රෝෂන් තුෂාර
ශ්‍රී ලංකන් ගුවන් සමාගමට 2013 වසරේදී යානා දහයකින් සමන්විත ගුවන් බළඇණියක් මිලදී ගැනීමේදී යුරෝපීය ගුවන් සමාගමකින් ඇමරිකන් ඩොලර් මිලියන 2ක අල්ලසක් ලබාගැනීමේ සිද්ධිය සම්බන්ධයෙන් සැකකරුවන් ලෙස නම් කළ හිටපු ඇමැති චමල් රාජපක්ෂ මහතාගේ පුත් ශමීන්දු රාජපක්ෂ සහ ගුවන් සමාගමේ හිටපු ප්‍රධාන විධායක නිලධාරි කපිල චන්ද්‍රසේන මහතාගේ බිරිද වන ප්‍රියංගා නියෝමාලී අත්අඩංගුවට ගෙන අධිකරණයට ඉදිරිපත් කරන්නැයි කොළඹ ප්‍රධාන මහේස්ත්‍රාත් අසංග එස්. බෝදරගම මහතා ඊයේ (02) විවෘත වරෙන්තු නිකුත් කළේය.
විදේශගතව සිටින සැකකරුවන් දිගින් දිගටම අධිකරණය විමර්ශන හා අධිකරණය මගහරිමින් සිටින බවට සාක්ෂි ඉදිරිපත් කරමින් අල්ලස් කොමිසම කළ ඉල්ලීමක් අනුව මෙම වරෙන්තුව නිකුත් කළේය.බෲනායි රටේ ව්‍යාජ සමාගමක් පිහිටුවා ප්‍රකට (ඇමෙරිකන් ඩොලර් මිලියන දෙකක) අල්ලසක් ලබාගැනීම සම්බන්ධයෙන් පැමිණිල්ල කැඳවූ අවස්ථාවේදී මෙම වරෙන්තු නියෝග නිකුත් කළේය.පැමිණිල්ල කැඳවූ අවස්ථාවේදී රක්ෂිත බන්ධනාගාරගත ලංකන් ගුවන් සමාගමේ හිටපු ප්‍රධාන විධායක නිලධාරි කපිල චන්ද්‍රසේන මහතා බන්ධනාගාර නිලධාරින් විසින් අධිකරණයට ඉදිරිපත් කරනු ලැබීය.
අල්ලස් කොමිසම පසුගිය නඩු වාරයේදී කළ ඉල්ලීමක් සලකා බැලීමෙන් පසුව ඊයේ දින සිය නියෝගය ප්‍රකාශයට පත් කළ ප්‍රධාන මහේස්ත්‍රාත්වරයා අදාළ වරෙන්තුව ආගමන විගමන පාලකවරයාට යොමු කිරිමට ද නියෝග කළේය. සැකකරුවන්ට එරෙහිව ඉංග්‍රීසි භාෂාවෙන් ජාත්‍යන්තර රතු වරෙන්තු නිකුත් කිරීම සම්බන්ධයෙන් කටයුතු කර ඉදිරි පියවර ගන්නා ලෙසටද මහේස්ත්‍රාත්වරයා අල්ලස් කොමිසමට නියෝග කළේය.
සැකකරුවන් දෙදෙනා විදේශගත වී ඇත්තේ කුමන දිනයේද? කුමන රටකටද? යන්න සම්බන්ධයෙන් පූර්ණ විස්තර වාර්තාවක් අධිකරණයට ඉදිරිපත් කරන ලෙසට මහේස්ත්‍රාත්වරයා අල්ලස් කොමිසමට නියෝග කළේය.පැමිණිල්ලේ පළමු සැකකරු වන ශ්‍රී ලංකන් ගුවන් සේවයේ හිටපු ප්‍රධාන විධායක නිලධාරි කපිල චන්ද්‍රසේන ලබන 17 දක්වා යළි රක්ෂිත කිරිමටද බන්ධනාගාරගත නියෝග කෙරිණි.
පැමිණිල්ල කැඳවූ අවස්ථාවේදී අල්ලස් කොමිසම වැඩිදුර වාර්තාවක් අධිකරණයට ඉදිරිපත් කරමින් කියා සිටියේ, අධිකරණයට ඉදිරිපත් කළ ලේඛනයක් සමාජ මාධ්‍ය හරහා සංසරණය වන බවය. සැකකරු දුන් දිවුරුම් ප්‍රකාශයේ තොරතුරු ද එහි අන්තර්ගත වන බවද අල්ලස් කොමිසම වැඩිදුරටත් පැවැසීය.සැකකරු දුන් දිවුරුම් ප්‍රකාශයේ තොරතුරු අල්ලස් කොමිසම් අධිකරණයට රහසිගතව ඉදිරිපත් කිරීමට සුදානම්ව සිටියද කිසියම් පාර්ශ්වයක් විසින් මෙලෙස සමාජ මාධ්‍ය වෙත යොමු කරනු ලැබීම සැකකරුගේ ජීවිතයට තර්ජනයක් වන බවද කීය.
