අලුත් පොකුර “අලුත් අවුරුදු කොවිඩ් පොකුර” වෙයි"
-ඩයනා උදයංගනී-
මේ දිනවල හමුවන කෝවිඩ් රෝගීන් අයත් වන පොකුර "අලුත් අවුරුදු කෝවිඩ් පොකුර' යනුවෙන් නම් කර තිබේ. රජයේ ප්‍රවෘත්ති දෙපාර්තමේන්තුව ඊයේ (29) පස්වරුවේ නිකුත් කළ නව කොවිඩ් රෝගීන් පිළිබඳ වාර්තාවේ එම රෝගීන් අලුත් අවුරුදු කොවිඩ් පොකුරට අයත් බව සඳහන් කර තිබිණි. මීට පෙර කොවිඩ් රෝගීන් වාර්තා වූ පොකුරු මිනුවන්ගොඩ කොවිඩ් පොකුර, බ්‍රැන්ඩික්සි කෝවිඩ් පොකුර, පෑලියගොඩ කොවිඩ් පොකුර, බන්ධනාගාර කොවිඩ් පොකුර ආදී වශයෙන් නම් කර තිබිණි. ඒ අනුව මෙරටින් වාර්තා වන නවතම කොවිඩ් පොකුර වන්නේ අලුත් අවුරුදු කොවිඩ් පොකුරයි.
කාරෝනා රෝගිහු තවත් 1531- අලුතින් මරණ 06යි
-රංජන් කස්තුරි-
කොරෝනා ආසාදිත රෝගීන් 1531 ක් ඊයේ (29) සොයාගත් බව කොරෝනා පැතිරීම වැළැක්වීමේ ජාතික ක්‍රියාන්විත මධ්‍යස්ථානය පවසයි. ඒ අනුව මෙරටින් වාර්තතා වන කොරෝනා රෝගීන්ගේ මුළු සංඛ්‍යාව 106494 දක්වා ඊයේ ඉහළ ගියේය. රෝහල්වල ප්‍රතිකාර ලබමින් සිටින කොරෝනා රෝගීන්ගේ මුළු සංඛ්‍යාව මේ වන විට 1643ක් වන අතර සැක සහිත රෝග ලක්ෂණ ඇති 9209 දෙනෙක් රෝහල්වල වෛද්‍ය අධීක්ෂණය යටතේ පසුවෙති.
කොරෝනා ආසාදිතව ප්‍රතිකාර ලබමින් සිටි තවත් රෝගීන් 362ක් සුවය ලබා ඊයේ (29) රෝහල්වලින් පිටව ගිය අතර සුවය ලැබූ කොරෝනා රෝගීන්ගේ මුළු සංඛ්‍යාව 95,44ක් දක්වා ඉහළ ගිය බව ද එම මධ්‍යස්ථානය සඳහන් කරයි. මේ අතර අලුතින් කොරෝනා මරණ 06ක් වාර්තා වූ බවද එම මධ්‍යස්ථානය කියයි. ඒ අනුව කොරෝනා මරණ සංඛ්‍යාව 667 දක්වා ඉහළ ගියේය.
බණ්ඩාරගම ප්‍රා. සභාව ඇතුළු ආයතන දෙකක් වසයි
-බිමල් ශ්‍යාමන් ජයසිංහ-
බණ්ඩාරගම ප්‍රාදේශීය සභාව සහ ඊට අනුයුක්ත ආයතන දෙකක සේවක සේවිකාවන් තිදෙනකුට කොරෝනා වයිරසය ආසාදිත වීම හේතුවෙන් ප්‍රාදේශීය සභාව ඇතුළු එම ආයතන දෙක ඊයේ (29) දින සිට තාවකාලිකව වසා දැමු බව බණ්ඩාරගම ප්‍රාදේශීය සභාවේ සභාපති දේවේන්ද්‍ර පෙරේරා මහතා පැවසීය. බණ්ඩාරගම නගරයේ ආයුර්වේද මධ්‍යස්ථානයේ ඖෂධ සංයෝජකවරයාට, කායවර්ධන මධ්‍යස්ථානය මුරකරුට මෙන්ම ප්‍රාදේශීය සභාවේ ප්‍රධාන කාර්යාලයේ ගිණුම් අංශයේ ලිපිකාරිණියකට කොරෝනා වයිරසය ආසාදිත වී ඇති බව සභාපතිවරයා කීය.
