රූමත් තරුණියකගේ සිරුර කළුගගේ ගෙල වැලලාගත් තරුණ ගුරුවරයකුගේ සිරුර නිවසේ

 

ලක්මි කුඩලිගම 

බුලත්සිංහල දිවලකඩ දෙනිකඩේ මාර්ගයේ ඉලුක්මණ්ඩිය ප්‍රදේශයට කළු ගඟ දිගේ පාවී ආ තරුණියකගේ මළසිරුරක් ඉංගිරිය පොලිසිය විසින් ඊයේ (6) සොයා ගනු ලැබීය.මළසිරුර මීට දින කිහිපයකට ඉහතදී අතුරුදන් වූ ඉංගිරිය රයිගම්වත්ත ඉහළ ප්‍රදේශයේ පදිංචි චන්ද්‍ර මෝගන් කාව්‍යා සුභාසිනි යන 20 හැවිරිදී රුමත් තරුණියගේ බවට ඇයගේ ඥාතීන් හඳුනාගෙන ඇත.

එමෙන්ම ඊයේ උදෑසත බුලත්සිංහල පොලිස් වසමේ හල්වතුර ප්‍රදේශයේ නිවසක් පිටුපස ගෙල වැලලාගෙන මියගිය පුද්ගලයකුගේ සිරුරක් සොයාගෙන ඇති අතර ඔහු තරුණිය සමග හාදකමක් පැවැත් වූ බවට සැක කරන බව බුලත්සිංහල සහ ඉංගිරිය පොලිසි පවසයි.බුලත්සිංහල පොලිස් වසමේ හල්වතුර ප්‍රදේශයේ පදිංචිව සිටි එම පුද්ගලයා 20 හැවිරිදි දමිළ පාසල් ගුරුවරයකු බව පැවසේ.

තරුණිය අතුරුදන් වීමෙන් පසු එම පුද්ගලයා ඉංගිරිය පොලිසියට කැඳවා ප්‍රශ්න කිරීමෙන් පසුව මුදා හැර ඇත. පසුව ඔහු බුලත්සිංහල මවගේ නිවසට පැමිණ නිවෙස පිටුපස ගබඩා කාමරයක ගෙලවැල ලාගෙන සියදිවි නසාගෙන ඇති බව පොලිසිය සඳහන් කරයි.තරුණියගේ සිරුර පශ්චාත් මරණ පරික්ෂණය සඳහා හොරණ දිස්ත්‍රික් රෝහලේ තැන්පත් කර ඇත. ඉංගිරිය පොලිස් ස්ථානාධිපති ප්‍රධාන පොලිස් පරීක්ෂක කේ.ඒ.එන්.ඩී කොල්ලුරේ 5 බුලත්සිංහල පොලිස් ස්ථානාධිපති ප්‍රධාන පොලිස් පරික්ෂක අයි.එස්.එන්. කස්තුරි ආරච්චි යන මහත්වරුන්ගේ උපදෙස් මත බුලත්සිංහල සහ ඉංගිරිය පොලිසි ඒකාබද්ධව වැඩිදුර විමර්ශන සිදුකරයි.

Read More

සමාජ මාධ්‍ය ක්‍රියාකාරීන් තිදෙනකුගෙන් කෝටි 425ක් වන්දි ඉල්ලයි

 

ඩිජිටල් හා මාර්ගගත (Online) ක්‍රමයට ණය ලබා දෙන මූල්‍ය ආයතනවලට ‘ෆේස්බුක්” සහ “වට්ස් ඇප්' මගින් මඩ ගැසුවේ යැයි කියන සමාජ මාධ්‍ය ක්‍රියාකාරීන් තිදෙනකුගෙන් රුපියල් මිලියන 4250 ක වන්දි අයකර දෙන්නැයි ඉල්ලා ඔන්ලයින් ණය දෙන සමාගම් පහක් අත්තනගල්ල දිසා අධිකරණයේ නඩු පැවරීය.ඩිජිටල් ඕල්ටනෙටිව් ලෙන්ඩින් ඇසෝසියේෂන් (DALA) සංගමයේ සමාගම් මගින් පැවරූ මෙම නඩුවල වගඋත්තරකරුවන් වශයෙන් වේයන්ගොඩ පදිංචි අගම්පොඩිගේ තිවංක චතුරංග ලක්ෂ්මන් හෙවත් ටුටු, ගම්පොළ පදිංචි තරින්ද බණ්ඩාර තිස්කුමාර හා මහව පදිංචි නිලන්ත කුමාර නමැත්තන් -නම් කර ඇත.

අත්තනගල්ල දිසා විනිසුරු කේසර සමරදිවාකර මහතා මෙම පැමිණිලි සලකා බැලීමෙන් පසුව ලබන 22 දින අධිකරණයේ කරුණු දක්වන ලෙසට ඞගඋත්තරකරුවන්ට නොතීසි නිකුත් කරමින් -නියෝග කළේය.DALA සංවිධානයේ වීබිස්නස් සොලූෂන්ස් (V Busines Solutions - CashX), ෆින්ටෙක් සොෆ්ට්වෙයාර් (Fintech Loanme), සෙෆර්සොලූෂන්ස් Software Solutions (Zephyr Solutions (Pvt) Ltd - Lotus Loan), ඔක්රෙඩිට් (Oncredit) සහ එස්.එෆ් .ගෲප් (SF Group-Fino'lk) මෙම නඩු පහ ගොනුකර ඇත.

පවත්නා නීතිවලට අනුගතව ක්‍රියාත්මක ඔන්ලයින් ණය ලබා දෙන සමාගම්වලට එරෙහිව ෆේස්බුක් හා වල්ඇප් සමාජ ජාලා ඔස්සේ සාවද්‍ය හා ද්වේෂ සහගත ප්‍රකාශ නිකුත් කරමින් සිදුකරන අපකීර්තියට එක් එක් විත්තිකරුගෙන් රුපියල් මිලියන 500ක් බැගින් සහ මෙතෙක් සිදු කළ හානි සඳහා රුපියල් මිලියන 350ක් බැගින් මෙම වන්දිය ඉල්ලා තිබේ.

සුදත් පෙරේරා නීතිඥ සමාගම මගින් පැවරූ පැමිණිලිවල මෙසේ ද සඳහන් වේ.විත්තිකරුවන් Facebook හා Whatsapp සමාජ ජාලා ඔස්සේ" ඔන්ලයින් මාෆියා නිසා අසාධාරණයට ලක්වුවන්" නමින් සංවිධානයක් පවත්වාගෙන යමින් ද්වේශ සහගත ප්‍රචාර සිදුකර ඇත.මෙරට නීතිරීතීන්ට අනුකූලව ව්‍යාපාර පවත්වාගෙන යන පැමිණිලිකරුවන් 2007 අංක 07 දරන සමාගම් පනතේ යටතේ ලියාපදිංචි ආයතනයක් මගින් ස්වයං- නියාමනයට ලක්වේ.

ඔන්ලයින් වේදිකාවන් ඔස්සේ ණය ලබාදීම ලෝකය පුරා ව්‍යාප්ත ප්‍රචලිත ක්ෂුද්‍ර මූල්‍ය ව්‍යාපාරයක් බව පෙන්වා දෙන පැමිණිලිකරුවන් පෝලන්තය, කසකස්ථානය, යුක්රේනය, චෙක් ජනරජය, රුමේනියාව, ස්පාඤ්ඤය, මෝල්ඩෝව, වියට්නාමය, පිලිපීනය, කෙන්යාව, ඉන්දියාව, මෙක්සිකෝව, නයිජීරියාව, කොලොම්බියාව හා දකුණු අප්‍රිකාව යන රටවල්වල ද ක්‍රියාත්මක වන බව පෙන්වා දෙයි. නීත්‍යානුකූල ව්‍යාපාරයන් සම්බන්ධයෙන් අපකීර්තිමත්, ද්වේෂ සහගත, සාවද්‍ය හා නීතිවිරෝධී ප්‍රකාශ සංවිධානාත්මකව බෙදාහැරීම වෙනුවෙන් විත්තිකරුවන්ට එරෙහිව තීන්දුවක් නිකුත් කරන ලෙස ඉල්ලා ඇති පැමිණිලිකරුවන්, මෙම නීතිවිරෝධී ක්‍රියාවන් තවදුරටත් සිදු කළහොත් විත්තිකරුවන්ට එරෙහිව තහනම් නියෝග ලබාගන්නා බවද පැමිණිලි මගින් සඳහන් කර ඇත. වැඩිදුර විභාගය ලබන 22 දින සිදු කිරීමට නියමිතය.

රෝෂන් තුෂාර

Read More

ගත වූ දවස් 10ට කොළඹ දිස්ත්‍රික්කයෙන් විතරක් කොරෝනා 3,840

මෙරටින් වාර්තා වූ කොරෝනා රෝගීන් අතුරින් ඉකුත් දින 13ක දී කොළඹ දිස්ත්‍රික්කයෙන් පමණක් ආසාදිතයන් 3,840  දෙනකු වාර්තා වී ඇතයි කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය ප්‍රකාශ කරයි.  ඉකුත් නොවැම්බර් මස 01 වැනිදා සිට ඊයේ (19) දක්වා අතර කාලය තුළදී  කොරෝනා රෝගීන් 6,785 දෙනකු මෙරටින් වාර්තා වී ඇති අතර ඉන් වැඩිම පිරිස වන 3,840ක ප්‍රමාණය කොළඹ දිස්ත්‍රික්කයෙන් හඳුනාගෙන ඇතැයි ද එම මධ්‍යස්ථානය සඳහන් කරයි.

