සංවිධානාත්මක අපරාධ කල්ලි සාමාජිකයකු සහ හෙරොයින් මත්ද්‍රව්‍ය ජාවාරම්කරුවකු වන “පොඩි ලැසි" ගේ ගෝලයකු වන “තෙල්වත්තේ නීල්" නමැත්තා සතුව තිබී අත්අඩංගුවට ගත් රිවෝල්වරයක් ශ්‍රී ලංකා යුද හමුදාවට අයත් ගිනි අවියක් බවට අනාවරණය වී ඇතැයි නියෝජ්‍ය සොලිසිටර් ජනරාල් දිලීප පීරිස් මහතා කොළඹ ප්‍රධාන මහේස්ත්‍රාත් මොහොමඩ් මිහාල් මහතා ඉදිරියේ ඊයේ (28) කරුණු අනාවරණය කළේය.
“තෙල්වත්තේ නීල්” යන අය සතුව තිබී අත්අඩංගුවට ගත් අවි ආයුධ අතුරින් මිලිමීටර් 9 මාර්ක් 2 වර්ගයේ පිස්තෝල ගිනි අවිය ඉකුත් 1996 වර්ෂයේ දෙසැම්බර් මස 31 වැනිදා ශ්‍රී ලංකා යුද හමුදාවේ යාපනය බළසේනා මූලස්ථානයට නිකුත් කළ එකක් බවට වාර්තතා වී ඇතැයි නියෝජ්‍ය සොලිසිටර් ජනරාල්වරයා අධිකරණයට දැනුම් දුන්නේය. නීල් නමැත්තා සතුව තිබී හෙරොයින් කිලෝග්‍රෑම් 11ක්, ටී 56 ගිනි අවි 2ක් සහ පිස්තෝල අවි 3ක් අත්අඩංගුවට ගත් බවත්, එම අවිවල අංක සම්බන්ධයෙන් වාර්තාවක් කැඳවීමේ දී මෙම කරුණු අනාවරණය වී ඇති බවත් නියෝජ්‍ය සොලිසිටර් ජනරාල්වරයා අධිකරණයට දැනුම් දුන්නේය.
ශ්‍රී ලංකා යුද හමුදාව සතු ගිනි අවි මේ ආකාරයෙන් පාතාල සාමාජිකයන් අතට පත්වූයේ කෙසේද? යන්න සම්බන්ධයෙන් මෙන්ම ඒවා මගින් පාතාල සාමාජිකයන් සිදුකර ඇත්තේ කෙබඳු අපරාධ ද? යන්න පිළිබඳව මේ වන විට අපරාධ පරීක්ෂණ දෙපාර්තමේන්තුව පරික්ෂණයක් ආරම්භ කර ඇති බව නියෝජ්‍ය සොලිසිටර් ජනරාල්වරයා අධිකරණයට සඳහන් කළේය.
යුද හමුදාවේ කිනම් නිලධාරියා විසින් මෙම අවිය ලබාදෙනු ලැබුවේ ද? යන්න සම්බන්ධයෙන් ද මෙහිදී විමර්ශනය කෙරෙනු ඇතැයි ද නියෝජ්‍ය සොලිසිටර් ජනරාල්වරයා පැවසීය.
හෙරොයින් මත්ද්‍රව්‍ය ජාවාරම් කළැයි කියන නාකොටික් නිලධාරින් සම්බන්ධ මහේස්ත්‍රාත් පරික්ෂණය ඊයේ (28) අධිකරණය හමුවේ යළි කැඳවූ අවස්ථාවේ දී මෙම කරුණු ඉදිරිපත් විය.
මෙම ජාවාරම් සිද්ධියට සම්බන්ධ බව කියන සැකකාර නාකොටික් පොලිස් නිලධාරින් 13 දෙනා අගුණකොළපෑලැස්ස බන්ධනාගාරය තුළ රඳවා ඇති බවත්, කොවිඩ් වසංගතය හේතුවෙන් සෞඛ්‍ය හේතු මත සැකකරුවන් අධිකරණයට ඉදිරිපත් නොකරන බවත් බන්ධනාගාරය වාර්තතාවක් මගින් අධිකරණයට කරුණු ඉදිරිපත් කළේය.
මෙම සිද්ධිය සම්බන්ධයෙන් අපරාධ පරීක්ෂණ ලදපාර්තමේන්තුව තුළ රඳවාගෙන ප්‍රශ්න කරන පොලිස් නිලධාරින් පස් දෙනකු සහ සිවිල් පුද්ගලයන් පස් දෙනකු ඇතුළු සැකකරුවන් 23 දෙනකු සිටින බව ද නියෝජ්‍ය සොලිසිටර් ජනරාල්වරයා අධිකරණයට දැනුම් දුන්නේය.
