කුවේට් රාජ්‍යයේ ආපණ ශාලාවක ආහාර ඇණවුම් බෙදාහැරීමේ නිරත වී සිටියදී, එම ඇණවුම ලබා දීමට මඳක් ප්‍රමාද වීම නිසා උරණ වූ කුවේට් ජාතිකයකු තැබූ වෙඩි පහරකින් ඔත්පළ වී, ඇඳි වත පමණක් රැගෙන, ශ්‍රී ලංකාවේ තම දූ දරුවන් සහ අසනීප වී සිටින බිරිය ජීවත් කිරීම සඳහා හිඟා කෑමට මහ පාරට බැසීමට සූදානමින් මෙරටට ඉකුත් දා (26) අලුයම රාජාංගණය ප්‍රදේශයේ පදිංචිකරුවකු කටුනායක ගුවන්තොටුපොළ වෙත පැමිණ සිටියේය.ඔහු රාජාංගණය යාය - 11 ප්‍රදේශයේ පදිංචි, සාගර ලක්ෂ්මන් තිලකරත්න නමැති, 46 හැවිරිදි පුද්ගලයෙකි. ඔහු මෙසේ පැවැසුවේය.
“මම ගම් ප්‍රදේශයේ මේසන් වැඩ කරමින් සිටියේ. පසුව මම රියැදුරු බලපත්‍රය අරන් කුවේට්වල කුවේට් වල අබුතහම් කියන ආපණ ශාලාවේ ආහාර ඇණවුම් රැගෙන ගොස් භාර දෙන්නකු වශයෙන් සේවයට ගියා. මම එහෙ අවුරුදු 7ක් වැඩ කළා. මම අවුරුදු 5ක් වැඩ කරලා ලංකාවට ආවා. ඇවිත් 2023 දී ආයෙමත් කුවේට්වලට ගියා.
ඒ අබුතහම් ආපණ ශාලාවේ ඔවුන්ට අයිති තවත් ආපණ ශාලා දෙකක් තියෙනවා. ඔය සිද්ධිය වුණේ 2024 ජනවාරි 11 වැනිදා පාන්දර මම එතකොට මේ අබුතහම් ආපණ ශාලාවේ වෙනත් ශාඛාවක වැඩ කර කර හිටියේ. මට එදා පාන්දර 4.45ට විතර මම වැඩ කරමින් සිටි ආපණ ශාලාවට කතා කර කිව්වා, දැන් ඕඩරයක් ආවා, ඒක දැනටමත් පරක්කු වෙලා තියෙන්නේ, ගිහින් භාර දෙන්න කියලා.
ඒ ආපණ ශාලා සමූහයේ වාහන 3ක් තියෙනවා. අපි ඒවායින් ආහාර ඇණවුම් රැගෙන ගොස් භාර දීම සිදු කරනවා. මම වැඩ කරමින් සිටි ආපණ ශාලාවේ සිට ඒ ආපණ ශාලාවට ගිහින්, ඒ ඇනවුම භාර දීමට නියමිත බර්’ නමැති කාන්තාර ප්‍රදේශයේ පිහිටි නිවෙස වෙත ගියා. ගිහින් ආහාර ඇණවුම් කළ පුද්ගලයාට දුරකතන ඇමතුමක් දුන්නා. ඔහු ඒකට පිළිතුරු දුන්නේ නැහැ.ඔහු ඔහුගේ මෝටර් රථයෙන් පැමිණ මගේ මෝටර් රථය පිටු පසින් නවතා ගෙන සිටියදී මම ඔහුට ආහාර ඇණවුම භාර දීමට ඔහුගේ මෝටර් රථය අබියසට යනවාත් සමගම ඔහු මෝටර් රථයේ වීදුරුව පහත් කර මට වෙඩි තැබුවා.