එම කාලය තුළදී ගම්පහ දිස්ත්‍රික්කයෙන් වාර්තා වී ඇත්තේ ආසාදිතයන් 1,898 දෙනකු පමණක් වන අතර, කළුතර දිස්ත්‍රික්කයෙන් 330ක්, කෑගල්ල දිස්ත්‍රික්කයෙන් 147ක්, කුරුණෑගල දිස්ත්‍රික්කයෙන් 11දෙනකුද රත්නපුර දිස්ත්‍රික්කයෙන් 101ක්, ගාල්ල දිස්ත්‍රික්කයෙන් හා නුවර දිස්ත්‍රික්කයෙන් 75දෙනකු බැගින්ද වාර්තා වී ඇතැයි ද එම මධ්‍යස්ථානය පවසයි. ඉකුත් කාලය තුළදී මුලතිව් සහ කිලිනොච්චිය දිස්ත්‍රික්කවලින් කිසිදු රෝගියකු වාර්තා වී නැති අතර මන්නාරම දිස්ත්‍රික්කයෙන් වාර්තා වී ඇත්තේ එක රෝගියකු පමණක් බවද එම මධ්‍යස්ථානය කියයි.

නුවරඑළියෙන් 30 දෙනකුද, පුත්තලමෙන් 30 දෙනකුද, මඩකලපුවෙන් 26දෙනකුද, මාතරින්  22දෙනකුද, බදුල්ලෙන් 15දෙනකුද, වව්නියාවෙන් 12දෙනකුද, හම්බන්තොටින් 11දෙනකුද, අනුරාධපුරයෙන් 10දෙනකුද, මාතලෙන් 9දෙනකුද, මොනරාගලින් 7දෙනකුද, අම්පාරෙන් 6 දෙනකුද, ත්‍රිකුණාමලයෙන් 6දෙනකුද, පොළොන්නරුවෙන් 5දෙනකුද, යාපනයෙන් 4දෙනකුද වාර්තා වී ඇති බවද කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය පවසයි.

 (නිමන්ති රණසිංහ) 

Read More

පැය 24 දී සොයාගත් කොරෝනා රෝගීන් 541 න් 485ක්ම කොළඹ නගරයෙන්

කොළඹ දිස්ත්‍රික්කයෙන් ඊයේ (16) පෙරවරු 6න් අවසන් වූ පැය 24 තුළදී සොයාගත් කොරෝනා වයිරස ආසාදිත රෝගීන් 541 දෙනා අතුරින් කොරෝනා රෝගීන් 485 දෙනකුම වාර්තා වී ඇත්තේ කොළඹ මහ නගර සීමාවෙන් බව කොවිඩ් 19 පැතිරිම වැළැක්වීමේ ජාතික ක්‍රියාන්විත මධ්‍යස්ථානය පවසයි. කෝවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය නිකුත් කර ඇති නවතම වාර්තාව අනුව කොළඹ සෞඛ්‍යය වෙද්‍ය නිලධාරි කොට්ඨාස 15ක 372 දෙනකුද, දෙමටගොඩ ප්‍රදේශයෙන් 53 දෙනකුද, අගුලාන ප්‍රදේශයෙන් 29දෙනකුද, බ්ලූමැන්ඩල් ප්‍රදේශයෙන් 14දෙනකුද, මොරටුව ප්‍රදේශයෙන් 14දෙනකුද, කොම්පඤ්ඤවීදිය ප්‍රදේශයෙන්

10දෙනකුද, මාලිගාවත්ත ප්‍රදේශයෙන් 07දෙනකුද, කිඹුලාඇළ ප්‍රදේශයෙන්  6දෙනකුද, නාරාහේන්පිට ප්‍රදේශයෙන් 05දෙනකුද, ජම්පටා වීදිය ප්‍රදේශයෙන් 04දෙනකුද, අවිස්සාවේල්ල ප්‍රදේශයෙන් 03දෙනකුද වාර්තා වී ඇතැයි ද එම මධ්‍යස්ථානය පවසයි. බොරලැස්ගමුව, පිටිපන, කිරිවත්තුඩුව, කොළොන්නාව, වැල්ලම්පිටිය, මෝදර යන ප්‍රදේශවලින් ආසාදිතයන් දෙදෙනකු බැගින් සහ කොටිකාවත්ත, ඔරුගොඩවත්ත, රාජගිරිය, පිලියන්ද සහ ගල්කිස්ස යන ප්‍රදේශවලින් එක් ආසාදිතයකු බැගින් ඊයේ (06) පෙරවරුව වනවිට කොළඹ දිස්ත්‍රික්කයෙන් වාර්තා වී ඇති බව කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය පවසයි.

 -නිමත්ති රණසිංහ-

Read More

අවදානම නොතකා කොවිඩ් ආසාදිත සිසුවියන්ගේ විභාග රාජකාරි කල ගුරුවරුන් දෙදෙනා අැගයීමට

කොවිඩ් 19 වසංගතය හේතුවෙන් මිනුවන්ගොඩ සිට ත්‍රිකුණාමල නිරෝධායන මධ්‍යස්ථාන දෙකකට පැමිණි මෙවර අ.පො.ස (උ/පෙ) විභාගයට පෙනී සිටින සිසුවියන් තිදෙනෙකු වෙනුවෙන් ත්‍රිකුණාමලය සුමේධංකරපුර විද්‍යාලයීය තාවකාලික විභාග මධ්‍යස්ථානයක් ඇතිකර අවදානම නොතකා විභාග රාජකාරී වල යෙදුණු ගුරුවරියන් දෙදෙනා ඇගැයීමට ලක්කළ යුතු බව අධ්‍යාපන බලධාරීහු පවසති.

තාවකාලික විභාග මධ්‍යස්ථානයක් ඇතිකර එහි රාජකාරි සඳහා යෙදවීමට නිරික්ෂකයන් බහුතරයක් අකැමැත්ත ප්‍රකාශ කරද්දී ප්‍රධාන විභාග සම්බන්ධීකරණ නිලධාරි සහකාර අධ්‍යපන අධ්‍යක්ෂ (සැලසුම්) දුමින්ද පීරිස් මහතාගේ ඉල්ලීම මත මෙලෙස අවදානම නොතකා ඉදිරිපත් වූයේ ත්‍රිකුණාමලය උසස් බාලිකා විද්‍යාලයේ විදුහල්පතිනි එච්.ඒ.ඒ. සන්ධ්‍යා කාන්ති හා එම විද්‍යාලයේ ආචාර්ය ඩබ්.ඒ.එම්. සඳලතා සිල්වා යන මහත්මීන්ය.

මෙම සිසුවියන්ට මිනුවන්ගොඩ නාලන්දා මහා විද්‍යාලයේ හා ගම්පහ රත්නාවලී බාලිකා විද්‍යාලයේ විභාග මධ්‍යස්ථාන වලදී උසස් පෙළට පෙනී සිටීමට නොහැකිවීම නිසා මෙලෙස විභාග මධ්‍යස්ථානයක් තාවකාලිකව ස්ථාපිත කර තිබුණි. මෙහිදී එක් සිසුවියකට කොවිඩ් 19 ආසාදිත වී තිබියදී ආරක්ෂිත ඇදුම් පැළඳුම් ඇඳ දවස පුරා මෙම ගුරුවරියන් දෙදෙනා දැඩි ආයාසයකින් රාජකාරී කර තිබුණේ විභාග රාජකාරි පවා අයදුම් කර නොමැති අවස්ථාවක රටේ අවශ්‍යතාව සලකා ගෙනය.

මේ සම්බන්ධයෙන් අදහස් දැක්වූ විදුහල්පතිනි එච්.ඒ.ඒ. සන්ධ්‍යා කාන්ති මහත්මිය අවුරුදු ගානක් ඉගෙනගෙන උසස් පෙළ ලියන්න බැරිවුණා කිව්වොත් මොන අපරාධයක් ද ගුරුවරුන් විදිහට අපි දරුවන් මේ විභාගයට සුදානම් කරන්නේ දහසක් බලාපොරොත්තු තියාගෙන. මේ විභාග මධ්‍යස්ථානයේ රාජකාරි කරන්න කවුරුවත් ඉදිරිපත් නොවුණු අවස්ථාවකදී දුමින්ද පීරිස් මහතාගේ ඉල්ලීමට අනුව අවදානම නොතකා ඉදිරිපත් වුණා. විභාගය ලියු සිසුවියක් කොවිඩ් 19 ආසාධිතයෙක්ද වුණා. නමුත් අපි ඒ අවදානම දරාගෙන වැඩ කළා.