ඊට අමතරව තවත් සේවක සේවිකාවන් කිහිප දෙනෙක් විවිධ රෝග ලක්ෂණ පහළ කරමින් සිටින බව සභාපති දේවේන්ද්‍ර පෙරේරා මහතා පැවසීය. එම සේවක සේවිකාවන්ගේ මුල් ආශ්‍රිතයන් හඳුනාගෙන අද 30 දින බණ්ඩාරගම සෞඛ්‍ය වෛද්‍ය නිලධාරි කාර්යාලයේ දී පී.සී.ආර්. පරික්ෂණ සිදුකිරීමටත් කටයුතු යොදා ඇතැයි ඇමැතිවරයා වැඩිදුරටත් පැවසීය.
හෝමාගම රෝහලේ වාට්ටු 4ම පිරෙයි -
බණ්ඩාරගම බිමල් ශ්‍යාමන් ජයසිංහ-
හෝමාගම මූලික රෝහලේ කායික වෛද්‍ය වාට්ටු සහ ශල්‍ය වෛද්‍ය වාට්ටුව හතරම කොරෝනා ආසාදිත රෝගීන්ගෙන් පිරි ඇතැයි එම රෝහලේ වෛද්‍ය අධිකාරි ජනිත හෙට්ටිආරච්චි මහතා පැවසීය. මේ වන විට රෝගීන් එකසිය අසූ දෙකක පමණ පිරිසක් ප්‍රතිකාර ලබන බව වෛද්‍යවරයා කීය. ඊයේ 29 දින වන විට කොරෝනා ආසාදිත ගර්ෂණී මාතාවන්ට ප්‍රතිකාර ලබා දෙන වාට්ටුවේ රෝගීන් දහතුන් දෙනෙක් ද, කොරෝනා ආසාදිත කුඩා දරුවන් දොළොස් දෙනෙක්ද මෙහි ප්‍රතිකාර ලබන බව වෛද්‍ය අධිකාරිවරයා කීය
ප්‍රතිකාර ලබන රෝගීන් සුවය ලබා පිටව යන තත්වය බලා නව රෝගීන් ඇතුළත් කර ගන්නා බව වෛද්‍ය අධිකාරිවරයා වැඩිදුරටත් පැවසීය.
අසාධ්‍ය රෝගීන්ට දිසාවක් පාසා විශේෂ ඒකක: තෙවැනි රැල්ලට සුදානමක්
කොරෝනා තෙවැනි රැල්ලට මුහුණ දීම සඳහා පුව සැලසුමක් සකස් කිරිමට ප්‍රාථමික සෞඛ්‍ය සේවා වසංගත රෝග හා කොවිඩ් රෝග පාලන කටයුතු රාජ්‍ය අමාත්‍ය විශේෂඥ වෛද්‍ය සුදර්ශනී ප්‍රනාන්දු පුල්ලේ මහත්මියගේ අවධානය යොමු වී තිබේ. කොවිඩ් මර්දනය සඳහා දැනට යොදා ඇති ක්‍රියාමාර්ග තවදුරටත් පුළුල් කිරීමේ මූලික අරමුණ කරගෙන ඒ සඳහා අවශ්‍ය පූර්ව සැලසුමක් සකස් කළ යුතු බව ද එම අමාත්‍යාංශයේ ඊයේ (29) පැවැති රැස්වීමක දී රාජ්‍ය ඇමැතිවරිය කීවාය.
කොවිඩ් රෝගීන්ගේ ඔක්සිජන් අවශ්‍යතාව ඉහළ යන බැවින් ඒ සඳහා අවශ්‍ය ඔක්සිජන් සංචිතය පවත්වා ගැනීම සඳහා කටයුතු කිරීමටත් අදාළ සැපයුම් ආයතන සමග සාකච්ඡා කර හදිසි අවස්ථාවක දී අවශ්‍ය ඔක්සිජන් ප්‍රමාණය පිළිබඳ තක්සේරුවක් සිදුකිරිමටත් මෙම රැස්වීමේ දී තීන්දු කර ඇත. ඉතා අසාධ්‍ය රෝගීන් සඳහා විශේෂ ප්‍රතිකාර ඒකක ස්ථාපිත කිරීමට ද එහිදී සාකච්ඡා වී තිබිණ.