පැමිණිල්ල වෙනුවෙන් නීතිපතිවරයා නියෝජනය කරමින් නියෝජ්‍ය සොලිසිටර් ජනරාල් දිලීප පීරිස් මහතා සහ අපරාධ පරික්ෂණ දෙපාර්තමේන්තුවේ සහකාර පොලිස් අධිකාරි මෙරිල් රන්ජන් ළමාහේවා, විශේෂ විමර්ශන ඒකකයේ ස්ථානාධිපති ප්‍රධාන පොලිස් පරික්ෂක ලලිත දිසානායක, උප පොලිස් පරික්ෂක උපාලි, උප පොලිස් පරික්ෂක විජේසූරිය යන නිලධාරීන් ඇතුළු කණ්ඩායමක් අධිකරණය හමුවේ පෙනී සිටියහ.
බූස්ස බන්ධනාගාරයේ රඳවා සිටින අරුමාහන්දි ලසිත් මධුසංඛ ද සිල්වා (28) නොහොත් “පොඩි ලැසී" නමැත්තාගේ ගෝලයකු වන, ගාල්ල තෙල්වත්තේ පදිංචි දළුවතුමුල්ල ගමගේ නීල් නන්දන නොහොත් “තෙල්වත්තේ නීල්” යන අය රුපියල් කෝටි 10කට අධික හෙරොයින් මත්ද්‍රව්‍ය සහ ආයුධ සමඟ අත්අඩංගුවට ගත්තේ ඉකුත් ජුලි මස 25 වැනිදා බව අපරාධ පරික්ෂණ දෙපාර්තමේන්තුව අධිකරණයට දැනුම් දී තිබුණේ සිය බි වාර්තාව මගිනි. ඒ අනුව මෙම නීල් නමැත්තා ද මේ වන විට තම දෙපාර්තමේන්තුව තුළ රඳවාගෙන ප්‍රශ්න කිරිම් සිදුකරන බවද අපරාධ පරික්ෂණ දෙපාර්තමේන්තුව අධිකරණයට කරුණු වාර්තා කර ඇත.
නීල් නමැත්තාගෙන් කරන ලද ප්‍රශ්න කිරීම්වල දී මාතර සිට බලපිටිය දක්වා හෙරොයින් මත්කුඩු කිලෝග්‍රෑම් 130ක් ප්‍රවාහනය කිරීමේ සිද්ධියට අදාළව පාත්තරකැටිය පාර, බටපොල පදිංචි අලුත්ගම ගුරුගේ මංජුල නොහොත් මංජු නමැත්තා ඉකුත් 24 වැනිදා අත්අඩංගුවට ගත් බව නියෝජ්‍ය සොලිසිටර් ජනරාල්වරයා අධිකරණයට දැනුම් දුන්නේය. “පොඩි ලැසී"ගේ හෙරොයින් “නීල්" නමැත්තා මගින් මෙම සැකකරුට ලබා දී මාතර සිට බලපිටිය දක්වා ප්‍රදේශවල බෙදාහැර ඇති බව ද නියෝජ්‍ය සොලිසිටර් ජනරාල්වරයා අධිකරණයට කරුණු ඉදිරිපත් කළේය. නියෝජ්‍ය සොලිසිටර් ජනරාල්වරයා අධිකරණයට දැනුම් දෙමින් සඳහන් කළේ මෙම සැකකරු ද අපරාධ පරික්ෂණ දෙපාර්තමේන්තුවේ රඳවාගෙන ප්‍රශ්න කිරීම් සිදුකරන බවය.
සැකකරුවන් වෙනුවෙන් අධිකරණයේ පෙනී සිටි නිතීඥ අජිත් පතිරණ මහතා සඳහන් කළේ තම සේවාදායකයන් මෙම සිද්ධිය සම්බන්ධයෙන් මාස එකහමාරක පමණ කාලයක සිට රක්ෂිත බන්ධනාගාර ගත කර සිටින බවත් අත්අඩංගුවේ පසුවන පොලිස් නිලධාරින්ගේ ප්‍රකාශ මත පමණක් තම සේවාදායකයන් අත්අඩංගුවට ගෙන ඇති බවත්ය.
ස්වාදායකයන් වෙනුවෙන් නැවතත් ලිඛිත සැලකිරීම් සිදුකිරීමට අවසර ලබා දෙන ලෙසට සැකකරුවන් වෙනුවෙන් පෙනී සිටි නිතීඥවරුන් අධිකරණයෙන් ඉල්ලීමක් කළ අතර පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල්වරයා ද සඳහන් කළේ සැකකරුවන්ට එවැනි අවස්ථාවක් ලබා දෙන්නේ නම්, තමන්ට ද නැවතත් ලිඛිත දේශන ලබා දීමට අවසර ලබා දෙන ලෙසය.