මේ සම්බන්ධයෙන් අදහස් දැක්වූ නැගෙනහිර පළාත් අධ්‍යාපන දෙපාර්තමේන්තුවේ සහකාර අධ්‍යාපන අධ්‍යක්ෂ (සැලසුම්) ප්‍රධාන විභාග සම්බන්ධීකරණ නිලධාරි දුමින්ද පීරිස් මහතා, අපිට මේ ඉල්ලීම එනවිට සූදානම් වෙන්න කාලයක් නොතිබුණත් මම ක්ෂණික ක්‍රියාමාර්ග ගත්තා. සීමිත විභාග ප්‍රශ්න පත්‍ර ගැටලුව තුළ ඒ ප්‍රශ්න පත්‍ර කළමනාකරණය කරගෙන විභාගය සුදානම් කර පවත්වාගෙන යනවා. අවදානම නොතකා මේ ගුරුවරියන් දෙදෙනා කළ කැපකිරීම අගය කළ යුතුයි. මෙහිදී විශේෂයෙන් කියන්න ඕන 221 බල සේනාධිපති බ්‍රිගේඩියර් ප්‍රියන්ත කාරියවසම් මහතා අපිට සෑහෙන්න උදව් කළා. මේ ළමයි විභාග මධ්‍යස්ථානයට ගේන්න නැවත ගෙනියන්න විභාග නිරික්ෂකවරු ගේන්න ගෙනියන්න අවශ්‍ය ප්‍රවාහන පහසුකම් දුන්නේ අවදානම නොතකා බව විශේෂයෙන් මතක් කරත්න ඕන යැයි කීය.

Read More

කොවිඩ් මර්දනයට පිළියමක් සොයාගන්නාතුරු රට වසා තැබිය නොහැකියි

 

කොවිඩ් වයිරසය මර්දනයට පිළියමක් සොයා ගන්නා තෙක් රට වසා තැබිය නොහැකි බව ජනාධිපති ගෝඨාභය රාජපක්ෂ මහතා ඊයේ (4) පැවැසීය. සෞඛ්‍ය උපදෙස් පිළිපදිමින් සියලු දෙනා දෙනික කටයුතු සාමාන්‍ය පරිදි පවත්වාගෙන යාමට සූදානම් විය යුතු යැයි ද ජනාධිපතිවරයා සඳහන් කළේය.

වයිරසය පාලනය සඳහා ඇඳිරිනීතිය තදින් ක්‍රියාත්මක කරන්නැයි ද ජනාධිපතිවරයා පොලිස්පතිවරයාට ඊයේ උපදෙස් දුන්නේය. ඇඳිරිනීතිය පැනවීමෙන් පමණක් ජනතාව හැසිරවීම අඛණ්ඩව කළ නොහැකි යැයි කී ජනාධිපතිවරයා ජන ජීවිතය, රටේ ආර්ථිකය සහ අන් සියලු පැතිකඩ සමබරව සැලකිල්ලට ගෙන ප්‍රබෝධයෙන් තීරණ ගත යුතු යැයි ද කීව්වේය. ජනාධිපතිවරයා මේ බව සඳහන් කළේ කොවිඩි මර්දනය සඳහා සැකැසුණු සුවෙන් සිටිමු' ඩිජිටල් වාපාපෘතිය ජනාධිපතිවරයාට හඳුන්වා දීම නිමිත්තෙන් ජනාධිපති කාර්යාලයේ ඊයේ පැවැති සාකච්ඡාවකදීය.

Read More

බස්නාහිරින් ඇවිත් කතරගම නැවතුණ 70ක් දින 14ක් නිරෝධායනයට

බස්නාහිර පළාතට ඇඳිරිනීතිය ප්‍රකාශ කිරීමත් සමග කතරගම ප්‍රදේශයට පිට ප්‍රදේශයන්හි සිට පැමිණ නවාතැන් ගෙන සිටි 70 දෙනකු පමණ දින 14 ක කාලයක් නිරෝධායනයට ලක්කර ඇති බව කතරගම සෞඛ්‍ය වෛද්‍ය නිලධාරී කාර්යාලය කියයි. මෙම පිරිස් කතරගම ප්‍රදේශයේ විශ්‍රාමශාලා තුළ සහ විවිධ සම්බන්ධතා ඇති නිවෙස් තුළ පසුවන බවට ලද තොරතුරු මත ඔවුන් සොයාගොස් එම ස්ථානයන්හිම නිරෝධායනයට ලක්කළ බවත්, එම පිරිස් කොළඹ, ගම්පහ වැනි ප්‍රදේශයන්හි පදිංචිකරුවන් බවට අනාවරණය වූ බවත් කතරගම පරිපාලන මහජන සෞඛ්‍ය පරික්ෂක සමන් දිසානායක මහතා පැවසීය.

මීට අමතරව විවිධ ප්‍රදේශයන් වෙත වෙළඳාම් කටයුතු සහ විවිධ අවශ්‍යතා සඳහා ගොස් පැමිණ ඇති සහ විවිධ පුද්ගලයින් ඇසුරු කළ 54 දෙනෙකු නිරෝධායන කාලසීමාව අවසන් කිරිමෙන් අනතුරුව කොන්දේසි මත නිදහස්කර ඇති බවද කීය. මෙම අවස්ථාව ඉතාම අවදානම් කාලපරිච්ඡේදයක් බැවින් තමන්, තම පවුලේ අය මෙන්ම ජනසමාජයද ආරක්ෂා කර ගැනීම සඳහා සෞඛ්‍ය උපදෙස් පිළිපදිමින් නිවසින් බැහැර ගමන් බිමන් අඩු කොට නිවසේම රැඳී සිටින ලෙසද ඒ මහතා කාරුණික ඉල්ලීමක් කරයි.

Read More

දොම්පේ රෝහලේ හෙදියන් දෙදෙනෙකුට කෝවිඩ් -19 ආසාදනය වෙයි

දොම්පේ දිස්ත්‍රික් රෝහල් හෙදියන් දෙදෙනෙකුට කෝවිඩි -19 රෝගය ආසාදනය වී ඇතැයි එම රෝහලේ ආරංචි මාර්ග සදහන් කරයි. එම රෝහලේ වෛද්‍යවරුන් දෙදෙනෙකු හා හෙද කාර්යමණ්ඩලයේ 10දෙනකු පී.සී.ආර්. පරික්ෂණයට යොමු කිමෙන් අනතුරුව එම වාර්තාවලට අනුව ඔවුන්ගෙන් මෙම හෙදියන් දෙදෙනාට රෝගය ආසාදනය වී ඇති බව අනාවරණය වූයේ යැයි රෝහලේ ප්‍රධාන වෛද්‍ය තිලධාරී අරලිය පෙරේරා මහතා පැවසුවේය. මෙම තත්වය මත රෝහලේ සාමාන්‍ය ප්‍රතිකාර කටයුතු කිරීමේදී කාර්ය මණ්ඩල පුරප්පාඩු පවතින බවද ඒ මහතා සදහන් කළේය.

-උපාලී රණවීර - 

Read More

කහතුඩුව මාළු කඩ 6ක් වසයි - ව්‍යාපාරිකයකුට කොරෝනා

කහතුඩුව මිනුවන්විල පාරේ මාළු ව්‍යාපාරිකයකුට කොරෝනා වයිරසය ආසාදිත බවට අනාවරණය වූ බව කහතුඩුව සෞඛ්‍ය වෛද්‍ය නිලධාරි කාර්යාලය කියයි. මේ හේතුවෙන් ඔහුගේ සමීපතමයන් අටදෙනකු ස්වයං නිරෝධායනයට ලක්කළ අතර  වෙළෙඳසල් හයක් වසා දැමීමට ඊයේ (25) පියවර ගැනිණි.කහතුඩුව නගරයේ ආපනශාලා ඇතුළු වෙළඳසල් පහක් සහ පිළියන්දල නගරයේ ජංගම දුරකතන අලෙවිසලක් මේ අතර වන බව සෞඛ්‍ය වෛද්‍ය නිලධාරි කාර්යාලයේ ප්‍රකාශකයෙක් පැවැසීය.

පිළියන්දල ජංගම දුරකතන අලෙවිසලට ව්‍යාපාරිකයා බිරිය හා දරුවන් සමග ද ගොස් තිබූ බව අනාවරණය වූ බව එම ප්‍රකාශකයා කීය. පෑලියගොඩ මත්ස්‍ය වෙළෙඳපොළ ඉකුත් 21  වැනිදා වසා දැමීමට පෙර මෙම මාළු ව්‍යාපාරිකයා දිනපතාම මාළු මිලදී ගැනීම සඳහා මත්ස්‍ය වෙළෙඳපොළට ගොස් තිබූ බවට අනාවරණය වූ බව සෞඛ්‍ය වෛද්‍ය නිලධාරි කාර්යාලය කියයි.   මාළු ව්‍යාපාරිකයා ඉකුත් 22 වැනිදා පිළියන්දල සෞඛ්‍ය වෛද්‍ය නිලධාරි කාර්යාලය මගින් සිදුකළ පී.සී. ආර්. පරික්ෂණයට භාජන වීමෙන් අනතුරුව ඔහු ආසාදිතයකු බවට වෛද්‍ය වාර්තාවලින් පෙරේදා (24) රාත්‍රී අනාවරණය වූ බව එම කාර්යාලය පවසයි.