ගම්පහ දිස්ත්‍රික්කයේ පී.සී.ආර්. පරික්ෂණ ධාරිතාව වැඩිකිරීම කෙරෙහි ද වතුපිටිවල රෝහලේ නව පී.සී.ආර්. යාන්ත්‍රයක් සවිකිරීම කෙරෙහි ද එහි දී අවධානය යොමු වී ඇත. සෑම දිස්ත්‍රික්කයක්ම ආවරණය වන පරිදි ඇඳන් 200 කට වැඩි ප්‍රතිකාර මධ්‍යස්ථාන ස්ථාපිත කිරීමට ද ඒ සඳහා රජයේ සහ පුද්ගලික අංශයේ ගොඩනැගිලි ලබා ගැනීමට ද මෙම රැස්වීමේ දී තීන්දු කර ඇත.
පී..ආර්. පරීක්ෂණ වැඩිකරයි
-සුජිත් හේවාජුලිගේ-
කොරෝනා ආසාදිතයන් හඳුනාගැනීම සඳහා යොදා ගන්නා පී.සී.ආර්. පරික්ෂණ වැඩි කිරීමට රජය තීරණය කර ඇත. රජය මෙම තීරණය ගෙන ඇත්තේ කොරෝනා අවදානම් තත්වය සැලකිල්ලට ගෙනය. පී.සී.ආර්. පරීක්ෂණ 23,700 ක් ඊයේ (28) දිනයේදී පමණක් කළ බව සෞඛ්‍ය අමාත්‍යාංශය පවසයි. එය දිනකදී කළ වැඩිම පී.සී.ආර්. පරික්ෂණ සංඛ්‍යාව බව පැවසේ. මේ රටේ මේ දක්වා ඇති පී.සී.ආර්. පරික්ෂණ සංඛ්‍යාව විසි ලක්ෂය ඉක්මවා ඇතැයි සෞඛ්‍ය නිලධාරීහු පවසති. මේ අතර දිවයිනේ විවිධ ප්‍රදේශවලින් ජෛව සාම්පල හාරදහසක් පමණ කොවිඩ් පරික්ෂණ සඳහා ශ්‍රී ජයවර්ධනපුර විශ්වවිද්‍යාලයේ පර්යේෂණාගාරවලට පෙරේදා (28) ලැබී තිබූ බව එහි ප්‍රකාශකයෙක් පැවැසීය.
මුල්ලේරියාව ප්‍රා. සභා අඩවියෙන් කොවිඩ් 60ක්
-ඉන්දිකා රාමනායක-
කොටිකාවත්ත, මුල්ලේරියාව ප්‍රාදේශීය සභා බල ප්‍රදේශයේ ඊයේ (29) දිනය තුළ කොවිඩ් ආසාදිතයන් 60 දෙනකු හඳුනාගෙන ඇති බව සෞඛ්‍ය අංශ පවසයි. පුද්ගලයන් 283 දෙනකු පී.සී.ආර්. පරික්ෂණයට ලක් කිරිමෙන් අනතුරුව මෙම පිරිස හඳුනාගෙන ඇත. අංගොඩ කර්මාන්තපුරයේ ඇඟලුම් කම්හලක සේවිකාවන් සහ තවත් පුද්ගලික ආයතනයක සේවකයන් 37ක් ද මෙම පිරිස අතර සිටින බව ගොතටුව සෞඛ්‍ය වෛද්‍ය කාර්යාලයේ පරිපාලන මහජන සෞඛ්‍ය පරීක්ෂක නලින් ෆොන්සේකා මහතා පැවසීය. සෙසු ආසාදිතයන් හමුවී ඇත්තේ අංගොඩ සහ හිඹුටාන ප්‍රදේශවලින් බවද හෙතෙම කීය.