එසේ වෙඩි තබා ඔහු එරට භාෂාවෙන් පලයන් යන්න කියා පැවැසුවා.මම මෝටර් රථයට ආපසු පැමිණ ආපණ ශාලාව වෙත පැමිණීමට තැත් කළත්, මට මෝටර් රථය පදවාගෙන එන්න පාර පේන්නේ නැතිව ගියා. මම මෝටර් රථය පාරෙන් අයින් කර නවත්වලා මම ඉන්න ලොකේෂන්' එක ආපණ ශාලාවේ අනෙක් මෝටර් රථයක රියැදුරුවරයකුට යවා, මම මෝටර් රථය තුළ දිගා වුණා. එම රියැදුරුවරයා පැමිණ මාව රෝහලකට ඇතුළත් කළා.මාසෙකට පස්සෙ එරට පොලිසියට මාව රැගෙන ගිහින් කටඋත්තර ප්‍රකාශයක් අරන් යළිත් මාව රෝහල්ගත කළා.
ලංකාවට මේ සිද්ධිය ආරංචි වෙලා බලපෑම් ආවාම මාව එරට ශ්‍රී ලංකා තානාපති කාර්යාලය වෙත රැගෙන ගියා.මේ පිළිබඳ නඩු විභාගය ඉකුත් ජුනි 6 වැනිදා උදේ 9.30ට පැවැත්වීමට නියමිතව තිබුණත්, තානාපති කාර්යාලයේ නිලධාරින් මාව අධිකරණය වෙත රැගෙන ගියේ දහවල් 11.30ට විතර එතකොට නඩු විභාගය පවත්වන විනිශ්චයකාරතුමා සිය කටයුතු අවසන් කර අධිකරණය තුළින් පිට වී ගිහින් තිබුණා.ඊට පස්සෙ යළිත් මගේ නඩුව විභාග කරන දවසක් ගැන දන්නේ නැහැ. මට පාසල් යන දරුවො දෙන්නෙක් ඉන්නවා. මගේ බිරිය අසනීපෙන් ඉන්නේ. ඇය සතිපතා බෙහෙත් ගන්න ඉස්පිරිතාලෙට යනවා. මම නඩුව පිළිබඳව නීතිඥතුමාගෙන් ද ඇහුවා. ඔහුත් ඒ පිළිබඳ නිශ්චිත තොරතුරු හරියටම දන්නේ නැහැ.
ඉතින් මේ පසුබිම යටතේ මම තානාපති කාර්යාලයට වෙලා ඉන්න එක තේරුමක් නැහැ. ඒ නිසා මම වැඩ කරපු ආපණ ශාලාවට ගිහින් ඩිනාර් 100ක් ඉල්ලා ගෙන ශ්‍රී ලංකාවට එන්න ටිකට් හදා ගෙන ලංකාවට ආවා. මම දැන් මොකද කරන්නේ?" යැයි ඔහු මාධ්‍යවේදීන්ගෙන් විමසීමක් කළ අතර, මඳ නිහැඬියාවකින් පසුව, “මම මගේ දරුවන් දෙදෙනා සහ බිරිය සමග හිගා කනවා" යැයි පවසා, කටුනායක ගුවන්තොටුපොළෙන් දෙනෝ දහසක් බලා සිටියදී සිය ගම් පියස වන රාජාංගණය බලා ඔහු පිටත්ව ගියේය.
සාගර ලක්ෂ්මන් තිලකරත්න මෙදින අලුයම 2.30ට දෝහා සිට කටාර් සේවයේ කිව්.ආර්. 662 දරන ගුවන් යානයෙන් කටුනායක ගුවන්තොටුපොළ වෙත පැමිණ තිබූ අතර, ඔහු පිළිගැනීමට ලංකා මානව හිමිකම් සංවිධානයේ සභාපති, ආචාර්ය සරත් ජයන්ත පීරිස් මහතා ඇතුළු එම සංවිධානයේ නිලධාරීන් පිරිසක් ද ගුවන්තොටුපොළ වෙත පැමිණ සිටියහ. එහිදී ශ්‍රී ලාංකිකයකුට මේ ආකාරයට බල්ලන්ට බළලුන්ට මෙන් වෙඩි තබා පලවා හැරීම අනීතික බවත්, සාගර ලක්ෂ්මන්ට මෙරට තුළදීවත් සාධාරණයක් ඉටු කරන ලෙසද ඉල්ලීමක් කළේය.
ටී.කේ.ජී. කපිල