මේ වනවිට එම ආසාදිත ව්‍යාපාරිකයා සමග සමීපව ඇසුරු කළ පවුලේ සහ අනෙකුත් ඥාතීන් අටදෙනකු හඳුනාගත් බවත් ඔවුන් සියලු දෙනාටම නිවෙස්වලට වී ස්වයං නිරෝධායනයේ යෙදෙන ලෙස උපදෙස් දී ඇත. ඔවුන් පී.සී.ආර්. පරික්ෂණවලට භාජන කිරීමට  කටයුතු කරන බව ද කහතුඩුව සෞඛ්‍ය වෛද්‍ය නිලධාරි වෛද්‍ය ධනුක පද්මරාජ මහතා පැවැසීය.

-බිමල් ශ්‍යාමන් ජයසිංහ-

Read More

රත්ගම වැල්ලේ පී.සී.ආර්. කරද්දී නිලධාරීන් කුණුහරුපයේන් බැනලා

ගාල්ල කොටුව බාලදක්ෂ මාවතේ රත්ගම වැල්ලේ ධීවරයගේ පී.සී.ආර්. පරික්ෂණ සඳහා ෙෙජව සාම්පල ලබාගනිමින් සිටි සෞඛ්‍ය කාර්ය මණ්ඩල නිලධාරින්ට සහ මහජන සෞඛ්‍ය පරීක්ෂකවරයාට අසභ්‍ය වචනයෙන් බැන වැදී පී.සී.ආර්. පරික්ෂණයට විරෝධය පළ කරන ලද ධීවරයකු  (24) දහවල් අත්අඩංගුවට ගත් බව ගාල්ල පොලිසිය පවසයි. මෙසේ අත්අඩංගුවට ගෙන ඇත්තේ ගාල්ල වක්වැල්ල පාර පදිංචි 60 හැවිරිදි ධීවරයෙකි. ගාල්ල නගර සභාව විසින් බෝපේ පෝද්දල ප්‍රාදේශීය සභාවේ සෞඛ්‍ය වෛද්‍ය නිලධාරි කාර්යාලයේ කාර්ය මණ්ඩලයේ ද සහාය ඇතිව ගාල්ල ධීවර වරාය ජාෙතාටුවැල්ල සහ රත්ගම වැල්ල යන ස්ථානවල ධීවරයන්ගේ පී.සී.ආර්. පරික්ෂණ සිදු කරන ලදී.

මහජන සෞඛ්‍ය පරික්ෂක විරන්ත ගුරුගේ මහතා රත්ගමවැල්ලේ ධිවරයන්ගේ පී.සී.ආර්. පරික්ෂණ කටයුතු කරමින් සිටියදී එතැනට පැමිණ ඇති සැකකරු එයට විරෝධය පළ කරමින් අසභ්‍ය වචනයෙන් බැන වැදී ඇත.  සිද්ධිය පොලිසියට දැනුම් දීමෙන් අනතුරුව ජංගම මුර සංචාරයේ යෙදී සිටි උපපොලිස් පරික්ෂක ප්‍රියන්ත, සැරයන් සිරිනිමල්  (22881 ) කොස්තාපල් සුනිත්  46181  සිවිල් ආරක්ෂක නිලන්ත (13476) යන මහත්වරුන් පැමිණි සැකකරු අත්අඩංගුවට ගෙන ඇත.

-බි.ජී.සුගතපාල-

Read More

මාතර ප්‍රසිද්ධ වෛද්‍යවරයකුගේ වෛද්‍ය බිරියටත් කොරෝනා

මාතර නගරයේ ප්‍රසිද්ධ වෛද්‍යවරයකුගේ බිරියටද කොරෝනා වයිරසය ආසාදනය වී ඇති බව පී.සී. ආර්. පරික්ෂණයේ දී පෙරේදා තහවුරු වූ බව සෞඛ්‍ය අංශ පවසයි. ඇයද මාතර ප්‍රදේශයේ ප්‍රසිද්ධ වෛද්‍යවරියකි.  එම වෛද්‍යවරයාගේ මතුගම පදිංචි නැගණියක් කොරෝනා ආසාදිත තැනැත්තියක බව මීට පෙර හදුනා ගනු ලැබ සිටියාය. එම නැඟණිය අනුරාධපුරයේ වට වන්දනාවක ගොස් පැමිණි පසු එම වන්දනා බසයේ මතුගම පදිංචි රියැදුරු හා කොන්දොස්තරට ද කොරෝනා ආසාදනය වී තිබේ.  ආසාදිත නැගණිය ඉකුත් 10 වැනි දින වෛද්‍යවරයාගේ නිවසට පැමිණ ඉකුත් 14 වැනි දින මතුගම නිවසට පිටත්ව ගොස් ඇත.

ඇයට කොරෝනා ආසාදනය වීමෙන් පසුව වෛද්‍යවරයා ඔහුගේ බිරිය හා ෙස්විකාව ඒ  මොහොතේ දීම ස්වයං නිරෝධායනයට යොමු කරනු ලැබුහ. ඊට අමතරව වෛද්‍යවරයාගෙන් බෙහෙත් ගැනීමට පැමිණි දරු පවුල් කිහිපයක් ද සිය නිවාසවල ස්වයං නීරෝධායනයට යොමු කරනු  ලැබූහ. ඒ අතර ගන්දර පොලීසියේ සැරයන්වරයකු ඇතුළු ඔහුගේ පවුලේ සාමාජිකයෝ ද වෙති.

උයන්වත්ත පවුල් කිහිපයකට අමතරව කාලිදාස පාරේ බෙහෙත් ගැනීමට පැමිණි පවුලක් ද ස්වයං නිරෝධායනයට ලක් කර ඇත. වෛද්‍යවරයාගේ නිවසේ සිට කිතුලේවෙල ප්‍රදේශයේ පන්සලකට දානය රැගෙන යාමට පැමිණි අයකු හා ත්‍රී රෝද රථයේ රියැදුරු ද ස්වයං නීරෝධායනයට යොමු කර තිබේ.‍

මෙම වෛද්‍යවරයාගේ පී.සී.ආර්. වාර්තාව  මෙතෙක් ලැබී නොමැති අතර ඔහුගෙන් හා ඔහුගේ වෛද්‍ය බිරියගෙන් පසුගිය 10 වැනිදා සිට ප්‍රතිකාර ලබා ගත් අය සෞඛ්‍ය අංශ සමග සම්බන්ධ වී අවශ්‍ය ක්‍රියා මාර්ග ගන්නා ලෙසට පොලීසිය ඉල්ලීමක් කරයි. එම සිද්ධියට අදාළව දැතට ස්වයං නීරෝධායනයට යොමු කර සිටින ආශ්‍රිතයගේ  පී.සී.ආර්. සාම්පල ලබා ගැනීමට නියමිතව තිබිණි.

Read More

අංගොඩ ලොක්කාගේ මරණය හෘදයාබාධයකින් සිදු වූ ස්වභාවික මරණයක්

මෙට සංවිධානාත්මක අපරාධ කල්ලි සාමාජිකයකු මෙන්ම මහා පරිමාණ මත්කුඩු ජාවාරම්කරුවකු වන ඉන්දියාවේ දී මියගිය මද්දුමගේ ලසන්ත පෙරේරා හෙවත් අංගොඩ ලොක්කාගේ මරණය හෘදයාබාධයක් හේතුවෙන් සිදුවු ස්වභාවික මරණයක් බව කොලොම්බුතුර් මධ්‍යම අපරාධ පරික්ෂණ කාර්යාංශයේ නිලධාරියකු උපුටා දක්වමින්ද හින්දු පුවත්පත පෙරේදා (16) වාර්තා කර තිබිණි.  මෙම මරණය විෂ ශරීරගතවීමක් හෝ සැකකටයුතු හේතුවක් මත සිදු වූවක් නොවන බවත් විෂක් හෝ වෙනත් කිසිදු සැකකටයුතු දෙයක් පිළිබඳව පශ්චාත් මරණ පරික්ෂණයේදී අනාවරණය නොවූ බවත් පශ්චාත් මරණ පරීක්ෂණය සහ පොලිස් වාර්තා පදනම් කරගෙන ද හින්දු පුවත්පත සඳහන් කර ඇත.

පසුගිය ජුනි මස 03 වනදා මධුරෙයි රෝහලක දී මියගිය බවට වාර්තා වූ අංගොඩ ලොක්කාගේ මරණය විෂ ශරීරගත වීමකින් සිදුවූවක් බවට විවිධ වාර්තා පළවී තිබිණි. දැනට සිදුකර ඇති පරීක්ෂණ අනුව අංගොඩ ලොක්කාගේ මරණය ස්වාභාවික එකක් බවට නිගමනය කළ හැකි බව ඉන්දීය මධ්‍යම අපරාධ කාර්යංශය සඳහන් කරන බවද හින්දු පුවත්පත් වාර්තාවේ සඳහන් වේ. අංගොඩ ලොක්කා ඉන්දියාවට පලාගොස් ප්‍රදීප් සිං නමැති ව්‍යාජ නමින් ව්‍යාජ ලියකියවිලි  භාවිත කරමින් වසර දෙකක පමණ කාලයක සිට කොයිම්බුතූර් හි බාලාජි නගර් හි කුලී  නිවසක වාසය කර ඇත.