බස්නාහිර කපොලු 12කදී කොවිඩ් පරීක්ෂණ
-රංජන් කස්තුරි-
කොවිඩ් වයිරසය පළාත් අතර පැතිරයාම වැළැක්වීම සඳහා බස්නාහිර පළාතින් පිටවන හා ඇතුළු වන පුද්ගලයන් පරික්ෂා කිරිමේ විශේෂ ඒකාබද්ධ මෙහෙයුමක් ඊයේ (29) දහවල් සිට ස්ථාන 12 කදී ආරම්භ කළ බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා සඳහන් සෞඛ්‍ය අංශ, පොලිසිය හා ත්‍රිවිධ හමුදාවේ පිරිස් යොදා මෙම විශේෂ මෙහෙයුම ආරම්භ කර ඇති බවත්, එහිදී ඇන්ටිජන් පරික්ෂාවක් ද සිදුකරන බවත් හෙතෙම කියා සිටියේය.
කොච්චිකඩේ තෝප්පුව පාළම, කොටදෙණියාව බඩගම පාලම, නිට්ටඹුව හැලගල හන්දිය, මීරිගම ගිරිඋල්ල පාලම, දොම්පේ සමනබැද්ද පාලම, හංවැල්ල වනහගොඩ පාලම, අළුත්ගම බෙන්තර පාලම, තිනියාවල තිනියාවල හන්දිය, ඉංගිරිය කැටකැදැල්ල පාලම, බදුරලිය කලවානේ සමන්දේවාලය අසල, මීගහතැන්න ගොරකදූව අවිත්තාව පාලම, දක්ෂිණ අධිවේගී මාර්ග සංචාරක කොට්ඨාසයේ වැලිපැන්න හුවමාරුව අසල යන ස්ථානවලදී මෙම මෙහෙයුම් ක්‍රියාත්මක කෙරෙන බවද හෙතෙම කියා සිටියේය. බස්නාහිර පළාතට ඇතුළු වන හා පිටවන පුද්ගලයන් නියමිත සෞඛ්‍ය ආරක්ෂිත ක්‍රම අනුගමනය කරන ලෙසට පොලිසිය ඉල්ලා සිටියි.
කොන්සියුලර් කාර්යාලවල කටයුතුත් සීමා කරයි
-තිළිණි ද සිල්වා-
විදේශ අමාත්‍යංශයේ කොන්සියුලර් කටයුතු අංශයේ සේවා සැපයීමේ කටයුතු ඉදිරි දිනවලදී සීමාකරන බව විදේශ කටයුතු අමාත්‍යාංශය නිවේදනයක් නිකුත් කරමින් කරමින් සඳහන් කරයි. රටපුරා පැතිර යමින් තිබෙන කොවිඩ් වයිරස අවදානම සැලකිල්ලට ගෙන මෙම පියවර ගෙන ඇතැයි එම නිවේදනයේ සඳහන් වේ. ඉදිරි සතිවලදී කොන්සියුලර් කටයුතු අංශය හදිසි අවශ්‍යතා සඳහා ලබාදෙන සේවාවලට පමණක් ප්‍රමුඛතාවක් ලබාදෙන බවද එහි සඳහන් කර ඇත.
විදෙස්ගත ශ්‍රී ලාංකිකයින්ගේ අභාවය හා අපනයන ලිපි ලේඛන සහ අදාළ විදෙස්ගත ශ්‍රී ලාංකිකයින්ගේ අභාවය හා අපනයන ලිපි ලේඛන සහ අදාළ අනෙකුත් ලේඛන සහතික කිරීම හැර අනෙකුත් කොන්සියුලර් සේවා ලබාදෙන්නේ පූර්ව දැනුම් දීමකින් සිදුකළ වෙන්කර ගැනීමකින් පමණක් බවද අමාත්‍යාංශයේ කොන්සියුලර් කටයුතු අංශය කියා සිටී.
එසේ පූර්ව වෙන්කර ගැනීම් සඳහා දුරකථන අංක 0112335942, 0112338836 සහ 0112338812 ඇමතීමෙන් හෝ Consular@mfa.gov.lk විද්‍යුත් තැපෑලට යොමුකිරීම මගින් සිදුකරගත හැකි යැයි ද විදේශ අමාත්‍යාංශය කියයි.