ඒ අනුව දෙපාර්ශවයේම ලිඛිත දේශන ලබන 07 වැනිදාට ලබා දෙන ලෙසට මහේස්ත්‍රාත්වරයා නියෝග කළේය. ඉදිරිපත් වූ කරුණු සැලකිල්ලට ගත් අධිකරණය සැකකාර නාකොටික් නිලධාරින් ලබන 07 වැනිදා තෙක් තවදුරටත් රක්ෂිත බන්ධනාගාර ගත කිරීමට නියෝග කරමින් එදින තෙක් නඩුව කල් තැබීය.
පොලිස් මත්ද්‍රව්‍ය නාශක කාර්යාංශයට අනුයුක්ත නිලධාරින් කණ්ඩායමක් මෙරට මහා පරිමාණ මත්ද්‍රව්‍ය ජාවාරම්කරුවන් සමඟ සම්බන්ධ වෙමින් මත්ද්‍රව්‍ය ප්‍රවාහනය කරමින් සංවිධානාත්මක අපරාධ කණ්ඩායම් සමඟ සම්බන්ධ වී අවි ආයුධ රැස් කිරීම, මනුෂ්‍ය ඝාතනයක් කිරීමට අධාර අනුබල දීම, සැලසුම් කිරීම, කුමන්ත්‍රණය කිරීම, සාහසික ක්‍රියා සිදුකරමින් මහජන සාමයට උපද්‍රව කිරිම හා සමාන්‍ය ජන ජීවිතය කඩා කප්පල් කිරීමේ සිද්ධියකට අදාළව මෙම සැකකරුවන් අත්අඩංගුවට ගෙන අධිකරණයට ඉදිරිපත් කළ බව අපරාධ පරික්ෂණ දෙපාර්තමේන්තුවේ විශේෂ විමර්ශන ඒකකය අධිකරණයට කරුණු වාර්තා කර තිබිණි.
මෙම සිද්ධියේ දී රක්ෂිත බන්ධනාගාර ගත කෙරුණේ පොලිස් මත්ද්‍රව්‍ය තාශක කාර්යාංශයට අනුයුක්තව සේවය කළ පොලිස් පරික්ෂක විමලසේන ලයනල්, උප පොලිස් පරික්ෂක සීක්කුවාවසම්, ගයාන් තරංග, ප්‍රේමරත්ත සිල්වා, උප පොලිස් පරික්ෂක දහනායක රාළලාගේ අතුල ජයන්ත බණ්ඩාර, පොලිස් සැරයන් (15819) මුතුබණ්ඩාගේ චමින්ද ලක්ෂ්මන් ජයතිලක, පොලිස් සැරයන් (20637) ජයසිංහගේ සමන් කුමාර ජයසිංහ, පොලිස් සැරයන් (61756) වතුකාරගේ චමිල ප්‍රසාද් වතුකාර, පොලිස් කොස්තාපල් (69351) විජේසිංහ මුදියන්ස්ලාගේ ප්‍රියන්කර ජයසේන, පොලිස් කොස්තාපල් (73084) බටුවත්තගේ රුවන් පුෂ්පකුමාර, පොලිස් කොස්තාපල් (74811) රතුගමගේ අසංක ඉන්ද්‍රජිත් රතුගමගේ, පොලිස් කොස්තාපල් (84346) චිත්‍රආචාරිගේ සමීර ප්‍රදීප් කුමාර, පොලිස් කොස්තාපල් (85372) වන්නිආරච්චිගේ ලක්ෂාන් සමීර වන්නිආරච්චි සහ පොලිස් කොස්තාපල් (87226) හේරත් මුදියන්සේලාගේ ලලිත් ජයසිංහ යන අයවලුය.
මෙම සිද්ධියටම අදාළව නාකොටික් නිලධාරින් 11 දෙනා සම්බන්ධ මුදල් විශුද්ධීකරණය නඩුව ද ඊයේ (28) අධිකරණය හමුවේ කැඳවූ අවස්ථාවේ දී අදාළ සැකකරුවන් ද ලබන 12 වැනිදා තෙක් එම නඩුවට අදාළව රක්ෂිත භාරයේ තැබීමට අධිකරණය නියෝග කළේය. සැකකාර නාකොටික් නිලධාරින් සන්තකයේ තබාගෙන සිටි බව කියන ව්‍යාජ මුදල් නෝට්ටු සම්බන්ධයෙන් මහ බැංකු වාර්තා ලැබී ඇති බවත්, එම වාර්තා අනුව එම මුදල් නෝට්ටු ව්‍යාජ ඒවා බවට තහවුරු කර ඇතැයි අපරාධ පරික්ෂණ දෙපාර්තමේන්තුව අධිකරණයට දැනුම් දුන්නේය. ඒ අනුව එම නඩුවට අදාළ සැකකාර තාකොටික් නිලධාරින් තිදෙනා ද ලබන 12 වැනිදා තෙක් නැවතත් රක්ෂිත භාරයේ තැබීමට අධිකරණය නියෝග කළේය.
- නිමන්ති රණසිංහ -