ඉකුත් ජුනි මස 03 වැනි දින හෘදයාබාධයක්  හේතුවෙන් ඔහු කොයිම්බුතුර් ප්‍රදේශයේ වෛද්‍ය විද්‍යාල රෝහලකට ඇතුළත් කිරිමෙන් පසුව එහිදී මියගොස් ඇති බවට ද හින්දු පුවත්පත මීට පෙර වාරිතා කර තිබිණි. ඔහු සමග එම කුලී නිවසේ ජීවත් වූ අමානි සහන්ජි නමැති ශ්‍රී ලාංකික කාන්තාවක අසල්වාසීන් දෙදෙනෙකුගේ සහාය ඇතිව ඔහු රෝහලට ගෙන ගිය බවද එම වාර්තාවේ සඳහන් වේ.

-ඉන්දිකා රාමනායක-

Read More

මියගිය බිලිඳියකගේ සිරුරක් කාක දූපත වෙරළෙන් හමුවෙයි

මුහුදින් ගොඩට ගසාගෙන ආ මියගිය බිලිඳියකගේ  සිරුරක් මට්ටක්කුලිය කාක දූපත වෙරළ තීරයෙන් ඉකුත් 14  වැනිදා සොයාගත් බව කාක දූපත පොලිස් මුරපොලේ ස්ථානාධිපති උපපොලිස් පරික්ෂක ආනන්ද පත්මකුමාර මහතා පැවසීය.  පොලිස් නිලධාරීන් වෙරළ තීරයේ සංචාරය කරන විට මළ සිරුර හමුවී තිබේ. දින දෙකක් පමණ වයස ඇති යැයි සැකකරන මෙම මළ සිරුර බෙහෙවින් ඉදිමී තිබූ බවත් ශරීරයේ  කොටස් සතුන් විසින් කා දමා ඇති බවත් පොලිසිය කියයි.  මෙම ස්ථානයට පැමිණි කොළඹ 12, අලුත්කඩේ අධිකරණයේ වැඩ බලන මහේස්ත්‍රාත් සංජීව ඇන්තනී මහතා පරීක්ෂණ කටයුතු සිදුකරමින් මෙහි පශ්චාත් මරණ පරීක්ෂණය සඳහා පොලිස් මෘත ශරීරාගාරය වෙත යවන  ලෙස පොලිසියට නියෝග කළේය.

මට්ටක්කුලිය පොලිසියේ ස්ථානාධිපති පොලිස් පරික්ෂක බණ්ඩාර දෙවටගෙදර මහතාගේ උපදෙස් මත අපරාධ අංශයේ ස්ථානාධිපති උපපොලිස් පරික්ෂක ප්‍රනාන්දු මහතා ඇතුළු නිලධාරීහු මේ පිළිබඳව විමර්ශන කටයුතු සිදුකරති.

-සී.ඉග්නේෂස් ඇන්තනී-

Read More

නාගලගන්වීදියෙන් 'පෙති' ඇල්ලීම ගැන ඖෂධ අධිකාරියෙන් පරීක්ෂණයක්

මත්ලෝලීන්ට අලෙවි කිරීම සඳහා ලොරි රථයකින් ප්‍රවාහනය කරමින් තිබූ රුපියල් ලක්ෂ 45ක පමණ වටිනාකමින් යුත් ප්‍රබල වේදනා නාශක පෙති 18,000ක තොගයක් මෝදර පොලිසිය විසින් ඉකුත්‍ 7 වැනිදා නාගලගන් විදියේදී සැකකරුවන් තිදෙනකු ද සමග අත්අඩංගුවට ගනු ලැබීමේ සිද්ධිය සම්බන්ධයෙන් ජාතික ඖෂධ නියාමන අධිකාරිය විශේෂ පරීක්ෂණයක් ආරම්භ කර  ඇත. මෙරට ලියාපදිංචි ප්‍රබල වේදනා නාශක ඖෂධයක පෙති 18,900ක තොගයක් මත් පෙත්තක් වශයෙන් සැකකරුවන් අතට පත්වූයේ කෙසේ ද යන්න හෙළි කරගැනීම සඳහා මෙම පරීක්ෂණය ආරම්භ කර ඇත.  මෙම පෙති, මත් පෙති වර්ගයක් නොවන බවත් පිළිකා රෝගීන් සහ ශල්‍යකර්ම සිදුකළ රෝගීන් වෙනුවෙන් ලබාදෙන ප්‍රබල වේදනා නාශක ඖශධයක් බවත් අධිකාරිය සඳහන් කරයි. 

මේ දිනවල දිගින් දිගටම සිදුවන මත්ද්‍රව්‍ය වැටලීම් හේතුවෙන් මත්කුඩුවල හිගයක් ඇති බවත් මත්කුඩු නොමැතිව අසහනයෙන් සිටින මත්ලෝලීන්ට එක් පෙත්තක් රුපියල් 250ක මුදලකට අලෙවි කිරීම සඳහා සැකකරුවන් මේවා කොළඹ අවට ප්‍රදේශ වෙත අලෙවි කිරීම සඳහා රැගෙනවිත් ඇති බවත් සඳහන් වේ. ජාතික ඖෂධ නියාමන අධිකාරියේ ප්‍රධාන ආහාර හා ඖෂධ පරීක්ෂක අමිත් පෙරේරා මහතාගේ මෙහෙයවීමෙන් මෙම පරික්ෂණ ආරම්භ කර ඇත.

-ඉන්දිකා රාමනායක-

Read More

මන්නාරම් දුම්රිය පොළ තහනම් කලාපයක්

කන්දකාඩු නිරෝධායන මධ්‍යස්ථානයෙන් පලාගිය කොරෝනා ආසාදිතයකු විය හැකි බවට සැක කරන පුද්ගලයකු පෙරේදා (12)  සවස මන්නාරම දුම්රිය ස්ථානයේදී යුද හමුදා නිලධාරීන්ට හසුවීමෙන් පසුව එදින සවස 6.00 සිට එම දුම්රිය ස්ථානය තාවකාලිකව වසා දැමීමට දුම්රිය දෙපාර්තමේන්තුව පියවර ගෙන තිබේ. මන්නාරම දුම්රිය ස්ථානය හා ඒ අවට ප්‍රදේශය දැඩි ආරක්ෂිත කලාපයක් බවට ඒ අවස්ථාවේ සිට පත්කර, දුම්රිය ස්ථානයේ කිසිදු දුම්රියක් නොනැවැත්වීමට ද පියවර ගෙන ඇත. දුම්රිය ගමනාගමන අධිකාරිවරයාගේ උපදෙස් මත මෙම පියවර ගෙන තිබෙන අතර මේ නිසා මගීන් පත්වන අපහසුතාව වැළැක්වීමට මන්නාරම දුම්රිය ස්ථානයට දෙපසින් පිහිටි තිරුකේතීශ්වරම් හා කෝඩඩවේලි උප දුම්රිය ස්ථානවලින් මගීන්ට දුම්රියට ගොඩවීමට හා දුම්රියෙන් පැමිණෙන මගීන්ට බැස යෑමට අවස්ථාව සලසා ඇතැයි මන්නාරම දුම්රිය ස්ථානාධිපති එච්.පී.එම්.එස්. ගුණවර්ධන මහතා පැවැසීය.

පිටරටක සිට පැමිණ කන්දකාඩු නිරෝධායන මධ්‍යස්ථානයේ නිරෝධායනය වෙමින් සිටි හලාවත ප්‍රදේශයේ පදිංචිකරුවකු බව කියන 36 හැවිරිදි මේ තැනැත්තා එම නිරෝධායන මධ්‍යස්ථානයෙන් පලාගොස් ඇත්තේ පෙරේදා (12) උදෑසන බව පැවැසේ. මොහු පලා ගිය බව දැනගත් අවස්ථාවේ සිට ඔහු සොයා අත්ලඩංගුවට ගැනීමට යුද හමුදාව ඇතුළු ආරක්ෂක අංශ ක්‍රියාත්මක වී තිබිණි.  ඒ අතරතුර පෙරේදා (12) සවස 5.00ට පමණ මන්නාරම  දුම්රිය ස්ථානය අසල පිහිටි දුම්රිය ස්ථානාධිපතිවරයාගේ නිල නිවෙසට යාබද ඉඩමේ කැලෑව ඇතුළත සැඟවී සිටි පුද්ගලයකු දුම්රිය ස්ථානයේ සේවකයන්ට සහ එම ස්ථානයේ ආරක්ෂාවට සිටි යුද හමුදා නිලධාරින්ට හසුවී ඇත.  හොරකු යැයි සිතා සැකකර දුම්රිය ස්ථානයට රැගෙන ආ එම පුද්ගලයාගෙන් ප්‍රශ්න කිරීමේදී කන්දකාඩු නිරෝධායන මධ්‍යස්ථානයෙන් පලාගිය පුද්ගලයා මේ තැනැත්තා බවට අනාවරණය වී තිබේ.