අත්තනගල්ල පිරිවෙනක් වසාදමයි
- එස්.යූ.ඩබිලිව්.කේ. ජවර්ධන -
අත්තනගල්ල ශාසනාරක්ෂක බල මණ්ඩලය තුළ පිහිටි ස්වාමීන් වහන්සේලා 25කට අධික පිරිසක් වැඩ වාසය කරන පිරිවෙන් විහාරස්ථානයක් මුළුමනින්ම වසා දමා එහි හිමිරුන් පිරිසක් ස්වයං නිරෝධායනට ලක්කළ බව අත්තනගල්ල සෞඛ්‍ය වෛද්‍ය නිලධාරී කාර්යාලය පවසයි.
නිවසක පැවැති උදෑසන දානයක දී මෙම විහාරස්ථානයේ ස්වාමීන් වහන්සේලා පස් දෙනකුට කිසිදු මුඛ ආවරණයක් ද නොමැතිව දන් පිළිගන්වන ලද සහ පිරිකර පූජා කරන ලද බව පැවසෙන වැඩිහිටියකු දානයෙන් දින කිහිපයක් තුළ කොරෝනා වසංගතයට ගොදුරුවීම නිසා පිරිවෙන් විහාරස්ථානය වසා දමා එහි හිමිවරුන් පිරිසක් මෙසේ නිරෝධායනය කිරීමට සිදුවූ බව ප්‍රදේශයේ මහජන සෞඛ්‍ය පරීක්ෂක කේ.සී. රාජස්පක්ෂ මහතා පැවැසීය.
කොරෝනා රෝගීන්ට මාතර සමුපකාර රෝහලත් සුදානම්
-ක්‍රිෂාන් ජීවක ජයරුක්-
කොරෝනා ආසාදිත රෝගීන් සඳහා වෛද්‍ය ප්‍රතිකාර කිරීමට පෞද්ගලික අංශයට අවසර ලබා දෙන්නේ නම් ඒසඳහා තම රෝහලේ වෛද්‍ය කාර්ය මණ්ඩලය සුදානම් බව මාතර සමුපකාර රෝහලේ සභාපති චමින්ද ගුණසේකර මහතා පැවසීය. විශේෂයෙන්ම මාතර මැද්දවත්තේ පිහිටි සමුපකාර මණ්ඩල ගොඩනැගිල්ලේ ඒ සඳහා කාමර පහසුකම් ඇති බවද එම පරිශ්‍රය ප්‍රමාණවත් නොවන්නේ නම් සංචාරක හෝටලයක් හෝ කුලී පදනම මත ලබාගෙන කොරෝනා ප්‍රතිකාර සිදුකිරීමට කැමැත්තෙන් පසුවන බවද ඒ මහතා කීය.
කොරෝනා වෛද්‍ය ප්‍රතිකාර මධ්‍යස්ථානවල අධික තදබදය එමගින් අවම කරගත හැකි බව කී ගුණසේකර මහතා දිවයිනේ අනෙකුත් පෞද්ගලික රෝහල් ද බොහෝ විට ඒ සඳහා ඉදිරිපත් වනු ඇති බව ප්‍රකාශ කළේය. සහනදායි හා සාධාරණ මිල ගණන් යටතේ එම සේවාව සිදුකරන බවද ඔහු කීය. රට තුළ උද්ගතව ඇති තත්ත්වයත් සමග සෞඛ්‍ය කාර්ය මණ්ඩලය හා ජනතාව ආරක්ෂා කර ගැනීමේ අරමුණින් එම තීරණය ගත් බවත් එය රජයට ද විශාල අස්වැසිල්ලක් වනු ඇති බවත් හෙතෙම ප්‍රකාශ කළේය.
කළුතර හිරගෙදර රැඳවියන් 40කට කොරෝනා
කළුතර බන්ධනාගාරයේ රැඳවියන් 40 දෙනකු සඳහා කරන ලද පී.සී.ආර්. පරික්ෂණවල දී රැඳවියන් 32කට කොවිඩ් 19 වෛරසය වැළඳී ඇති බවට තහවුරු වී ඇතැයි කළුතර සෞඛ්‍ය බලධාරියෙක් ඊයේ (29) පස්වරුවේ පැවසීය. අහඹු ලෙස තෝරාගත් රැඳවියන් 40 දෙනෙක් වෙනුවෙන් ඉකුත් 27 දා කරන ලද පී.සී.ආර්. පරීක්ෂණවල ප්රතිඵල ඊයේ (29) පස්වරුවේ ලැබීමෙන් පසු මේ බව තහවුරු වී ඇතැයි ඒ මහතා පැවසීය.