ඊට ප්‍රතිචාර දැක්වූ ප්‍රධාන මහේස්ත්‍රාත්වරයා, සමාජ මාධ්‍යයේ සංසරණය වන අදාළ ලේඛනයේ අධිකරණ නිල මුද්‍රාව තිබේද යන්න විමර්ශනය කර අධිකරණයට කරුණු දක්වන ලෙසට අල්ලස් කොමිසට නියෝග කළේය. අල්ලස් කොමිසම වෙනුවෙන් එම කොමිසමේ සහකාර අධ්‍යක්ෂ ජනරාල් නීතිඥ තනූජා බණ්ඩාර මහත්මිය කරුණු දක්වමින් මෙසේ පැවසුවාය.
සිද්ධිය සම්බන්ධයෙන් මර්ශන සිදු කරනවා. මුදල් සංසරණය වීමට අදාළව එස්.එල්. ඇග්‍රෝ යන ආයතනයේ අධ්‍යක්ෂවරයකුගෙන් ප්‍රකාශ ලබාගැනීම සිදුකළා.එම ආයතනවල තවත් අධ්‍යක්ෂවරුන්ගෙන් ප්‍රකාශ ලබාගැනීමට තිබෙන බැවින් හා තවදුරටත් විමර්ශන කටයුතු සිදුවන බැවින් සැකකරු තවදුරටත් රක්ෂිත බන්ධනාගාරගත කරන ලෙසද ඉල්ලා සිටිනවා.
එහිදී මහේස්ත්‍රාත්වරයා යොමු කළ ප්‍රශ්නයකට පිළිතුරු දෙමින් අල්ලස් කොමිසම කියා සිටියේ, සැකකරු මුදල් තැන්පත් කළ බව කියන හොංකොං, සිංගප්පූරුවේ සහ ලංකාවේ සියලු බැංකු ගිණුම් පිළිබඳව විමර්ශන තවදුරටත් සිදු කරන බවය. සැකකරු වෙනුවෙන් ජනාධිපති නීතිඥ රියන්සි අර්සකුලරත්න මහතා කරුණු දක්වමින් කියා සිටියේ, සිද්ධිය වී වසර ගණනාවකට පසුවත් විමර්ශන කටයුතු සිදු කරන බවය.ජනාධිපති නීතිඥවරයා මෙසේද පැවැසීය.
මෙම සිද්ධියට අදාළ පළමු විමර්ශනය ආරම්භ වන්නේ 2020 වර්ෂයේ. එහිදී සැකකරුට ඇප දී තිබෙනවා. දැන් අල්ලස් කොමිසමේ අධ්‍යක්ෂ ජනරාල් කොටුව මහේස්ත්‍රාත්වරයා වශයෙන් සිටියදී තමයි මෙලෙස ඇප ලබා දී තිබෙන්නේ. එම ඇප කොන්දේසි සඳහන් වෙනවා. ඇප නොදීමට තරම් කරුණු අනාවරණය නොවන බව ඇප දීමේදී සඳහන් කර තිබෙනවා. විමර්ශනය සම්බන්ධයෙන් දවස් පහළොවෙන් පහළොවට අධිකරණයට කරුණු වාර්තා කළ යුතුයි. අවුරුදු හයක් ගිහින් තමයි මෙම විමර්ශනයට අදාළව අධිකරණයට කරුණු වාර්තා කරන්නේ. මගේ සේවාදායකයාගේ අත්අඩංගුවට ගැනීමට ඇප දීම බාධාවක් නොවන බවද නීතිඥවරයා පැවසීය.
ඊට ප්‍රතිචාර දැක්වූ අල්ලස් කොමිසම මෙසේ පැවැසීය. 2023 අංක 23 දූෂණ විරෝධී පනතට අනුව විමර්ශනය සම්බන්ධයෙන් කරුණු දැක්විය යුත්තේ අවශ්‍ය අවස්ථාවේදී පමණයි. සැකකරුට ඇප දූනහොත් සැකකරුගේ ජීවිතයට තර්ජනයක් එල්ල විය හැකියි. එබැවින් සැකකරුට ඇප දීම සම්බන්ධයෙන් තරයේ විරුද්ධ වනවා.
දෙපාර්ශ්වයේ කරුණු සලකා බැලූ ප්‍රධාන මහේස්ත්‍රාත්වරයා සැකකරු ලබන 17 දින දක්වා යළි රක්ෂිත බන්ධනාගාර ගත කරමින් විමර්ශන ප්‍රගතිය එදිනට ඉදිරිපත් කරන ලෙසට අල්ලස් කොමිසමට නියෝග කළේය.