ඒ අනුව වහා ක්‍රියාත්මක වූ මන්නාරම දුම්රිය ස්ථානාධිපති ගුණවර්ධන මහතා සහ යුද හමුදා නිලධාරීන් අදාළ අංශවල උසස් නිලධාරින්ට මේ ගැන දැනුම් දී ගත යුතු කඩිනම් ඉදිරි ක්‍රියාමාර්ග ගැන උපදෙස් ලබාගෙන ඇත. මන්නාරම දුම්රිය ස්ථානය කඩිනමින් වසා දැමීමට කටයුතු කර ඇත්තේ ඒ අනුවය.  යුද හමුදාව මගින් කළ දැනුම් දීම මත පෙරේදා (12) රාත්‍රී 10.00ට පමණ කන්දකාඩු නිරෝධායන මධ්‍යස්ථානයෙන් පැමිණි නිලධාරින් කණ්ඩායමක් සෞඛ්‍ය ආරක්ෂක විධිවිධාන පිළිපදිමින් එතෙක් යුද හමුදාව බාරයේ සිටි එම පුද්ගලයා නිරෝධායන මධ්‍යස්ථානය වෙත යළි රැගෙන ගොස් තිබිණි.  දැනට අනාවරණය වී ඇති අන්දමට කන්දකාඩු නිරෝධායන  මධ්‍යස්ථානයෙන් පලාගිය මෙම පුද්ගලයා බස් රථවල නැගී මන්නාරමට පැමිණ මන්නාරම බස් නැවතුම්පොළේ සිට දුම්රිය ස්ථානයට පැමිණ ඇත්තේ ත්‍රිරෝද රථයකිනි.

ඊයේ (13) එම පුද්ගලයා පී.සී.ආර්. පරික්ෂණයකට ලක්කිරීමට නියමිතව තිබූ බව දැනගැනීමට ලැබුණි. යම්  හෙයකින් එම පරික්ෂණයේදී ඔහු කොරෝනා ආසාදිතයකු බව තහවුරු වුවහොත් ගැටලුකාරි තත්වයක් උද්ගත විය හැකි බව පැවැසේ. මේ අතර මන්නාරම දුම්රිය ස්ථානාධිපතිවරයා හා ඒ අවස්ථාවේ එහි සේවය කැළ දුම්රිය කාර්ය සහායකයන් දෙදෙනා දුම්රිය ස්ථානය තුළත්, යුද හමුදා නිලධාරි ඔවුන්ගේ හමුදා කඳවුර තුළත් ස්වයං  නිරෝධායනයට ප්‍රදේශයේ සෞඛ්‍ය බලධාරීන් විසින් යොමුකරනු ලැබ සිටිති.  ප්‍රදේශයේ සෞඛ්‍ය අංශ විසින් ඊයේ (13) පෙරවරුවේ මන්නාරම දුම්රිය ස්ථානය විෂබීජ හරණය කිරිම සඳහා පියවර ගෙන තිබිණි.  මේ වනවිට දුම්රිය ස්ථානය තුළ ස්වයං නිරෝධායනයක යෙදෙන මන්නාරම දුම්රිය ස්ථානාධිපතිවරයා සහ සේවකයන් දෙදෙනා අද (14) පී.සී.ආර්. පරික්ෂණයකට ලක් කිරිමට නියමිතය.

Read More

මාධ්‍යවේදී ෂැකී ජබාර් අබිරහස් ලෙස මියගිහින්

දි අයිලන්ඩ් පුවත්පතේ නියෝජ්‍ය ප්‍රවෘත්ති කතෘවරයකු වශයෙන් සේවය කළ ජ්‍යෙෂඨ මාධ්‍යවේදියකු වූ ෂැකී ජබාර් (60) මහතා සිය නිවසේ අභිරහස් ලෙස මියගොස් සිටියදී පෙරේදා (9) රාත්‍රියේ මළ සිරුර සොයාගෙන ඇත. බත්තරමුල්ල පැලවත්ත, පීරිස් මාවතේ පිහිටි නිවසේ ෂැකී ජබාර් මහතා තනිවම ජීවත්වී ඇති අතර දින 20 ක පමණ කාලයක සිට ඔහු සම්බන්ධයෙන් කිසිදු තොරතුරක් නැතිව තිබූ බවද සඳහන් වේ. ඔහු නිවස තුළ මියගොස් ඇති බවට මළ සිරුර සොයා ගන්නා තෙක්ම කිසිවකු දැනසිට නොමැති බව තලංගම පොලිසිය  පවසයි. මීට සතියකට පමණ පෙර ඔහු මිය යක්නට ඇති බවට සැකකරන බවත් නිවෙසේ සියලු දොර ජනෙල් වසා තිබීම නිසා මළ සිරුරේ දුඟඳ පිටතට පැතිරි  නොමැති බවත් පොලිසිය පවසයි. මීට සතියකට පමණ පෙර ඔහු මිය යන්නට ඇති බවට සැකකරන බවත් නිවෙසේ සියලු දොර ජනෙල් වසා තිබීම නිසා මළ සිරුරේ දුගඳ පිටතට පැතිරි නොමැති බවත් පොලිසිය පවසයි.

ෂැකී ජබාර් මහතා අවිවාහකයකු වන අතර ඔහුගේ සොහොයුරාට අයත් නිවසේ ජබාර් මහතා තනිවම ජීවත් වී ඇති බවද පොලිසිය පවසයි. මැකී ජබාර් මහතා ඉකුත් අගෝස්තු 19 වැනි දින අවසන්වරට අන්තර්ජාලයේ සිට ඇති අතර ඉන් පසුව පෙරේදා  වනතෙක්ම ඔහු සම්බන්ධයෙන් කිසිදු  තොරතුරක් අනාවරණය වී නොමැත.  දින කිහිපයක් කාර්යාලයට නොපැමිණි හේතුවෙන් කාර්යාලයෙන් ඔහුගේ ජංගම දුරකතනයට ඇමතුම් ලබා ගත්ත ද එයද ක්‍රියා විරහිත වී තිබීමෙන් සම්බන්ධතා නතර වී ඇත.  ඔහු පිළිබඳ තොරතුරක් නොවූ හෙයින් කාර්යාලයේ සහෝදර මාධ්‍යවේදීන් මීට දින තුනකට පෙර ඔහු සොයා පැලවත්තේ නිවසට ගියද නිවසේ දොරගුළු වසා තබා තිබීම හේතුවෙන් ඔහු නිවසේ නොමැති බවට සිතා ඔවුහු පිටව ගොස් ඇත්තාහ. 

පසුව ඔහුගේ වැඩිමහල් සහෝදරයාට සිද්ධිය දැන්වීමෙන් පසු ඔහු ද සොහොයුරා පිළිබඳ සොයා බැලුවද කිසිදු තොරතුරක් අනාවරණ වී නොමැත.  සොහොයුරා ජබාර් මහතා පෙරේදා රාත්‍රියේ පදිංචිව සිටි පැලවත්ත නිවසට පැමිණ සෝදිසි කර නිවසේ ජනේලයක් කඩා නිවසට ඇතුලු වී ඇති බව පොලිසිය කියයි.  ෂැකී ජබාර් මහතා නිවසේ නාන කාමරය අසල වැටී සිටින අයුරු නිවසට ඇතුළු  වූ සොහොයුරාට දැකගත හැකිව ඇති අතර ඔහුගේ මළ සිරුර තුළින් දුගඳ වහනය  වෙමින් තිබී ඇත. පසුව සොහොයුරා සිද්ධිය තලංගම පොලිසියට දැනුම් දුන් පසුව තලංගම පොලිස් ස්ථානාධිපති ප්‍රධාන පොලිස් පරික්ෂක නලින්ද දිල්රුක් මහතා ඇතුලු පොලිස් කණ්ඩායමක් එම ස්ථානයට පැමිණ  පරික්ෂණ ආරම්භ කර තිබිණි.

මළ සිරුරේ කිසිදු බාහිර තුවාලයක් දක්නට නොලැබුණ බව පවසන පොලිසිය කිසියම් රෝගී තත්වයක් උත්සන්න වීමෙන් මරණය සිදුවන්නට ඇතැයි සැක කළ හැකි බවද පොලිසිය කියයි.  නිවසේ කිසිවක් ඇද දමා නොමැති බවත්, කිසිවකු නිවසට ඇතුළු වූ බවට කිසිදු සඳහන් නොමැති බවද පොලිසිය පවසයි. මියයන අවස්ථාවේ ඔහු නිවසේ දොරගුලු දමාගෙන සිට ඇති බවද පොලිසිය කියයි.  මියගිය අයගේ මරණය සම්බන්ධයෙන්  මූලික මහේස්ත්‍රාත් පරික්ෂණය ඊයේ පස්වරුවේ කඩුවෙල මහේස්ත්‍රාත්වරයා  විසින් පැවැත්වීමට නියමිතව තිබුණි. මූලික මහේස්ත්‍රාත් පරික්ෂණයෙන් අනතුරුව මහේස්ත්‍රාත්වරයාගේ නියෝගය පරිදි මළ සිරුර සම්බන්ධයෙන් පශ්චාත් මරණ පරික්ෂණය පැවැත්වීමටද නියමිතව වසර 30 ට අධික කාලයක් දි අයිලන්ඩ්  පුවත්පතේ සේවය කළ ජ්‍යෙෂ්ඨ  මාධ්‍යවේදියකු වූ ෂැකී ජබාර් මහතා ව්‍යාපාරික, පාර්ලිමේන්තු, අධිකරණ යන ක්ෂේත්‍රවල ප්‍රවෘත්ති සම්පාදනයේ යෙදී  සිටියේය.  තලංගම පොලිසිය සිද්ධිය සම්බන්ධයෙන් පරික්ෂණ පවත්වයි.

