගේ කැමැත්ත මත අද (27දා) ඔවුන් වන්ධ්‍යාකරණයට ලක්ව ඇතිදැයි අනාවරණය කර ගැනීම සඳහා පරීක්ෂාවට ලක්කිරීමට නියමිත බව කුරුණෑගල ශික්ෂණ රෝහලේ නියෝජ්‍ය අධ්යක්ෂ වෛද්‍ය චන්දන කැඳන්ගමුව මහතා සඳහන් කළේය. මාතෘ හා කාන්තා රෝග අංශයේ සේවය කළ ෂිහාබ්දීන් මොහොමඩ් ෂාෆි වෛද්‍යවරයාගෙන් ඉකුත් 24 වැනිදාට සිදුකළ විමසුමකදී මේ වනවිට සිසේරියන් සැත්කම් 8,000ක් සිදුකර ඇති බව පිළිගෙන ඇතැයි කුරුණෑගල ශික්ෂණ රෝහලේ අධ්යක්ෂ වෛද්‍ය සරත් වීරබණ්ඩාර මහතා පැවැසීය.
අධ්යක්ෂවරයා මේ බව අනාවරණය කළේ කුරුණෑගල ශික්ෂණ රෝහලේදි පෙර්දා (25දා) පැවැත්වූ මාධ්‍ය හමුවකදීය. එහිදි රෝහල් අධ්යක්ෂ වෛද්‍ය සරත් වීරබණ්ඩාර මහතා තවදුරටත් තොරතුරු හෙළි කරමින් මෙම වෛද්‍යවරයා සිසේරියන් සැත්කම් 8,000ක් සිදුකර ඇති බව පිළිගෙන තිබෙන බවත් සිසේරියන් සැත්කම් කිරිමේදි අසාධාරණයක් අක්‍රමිකතාවක් සිදුව ඇති බවට මේ වනවිට පැමිණිල්ලක් ලැබී ඇති බවත් ඒ සම්බන්ධව කුරුණෑගල ශික්ෂණ රෝහලේ නියෝජ්‍ය අධ්‍යක්ෂ්‍ය වෛද්‍ය චන්දන කැඳන්ගමුව මහතාගේ ප්‍රධානත්වයෙන් විමර්ශනයක් කරගෙන යන බවය.
පොලිසිය පවසන ආකාරයට යම්කිසි අසාධාරණයක් අක්‍රමිකතාවක් සිදුව තිබෙන බව කියනවා. සෞඛ්‍ය බලධාරීන් හැටියට මේ සම්බන්ධව පැමිණිලි ලැබීම වැදගත් බවත් එම පැමිණිලි අනුව විද්‍යාත්මක පරික්ෂණවලින් අනතුරුව විශේෂඥ වෛද්‍යවරුන්ගේ සහාය ඇතිව ඇත්ත නැත්ත හෙළිකර ගැනීමට හැකි බව අධ්යක්ෂවරයා පවසයි. මෙම වෛද්‍යවරයා විසින් කුරුණෑගල ශික්ෂණ රෝහලේද්දී සිදුකළ සිසේරියන් සැත්කම් සම්බන්ධව තොරතුරු එක්රැස් කර ගන්න ඕනෑ. එම ලේඛන අප සතුව තිබෙනවා. මේ සම්බන්ධව වාර්තාවක් සෞඛ්‍ය අමාත්‍යාංශයේ ලේකම්වරයාට යවා පරික්ෂූණ කටයුතු සිදුකරගෙන යන බව අධ්යක්ෂවරයා කියයි.
මෙම සිද්ධියට අමතරව මේ වෛද්‍යවරයා ඇඳ ඉහපත්වල නම් වෙනස්කර අලුත උපන් දරුවකු වෙනත් අයකුට දිමේ සිද්ධියක් සම්බන්ධව මාධ්‍යවේදීන් ඇසූ ප්‍රශ්නයකට පිළිතුරු දුන් අධ්යක්ෂවරයා මෙම වෛද්‍යවරයාට එල්ල වී ඇති මේ චෝදනාවට අමතරව වෙනත් අක්‍රමිකතා සිදුකළා යැයි කියන කාරණය සම්බන්ධව පරික්ෂණයක් සිදුකළ බවත් ඒ පිළිබඳව මූලික විමර්ශනයක් සිදුකර වාර්තාවක් සකස් කර තිබෙන බවත් පැවැසීය.
-විජේසිංහ වැලිකන්ද-
