ඉන්දියාවේදී ශ්‍රී ලාංකිකයන් හයදෙනෙකු සමග ඉන්දීය වෙරළ ආරක්ෂක බළකාය විසින් අත්අඩංගුවට ගත් හෙරොයින් කිලෝග්‍රෑම් 100කට ආසන්න ප්රමාණය ශ්‍රී ලංකාවට රැගෙන ඒමට උත්සාහ කළ මත්ද්‍රව්‍ය තොගයක් බවට තොරතුරු ලැබී ඇතැයි පොලිස් මූලස්ථානය සඳහන් කරයි.
මෙම යාත්‍රාවේ ඉන්ධන අවසන් වීමක් නිසා ඉන්දීය වෙරළාරක්ෂක බළකාය මගින් යම් අවස්ථාවක මෙම යාත්‍රාව නික්ෂණය කර සෝදිසි කිරීමේදී මෙම මත්ද්‍රව්‍ය තොගය සමග පිස්තෝල හයක්ද අත්අඩංගුවට ගෙන තිබෙන බවද පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ අජිත් රෝහණ මහතා සඳහන් කළේය.
මෙම හෙරොයින් තොගය සමග මීගමුව ප්‍රදේශයේ ලියාපදිංචි කළ ධීවර යාත්‍රාවක් අත්අඩංගුවට ගෙන තිබෙන බවත්, අත්අඩංගුවට ගත් සැකකරුවන් හයදෙනාගෙන් පස්දෙනෙකු මීගමුව ප්‍රදේශයේ පදිංචිකරුවන් වන අතර, ඔවුන් වයස අවුරුදු 64, 40, 42, 29, 25 යන වයසේ පසුවන්නන් බවත්, අනෙක් පුද්ගලයා මොරටුව ප්‍රදේශයේ පදිංචිකරුවෙකු බවත් ඔහු පවසා සිටියේය.
මෙම සිද්ධිය සම්බන්ධයෙන් විමර්ශනයක් ආරම්භ කර තිබෙන බවත්, මීට අමතරව යාත්‍රාවේ හිමිකරු සහ ඊට සහාය ලබාදුන් පිරිස් සොයා ගැනීමට විමර්ශනයක් ආරම්භ කර තිබෙන බවත් ඒ මහතා සඳහන් කළේය.
පොලිස් මත්ද්‍රව්‍ය නාශක කාර්යාංශය විසින් මෙම විමර්ශනය ආරම්භ කර තිබෙන බවත්, මෙම විමර්ශනයට අනුව මොවුන් ශ්‍රී ලංකාවෙන් පිටවී යෑම, ජාත්‍යන්තර මුහුදු සීමාවට ගමන් කිරීම ඇතුළු කරුණු මූලික කර ගනිමින් විමර්ශනය කිරීමට නියමිත බවත් හෙතෙම පවසා සිටියේය.
මෙම විමර්ශනය සඳහා ශ්‍රී ලංකා නාවික හමුදාවේ සහාය ලබා ගැනීමට කටයුතු කරන බවත්, පසුගිය සතියේදී පොලිස් විශේෂ කාර්ය බළකාය වැලිගම ප්‍රදේශයේදී කිලෝග්‍රෑම් 100කට ආසන්න ප්‍රමාණයක් අත්අඩංගුවට ගත් බවත්, එම හෙරොයින් තොගයද මුහුදු මාර්ගයෙන් රැගෙන ආ බවට වාර්තා වන බවත්, අදාළ තොගය සමග මෙම තොගය හා යම් සම්බන්ධයක් පවතින්නේද යන්න ගැන සොයා බලන බවත් අජිත් රෝහණ මහතා පවසා සිටියේය.
මේ අතර, ඉන්දියාවේ තූත්තුකුඩි සිට දකුණට වන්නට පිහිටි ගැඹුරු මුහුදේදී හෙරොයින් කිලෝග්‍රෑම් 100කට අධික මත්කුඩු හා වෙනත් මත්ද්‍රව්‍ය සමග යාත්‍රාවක සිටි ශ්‍රී ලාංකිකයන් 06දෙනෙකු ඉන්දියානු වෙරළාරක්ෂක බළකාය විසින් අත්අඩංගුවට ගෙන ඇතැයි ඉන්දීය මාධ්‍ය වාර්තා කළේය.