-ඉන්දිකා රාමනායක-

Read More

බුදු සිරස මුද්‍රිත සාරියක් ඇදගෙන රෝහලට ආ කත අත්අඩංගුවට

 

බුදුන් වහන්සේගේ සිරස මුද්‍රණය කර ඇති සාරියකින් සැරසී නාරාහේන්පිට පෞද්ගලික  රෝහලකට පැමිණ සිටි කාන්තාවක් පෙරේදා (9) අත්අඩංගුවට ගත් බව නාරාහේන්පිට පොලිසිය කියයි. සැකකාරිය මෙම බුදුරුව සහිත සාරියෙන් සැරසී නාරාහේන්පිට ප්‍රදේශයේ පිහිටි පෞද්ගලික රෝහලකට රෝගියකු බැලීම සඳහා මෙසේ පැමිණ සිටියදී ඒ පිළිබඳව පොලිසියට ලැබුණු තොරතුරක් මත අත්අඩංගුවට ගෙන ඇත.  අත්අඩංගුවට ගත් කාන්තාව මන්නාරම ප්‍රදේශයේ පදිංචි (65) හැවිරිදි තැනැත්තියකි.  ඇය මෙම සාරියෙන් සැරසී රෝහලට පැමිණ සිටියදී රෝහලේ ප්‍රධාන ආරක්ෂක නිලධාරියා නාරාහේන්පිට පොලිසියට කළ දැනුම් දීමකට අනුව පොලිසිය පෑමිණ සැකකාරිය අත්අඩංගුවට ගෙන ඇත. මෙම කාන්තාව මන්නාරම ප්‍රදේශයේ වෛද්‍යවරයකුගේ නිවසේ මෙහෙකාරියක වශයෙන් සේවය කර ඇති අතර එම වෛද්‍යවරයා රෝගාතුර වී නාරාහේන්පිට පෞද්ගලික රෝහලකට පෙරේදා ඇතුළත් කරන අවස්ථාවේ ඇය ද කොළඹට පැමිණ ඇති බවට ඇයගෙන් ප්‍රශ්න කිරීමේදී පොලිසිය හෙළිකරගෙන තිබේ.

වෛද්‍යවරයාගේ දියණියගේ වැල්ලවත්ත නිවසේ සිට මෙම කාන්තාව පෙරේදා වෛද්‍යවරයා බැලීමට රෝහලට ගිය අවස්ථාවේ ඇය පොලිස් අත්අඩංගුවට පත්ව ඇත.  පොලිසිය සැකකාරිය අත්අඩංගුවට ගැනීමෙන් පසුව වැල්ලවත්තේ පදිංචි  වෛද්‍යවරයාගේ දියණියට පණිවිඩයක් යවා ඇය ලවා සැකකාරියට වෙනත් සාරියක් ගෙන්වාගෙන බුදු රුව සහිත සාරිය පොලිස් බාරයට ගෙන තිබේ.  බුදු රුව සහිත ඇඳුම් ඇඳීම තහනම් බව තමා නොදන්නා බව ඇය පොලිසියට ප්‍රකාශ කර ඇත.  අත්අඩංගුවට ගත් සැකකාරිය ඊයේ (10) අධිකරණයට ඉදිරිපත් කිරීමට නියමිතව සිටියාය. නාරාහේන්පිට පොලිසිය සිද්ධිය සම්බන්ධයෙන් පරික්ෂණ පවත්වයි.

-ඉන්දිකා රාමනායක-

Read More

මාස 3ක් ඇතුළත මුතුවැල්ල නව උමගේ වැඩ නිමකරන්න

උතුරු කොළඹ ගංවතුර පාලනය කිරීම සඳහා ඉදිකරමින් පවතින මුතුවැල්ල නව උමං මාර්ගයේ වැඩකටයුතු ඉදිරී මාස තුන ඇතුළත අවසන් කර භාර දෙන්නයි නාගරික සංවර්ධන හා නිවාස අමාත්‍යවරයා වශයෙන් අග්‍රාමාත්‍ය මහින්ද රාජපක්ෂ කොළඹ අගනගර ආශ්‍රිත සංවර්ධන ව්‍යාපෘතියට උපදෙස් දී ඇත.  ලන්දේසි යුගයේ ඉදිකරන ලද මේ වන විට වසර 225 කට වඩා පැරැණි මුතුවැල්ල උමං මාර්ගයට විකල්පයක් වශයෙන් ඉදිකෙරෙමින් පවතින නව මුතුවැල්ල උමං මාර්ගය මීටර් 778 ක් දිගින් ද මීටර් තුනක විස්කම්භයකින් ද යුක්තය.  අලුත් මාවත ප්‍රධාන ඇළ මාර්ගය අසලින් ආරම්භ වන මෙම නව උමග අවසන් වන්නේ මෝදර ධීවර වරාය අසලිනි.

මේ වන විට උමං මාර්ගය ඉදිකර අවසන් වී ඇති අතර දැනට අවසන් කිරිමට ඇත්තේ  මෝදර ධීවර වරාය අසලින් මුහුදට වැටෙන ස්ථානයේ වැඩකටයුතු පමණි. මෙම භූගත උමං මාර්ගයෙන් තත්පරයකට ජලය ලීටර් 15,000 ක් මුහුදට මුදා හැරිය හැකි බැවින් මෙහි ඉදිකිරීම් අවසන් වීමෙන් පසුව කොළඹ ගංවතුර ඇතිවීම පාලනය වනු ඇතැයි නාගරික සංවර්ධන අධිකාරියේ නිලධාරියෙක් පැවැසීය. මෙතෙක් පැවැති පැරැණි උමග මීටර් 1.8 ක් පළලැති අතර කොළඹ පවතින ගංවතුර  තත්වයේ දී එය කිසිසේත්ම ප්‍රමාණවත් නොවේ. විශේෂයෙන් බ්ලූමැන්ඩල් සහ අලුත් මාවත ප්‍රදේශයන් කුඩා වර්ෂාවක දී වුව ජල ගැලීම්වලට ලක්වන බැවින් පවුල් රාශියක් අවතැන් වෙමින් සිටිති.  

2010 වසරේ පාර්ලිමේන්තු සංකීර්ණය ජලයෙන් යටවීමෙන් පසුව එවකට ජනාධිපති මහින්ද රාජපක්ෂ මහතාගේ යෝජනාවක් අනුව මෙම ව්‍යාපෘතිය ආරම්භ විය. ඒ අනුව 2013 වසරේ ආරම්භ කළ කොළඹ අගනගර ආශ්‍රිත නාගරික සංවර්ධන ව්‍යාපෘතිය යටතේ මෙම උමං මාර්ගයේ වැඩකටයුතු ආරම්භ කරන ලද්දේ 2013 වසරේදීය. ඇමෙරිකා ඩොලර් මිලියන 321 ක මෙම ව්‍යාපෘතියේ මුළු වටිනාකමින් ඇමරිකානු ඩොලර් 213 ක් ලෝක බැංකුවෙන් සහනදායී ණය පදනම මත ලැබී ඇති අතර ශ්‍රී ලංකා රජය ඇමෙරිකා ඩොලර් මිලියන 108 ක් මේ සඳහා ආයෝජනය කර තිබේ.

මෙම ව්‍යාපෘතිය සඳහා නව මුතුවැල්ල අලුත් මාවත ග්‍රාම නිලධාරි වසමේ ජීවත්වන පවුල්  දැනුවත් කර ඇති අතර පවුල් 150 කට අයත්  ඉඩම් හෙක්ටයාර් 1,719 ක ප්‍රමාණයක් පවරාගෙන ඇති අතර එසේ පවරා ගැනීම හේතුවෙන් නිවාස හා ඉඩම් අහිමි වූවන්ට නිවාස හා වන්දි ගෙවීමට රුපියල් මිලියන 647 ක පිරිවැයක් දරා ඇත. නිවාස අහිමි වූ අනවසර පවුල් 63 ක් සඳහා මෙත්සඳ සෙවණ නිවාස සංකීරණයෙන් නිවාස  දී තිබේ.