මේ බව තහවුරු කර ගැනීම සඳහා කළුතර සෞඛ්‍ය බලධාරින් සහ බන්ධනාගාර බලධාරිගෙන් විමසීමක් කළ අතර, ඔවුන්ට තොරතුරු ලබා දීමේ බලයක් නොමැති බව ප්‍රකාශ කළේය.
බුලත්සිංහල 170කට පීසී.ආර්. පරික්ණෂ
බුලත්සිංහල සෞඛ්‍ය වෛද්‍ය නිලධාරි කොට්ඨාසයේ කොරෝනා සැත 170 කට පමණ ඊයේ (29) බුලත්සිංහල මහජන ක්‍රීඩාංගණයේදී පීසීආර් පරික්ෂණ සිදුකළ බව බුලත්සිංහල සෞඛ්‍ය වෛද්‍ය නිලධාරි කාර්යාලය පවසයි. රෝගීන්ගේ ආශ්‍රිතයන් හා අහඹු ලෙස තෝරාගත් පිරිසක් මෙම පරීක්ෂණ සඳහා යොමුකර තිබේ.
ගම්පහින් අලුතින් රෝගීහු 234ක්
- තිලකරත්න දිසානායක-
කොරෝනා දෙවැනි රැල්ලේ ඊයේ (29) උදෑසන වනවිට ගම්පහ දිස්ත්‍රික්කයේ ආසාදිතයින් 20,026 ක් දක්වා ඉහළ ගොස් ඇති බවත් ගත වූ පැය 24 ක කාලයක් තුළ ආසාදිතයින් 234 දෙනකු හමුව ඇති බවත් දිස්ත්‍රික් සෞඛ්‍ය සේවා අධ්‍යක්ෂ කාර්යාලය කියයි.. ගතවූ පැය 24 තුළ බියගම සෞඛ්‍ය වෛද්‍ය නිලධාරි කොට්ඨාසයෙන් 43 දෙනකු වන වැඩිම ආසාදිතයින් සංඛ්‍යාවක් හමුව ඇති බවත් දිවුලපිටිය කොට්ඨාසයෙන් -33 ක්, සීදුව-25 ක්, ගම්පහ-22ක් සහ වත්තල කොට්ඨාසයෙන් 21 දෙනකු වශයෙන් හමුව ඇති බවත් සෞඛ්‍ය සේවා අධ්‍යක්ෂ විශේෂඥ වෛද්‍ය නලීන් ආරියරත්න මහතා කීය.
මෙම ආසාදිතයින් සෞඛ්‍ය වෛද්‍ය නිලධාරි කාර්යාලය මගින් සිදු කළ ක්ෂේත්‍ර පී.සී.ආර්. පරීක්ෂාවේදී 189 දෙනකු සහ රෝහල්වල සිදු කළ පරීක්ෂාවේදී 45 දෙනෙකු හමුවී තිබේ. දිස්ත්‍රික්කයේ කොරෝනා ප්‍රතිකාර මධ්‍යස්ථාන හයෙහි ඇඳන් 511 න් ඊයේ (29) උදෑසන වනවිට ඇඳන් 437 ක් පිරී තිබූ බව සඳහන් කළ අධ්‍යක්ෂවරයා ගතවූ පැය 24 තුළ ප්‍රතිකාර මධ්‍යස්ථාන හයට ආසාදිතයින් 92 කු ඇතුළත්ව ඇති බවද කීය.
ගම්පහ දිස්ත්‍රික්කයෙහි ආසාදිතයින්ගේ ළඟම ආශ්‍රිතයින් 4575 දෙනකු ස්වයං නිරෝධායනයට ලක් කිරීමට පියවර ගෙන ඇති අතර ඊයේ (29) දිනයේ පුද්ගලයින් 2517 දෙනකු පී.සී.ආර්. පරික්ෂණයට ලක්කොට ඇත.