පසුගිය නොවැම්බර් 17 වැනිදා මෙම මෙහෙයුම ආරම්භ කර ඇති අතර, අත්අඩංගුවට ගත් සැකකරුවන් මේ වනවිට රඳවාගෙන ප්‍රශ්න කරමින් සිටින බව ඉන්දීය මාධ්‍ය වාර්තා කරයි.
සැකකරුවන්ගෙන් කළ මූලික ප්‍රශ්න කිරීම්වලදී හෙළිව ඇත්තේ පාකිස්තානයේ කරච්චි නුවර සිට පැමිණි පුද්ගලයෙකු ගැඹුරු මුහුදේදී මෙම මත්ද්‍රව්‍ය තොගය ශ්‍රී ලංකාවේ 'ෂෙනායා දුව” නමැති යාත්‍රාවට ලබාදුන් බවයි.
වෙරළාරක්ෂක නිලධාරීන් විසින් මෙම නෞකාවේ තිබී හෙරොයින් මත්කුඩු ඇතුළත් පැකට් 99ක්, කෘත්‍රිම මත්ද්‍රව්‍ය ඇතුළත් කුඩා පෙට්ටි20ක්, මි.මී.09 පිස්තෝල 05ක් සහ චන්ද්‍රිකා දුරකථන කට්ටලයක් සොයාගෙන තිබේ. මත්ද්‍රව්‍ය තොගය හිස් ඉන්ධන ටැංකියක සඟවා තිබී ඇත.
මෙම බෝට්ටුව ශ්‍රී ලංකාවේ මීගමුවේ පදිංචි අයෙකුට අයත් බවද හඳුනාගෙන තිබේ.
සැකකරුවන් තූත්තුකුඩි වරායට රැගෙන යෑමෙන් අනතුරුව ඔවුන්ගෙන් ඉන්දීය විමර්ශන කණ්ඩායම් කිහිපයකින් සැදුම්ලත් නිලධාරීන් පිරිසක් ප්‍රශ්න කරමින් පවතින බවද ඉන්දීය මාධ්‍ය වාර්තා කරයි.
"පාකිස්තානය ජිහාඩ් අන්තවාදය ව්‍යාප්ත කරනවා පමණක් නොවේ ත්‍රස්තවාදයට අවශ්‍ය අරමුදල් රැස් කිරීමට මත්ද්‍රව්‍ය පවා අපනයනය කරනවා" යැයි මෙම විමර්ශනයට එක්ව ඇති නිලධාරියෙකු සඳහන් කර තිබේ.
තමිල්නාඩුවේ මෙම මත්ද්‍රව්‍ය ලබාගත හැකි අය පිළිබඳ මෙන්ම මෙම මත්ද්‍රව්‍ය පාකිස්තානයේ කුමන ප්‍රදේශයක සිට පැමිණ ඇතිද යන්න පිළිබඳ ඉන්දීය මත්ද්‍රව්‍ය පාලන කාර්යාංශයේ නිලධාරීහු පරීක්ෂණ පවත්වමින් සිටිති.
මත්ද්‍රව්‍ය ජාවාරම්කරුවන් විසින් භාවිත කරනු ලබන ජාත්‍යන්තර සැපයුම් දාමයන් විසුරුවා හැරීමට එන්.සී.බී. කටයුතු කරන නමුත්, ඉන්දියාවේ භූගෝලීය පිහිටීම නිසා මෙය දුෂ්කර කාර්යයක් බවට පත්වන බව නිලධාරීහු පැවසූහ.
නවදිල්ලිය කොළඹ සහ මාලදිවයිනේ මාලේ සමග සමීපව කටයුතු කරමින්, මත්ද්‍රව්‍ය ජාවාරම පිළිබඳ තොරතුරු හුවමාරු කරගනිමින් පවතින අතර, 2019-20 කාලය තුළ පමණක් හෙරොයින් කිලෝග්‍රෑම් 1,500ක් පමණ අත්අඩංගුවට ගැනීමට ශ්‍රී ලංකාවට සහ මාලදිවයිනට එන්.සී.බී. විසින් සහාය දක්වා තිබෙන බවද ඉන්දීය මාධ්‍ය වැඩිදුරටත් වාර්තා කරයි.
- ඉන්දික හේවාවිතාරණ -