Read More

සහරාන්ලා අයි.එස්.එක්ක සම්බන්ධ නෑ

සහරාන් හෂීම් නායකත්වය දුන් ජාතික තවුහිද් ජමාත් සංවිධානය සාම අයි.එස්.අයි.එස්. සංවිධාතය සමග සම්බන්ධතා නොපැවැත්වූ බව ද පාස්කු ඉරු දින ප්‍රහාරය පිටුපස සිටින්නේ සහරාන්ලා යොදා ගනිමින් ලංකාවට හානි කිරිමේ වුවමනාවෙන් කටයුතු කළ වෙනම බලවේගයක් බව ද ශ්‍රී ලංකා මුස්ලිම් කොංග්‍රසයේ නායක පාර්ලිමේන්තු මන්ත්‍රී රවුෆ් හකීම් මහතා පෙරේදා (7) පැවසීය.  ඔහු මේ බව පැවසුවේ පාස්කු ඉරු දින ප්‍රහාරය පිළිබඳ ජනාධිපති විමර්ශන කොමිසම හමුවේ සාක්ෂි ලබාදෙමිනි. මෙය අයි.එස්.අයි.එස්. බැනරය නාමිකව යොදාගෙන, සහරාත් හා ඔහුගේ ජාතික තවුහිදී ජමාත් සංවිධානය උගසට ගනිමින් ඔවුන් ලවා වෙනත් බලවේගයක් විසින් සිදුකරන ලද ප්‍රහාරයක් බව ද ඔහු පැවැසීය. කවුරුන් විසින් සිදුකරනු ලැබුව ද ප්‍රහාරකයන්ගේ අවශ්‍යතාව වී තිබුණේ මේ රටට හානි කිරීම බව ද මෙවැනි සිදුවීමක් යළි වීමට ඉඩ නොතැබිය යුතු බව ද කීය. 

සහරාන්ලා පිටුපස සිටි බලවේගය කුමක්දැයි තමන්ට පැවසිය හැකි නමුත් එය මාධ්‍ය ඉදිරියේ හෙළිදරව් කළ නොහැකි බව ද හකීම් මහතා පැවැසීය. ශ්‍රි ලංකා මුස්ලිම් කොංග්‍රසයට 2015 මහ මැතිවරණයේදී කිසිදු සම්බන්ධතාවක් නොවූ බව ද බොහෝ දෙනා තමන් හා සහරාන්ලා අතර සම්බන්ධතාවක් ඇතැයි විවිධ කතා ගොඩනගා ඇති බව ද ඔහු කීවේය. කාත්තන්කුඩිවල 2015 දී ඇති වූ ගැටුමකදී තුවාල ලබා සිටි සහරාන්ගේ සහෝදරයා වූ රිල්වාන් බැලීමට රෝහලට ගියේ ඇයි දැයි  කොමිසම යොමු කළ ප්‍රශ්නයට පිළිතුරු දෙමින් හකීම් මහතා සඳහන් කළේ පහරකෑමට ලක් වූ පිරිස බැලීමට තමන් කාතන්කුඩි රෝහලට ගිය අතර රිල්වාන් ද ඒ අතර එක් පුද්ගලයකු පමණක් බවය. ඔහු කවුදැයි තමන් පෞද්ගලිකව නොදන්නා බව ද දේශපාලන නායකයකු ලෙස තමන්ගේ යුතුකමක් වගකීමක් ඉටුකිරීම පමණක් මෙහිදී සිදුකළ බව ද ඔහු පැවැසීය.

එදින ප්‍රහාරයට ලක්වූ තවුහිද් ජමාත් පල්ලියට ද තමන් ගිය බව ද එය මඩුවක් වැනි ස්ථානයක් වන අතර සහරාන් ද එහි සිටි බව ද ඔහු පැවැසිය. ඒ සාලයේ සහරාන්ලා ජාතික තවුහිදී ජමාත් සංවිධානය ලෙස සංවිධානයක් හදාගෙන සිටි බවක්වත් තමන් දන්නේ නැති බව ද හකීම් මහතා කීය. දෙමළ භාෂාව කතා කරන ජනතාව වෙනුවෙන් නැගෙනහිරට වෙනම පරිපාලනය දිස්ත්‍රික්කයක් ලබාදෙන ලෙස තම පක්ෂය 2015 ජනාධිපතිවරණයේදී මෛත්‍රීපාල සිරිසේන මහතාගෙන් ඉල්ලීමක් කළ බව ද ඔහු පැවසීය. මෙසේ වෙනම පරිපාලන දිස්ත්‍රික්කයක්  අම්පාර පත්කරන ලෙස යෝජනා කළ බව ද ඔහු පැවසීය. එය එම ප්‍රදේශයේ ජනතාවගේ සාධාරණ ඉල්ලීමක් බව ද එය රටේ සමගිය හෝ ජාතික සංහිඳියාවට බාධාවක් නොවන බව තමන්ගේ විශ්වාසය බව ද හකීම් මහතා කීවේය. 

සෑම පරිපාලන කාර්යයකදීම භාෂාව වැදගත් වන බව ද ඒ අනුව මෙම ඉල්ලීම සිදුකළ බව ද ඔහු පැවසීය. පරිපාලන ඒකකයක් හා දේශපාලන ඒකකයක් යන දෙකෙහි වෙනසක් ඇති බව ද පරිපාලන ඒකකයක් පිහිටුවීම අවශව වන්නේ  ජනතාවගේ යම් යම් කටයුතු කරගැනීමේ පහසුව සඳහා බව ද ඔහු කීය. මෙම සංකල්පය මුස්ලිම් කොංග්‍රසයේ හිටපු නායක ඒ.එච්.එම්. අෂ්රෝෆ්  මහතා සිටි කාලයේ ඔලුවිල් විශ්වවිද්‍යාලයේ සිසුන් පිරිසක් ඉදිරිපත් කළ සංකල්පයම ඉදිරියට ගෙන ඒමක්දැයි රජයේ නීතිඥවරයා නැගු ප්‍රශ්නයට පිළිතුරු දෙමින් හකීම් මහතා පැවැසුයේ ඇතැම් විට එසේ විය හැකි බවය. ඉන්දු-ලංකා ගිවිසුම අත්සන් තැබීමෙන් පසුව  ඇතිවුණ තිස් අවුරුදු යුද්ධය තුළ මුස්ලිම්  ජනතාව දැඩි පීඩාවකට පත්වූ බව ද ඔවුන් ද තමන් මුහුණ දෙන පීඩාවත් නිසා ආයුධ අතට ගෙන යුද වදිනු ඇතැයි මුස්ලිම් නායකයන් බියෙන් පසු වූ බව ද ඔහු පැවසීය.

-මුදිතා දයානන්ද-

Read More

තෙල් නැවේ අයිත් ගින්නක්

'එම්.ටී.නිව් ඩයමන්ඩ්' බොරතෙල් ප්‍රවාහන නෞකාවෙහි ඊයේ (7) පස්වරුවේ නැවතත් ගින්නක් හටගත් බව නාවික හමුදා මාධ්‍ය ප්‍රකාශයක් කපිතාන් ඉන්දීක ද සිල්වා මහතා පැවසීය. මෙම නෞකාවේ ඉකුත් 3 වැනිදා හටගත් ගින්න පෙරේදා (6) පස්වරු 3.00 පමණ වන විට සම්පූර්ණයෙන් පාලනය කිරිමට හැකිවුවත් නෞකාවේ ගිනි පුපුරු,, අභ්‍යන්තර උෂ්ණත්වය හා එම ප්‍රදේශයේ පවතින තද සුළග හේතුවෙන් යළිත් ගින්නක් හටගන්නට ඇතැයි සැකකරන බව නාවික හමුදා මාධ්‍ය ප්‍රකාශකවරයා සඳහන් කළේය. මෙම ගින්න මිට පෙර ගින්න පැවති ස්ථානයෙන් නොව වෙනත් ස්ථානයකින් හටගන්නට ඇතැයි සැකකරන බව ද ඔහු ප්‍රකාශ කළේය.  නැවත ඇතිවූ ගින්න පාලනය සඳහා කඩිනම් පියවර ගනිමින් සිටින බව ද මාධ්‍ය ප්‍රකාශකවරයා කීය. 

නැවතත් ගින්න ඇතිවීමේ සම්භාවිතාවක් තිබූ බැවින් ගිත්න සම්පූර්ණයෙන් පාලනය කිරිමෙන් පසුවත් නෞකා සහ යාත්‍රා යොදා ගනිමින් එම නෞකාව සිසිලනය කිරිම අඛණ්ඩව සිදුකරමින් තිබියදීම මෙම ගින්න හටගත් බව කපිතාන් ඉන්දික ද සිල්වා මහතා පැවසීය. ශ්‍රී ලංකා හා ඉන්දීය නෞකා, ටග් යාත්‍රා හා ශ්‍රී ලංකා ගුවන් හමුදාවට අයත් ගුවන් යානා හා ඉන්දීය වෙරළට  ආරක්ෂක දෙපාර්තමේන්තුවට අයත් ගුවන් යානාවක් මේ වන විටත් එම ආපදා කළමනාකරණ මෙහෙයුමේ නිරතව සිටින බව කී මාධ්‍ය ප්‍රකාශකවරයා ඉදිරියේදී අවශ්‍යතාවය පරිදි තවත් යාත්‍රා මෙම මෙහෙයුමට යොදවන බව ද සඳහන් කළේය.  නෞකාව නැවත ගිනි ගැනීමට ඇති අවදානම සම්පූර්ණයෙන් පහව යන තෙක් ශ්‍රී ලංකා නාවික හමුදාව ඇතුළු පාර්ශ්ව මෙම මෙහෙයුම අඛණ්ඩව සිදුකරන බවද ඔහු කීවේය.

-ඩයනා උදයංගනී-

Read More