කොරෝනා එන්නත දෙවැනි මාත්‍රාව ගම්හපට අද සිට
-තිලකරත්න දිසානායක-
කොරෝනා මර්දන ඔක්ෂ්ෆර්ඩ් ඇස්ටා සෙනෙකා එන්නතෙහි දෙවන මාත්‍රාව ගම්පහ දිස්ත්‍රික්කයෙහි සෞඛ්‍ය අංශවලට ලබාදීම අද (30) දින සිට ආරම්භ කරන බව දිස්ත්‍රික් සෞඛ්‍ය සේවා අධ්‍යක්ෂ විශේෂඥ වෛද්‍ය නලීන් ආරියරත්න පැවැසීය. මේ සඳහා එන්නත් 8000 ක් ලැබී ඇති බවත් මෙම එන්නත් රෝහල් කාර්ය මණ්ඩල, සෞඛ්‍ය වෛද්‍ය නිලධාරි කාර්යාලය කාර්ය මණ්ඩල, මහජන සෞඛ්‍ය පරික්ෂකවරුන් ඇතුළු අදාළ කාර්ය මණ්ඩල සඳහා ලබාදීමට කටයුතු යොදා ඇති බවත් අධ්‍යක්ෂවරයා සඳහන් කළේය. මෙහි පළමු මාත්‍රාව දිස්ත්‍රික්කයේ 2,50,000 ක පිරිසක් සඳහා ලබාදීම සිදු කොට ඇති බවත් එම සියලුම අයට මාස තුනක් අවසන් වීමට පෙර අදාළ එන්නත ලබා දීම සිදු කෙරෙන බවත් වෛද්‍ය නලීන් ආරියරත්න මහතා පැවැසීය.
තරු හෝටලයේ මහ කෝකියාටත් ලොක්කකුටත් කොරෝනා
මාතලේ ප්‍රධාන පෙළේ තරු පන්තියේ හෝටලයක ප්‍රධාන සුපවේදියාට සහ මානව සම්පත් ඒකකයේ නිලධාරියකුට කොරෝනා ආසාදනය වී ඇති බව මහජන සෞඛ්‍ය පරීක්ෂක නිලධාරිහු පවසති. මේ වන විට ඔවුන් ප්‍රතිකාර සඳහා යොමුකර ඇති බව මාතලේ මහ නගර සභාවේ මහජන සෞඛ්‍ය පරීක්ෂකවරු තහවුරු කළහ. කෙසේ වෙතත් නිසි සෞඛ්‍ය ක්‍රමවේද අනුගමනය කරමින් හෝටලයේ කටයුතු පවත්වාගෙන යන බවත් ඊයේ (29 වැනිදා) මංගල උත්සව ඇතුළු උත්සව කිහිපයක් පැවැත්වුණ බවද සෞඛ්‍ය නිලධාරියෙක් සඳහන් කළේය.
අතුරුගිරිය-කඩුවෙල වෙළඳුන්ට පී.සී.ආර්.
කඩුවෙල සෞඛ්‍ය වෛද්‍ය අධිකාරි කොට්ඨාසය ඇතුළත ආසාදිතයින් සංඛ්‍යාව ඉහළ යමින් පවතින අතර අතුරුගිරිය හා කඩුවෙල නගරාශ්‍රිතව වෙළෙඳ ප්‍රජාව පී.සී.ආර්. පරික්ෂණවලට ලක් කිරීමේ වැඩසටහන් කිහිපයක් ආරම්භ කළ බව එම කාර්යාලය පවසයි.
පසුගිය 27 වන බදාදා අතුරුගිරිය නගරයේ වෙළෙඳ ව්‍යාපාරිකයන් 250ක ගෙන් ලබාගන්නා ලද පී.සී.ආර්. පරික්ෂණවල ප්රතිඵල ලැබීමට නියමිතව ඇති අතර ලබන මැයි පළවන සෙනසුරාදා කඩුවෙල සති පොළ වෙළෙඳුන් පී.සී.ආර්. පරික්ෂණවලට යොමු කිරීමට සැලසුම් කර ඇතැයි ද සෞඛ්‍ය වෛද්‍ය නිලධාරී චන්දන පත්බේරිය මහතා පැවසීය. දැනට කඩුවෙල ග්‍රාම සේවා 56 අතරින් කිහිපයක වාර්තාවන කොරෝනා ආසාදිතයින් වැඩිවීමත් සමග අයි.ඩී.එච්. හා හෝමාගම රජයේ රෝහල්වල යැවීමට පියවර ගන්නා බව ද ඒ මහතා පැවසීය.
