තමන් ඇතුළු නව තේරීම් කමිටුව කිසිදු ක්‍රීඩකයෙකුට පක්ෂග්රාහී නොවන බවත්, මුල්තැන ලබාදෙන්නේ දක්‍ෂතාවලට පමණක් බවත් ශ්‍රී ලංකා ක්‍රිකට් නව තේරීම් කමිටු සභාපති උපුල් තරංග පැවසීය. අභිනව තේරීම් කමිටුවේ පළමු මාධ්‍ය සාකච්ඡාවට ඊයේ (03දා) එක්වෙමින් හෙතෙම තවදුරටත් පවසා සිටියේ, තරුණ ක්‍රීඩකයන්ගෙන්ම කණ්ඩායම සමන්විත විය යුතු යැයි තමන් විශ්වාස නොකරන බවයි.
ශ්‍රී ලංකා ක්‍රිකට් කණ්ඩායමේ වත්මන් අර්බුද පිළිබඳ පැහැදිලි කළ උපුල් තරංග, "ලෝක කුසලාන තරගාවලියේදී අපි හිතුව තරම් සාර්ථක වුණේ නැහැ. අපට දක්ෂ පිතිකරුවන් සිටියත් ඔවුන් තමන්ගේ දක්ෂතා පවත්වාගෙන ගියේ නැහැ. එක දවසක් හොඳින් ක්‍රීඩා කළොත්, තරග කිහිපයක් යනකම් ඒ දක්ෂතාව නැහැ. පන්දු රැකීම ගත්තත් හදාගන්න දේවල් තියෙනවා. කෙසේ නමුත් පසුගිය අවුරුදු කිහිපයම අපේ පන්දු යැවීමේ අංශය හොඳින් තියෙනවා කියලා හිතනවා.
සිම්බාබ්වේට එරෙහි තරගාවලියට ක්‍රීඩකයන් තෝරාගැනීම ගැන පැහැදිලි කළ තරංග, “ගොඩක් වෙලාවට අපේ ක්‍රීඩක ආදේශන (backup players) තිබුණේ අඩුවෙන්. නමුත් අපි ජාතික කණ්ඩායම ශක්තිමත් කරගන්න නම්, අපේ බැකප් ශක්තිමත් කරගන්න ඕන. ඒක තේරීම් කමිටුව ලෙස අපි බලන ප්‍රධානම දෙයක්.
අපි කිසිම ක්‍රීඩකයෙකු අතහරින්නේ නැහැ. ඒ වගේම කිසිම ක්‍රීඩකයෙකු වර්ගීකරණය කරන්නේ නැහැ. නවක ක්‍රීඩකයන්ට ඔවුන්ගේ ක්‍රිකට් දියුණු කරගන්න අත්දැකීම් ගොඩක් බලපානවා.
නව තේරීම් කමිටුවේ දිගු කාලීන හා කෙටි කාලීන සැලසුම් පිළිබඳවද මෙහිදී උපුල් තරංග පැවසීය. "අපේ දිගුකාලීන සැලසුම තමයි 2027 එක්දින ලෝක කුසලානයට කණ්ඩායම සූදානම් කිරීම, ඒ වගේම තවත් මාස කිහිපයකින් ආරම්භ වන විස්සයි20 ලෝක කුසලානයට සූදානම්වීම කෙටි කාලීන සැලසුම.
ඒ වෙනුවෙන් දිගටම කුසල් හා වනිදු නායකයන් ලෙස තබාගැනීමට අපි බලාපොරොත්තු වෙනවා. කුසල්ට නිත්‍ය නායකයෙකු ලෙස කටයුතු කරන්න හරි අවස්ථාවක් ලැබුණේ නැහැ.
නායකත්වය දසුන්ගෙන් කුසල්ට දෙන්න හේතු වුණේ දසුන් පිතිකරුවෙකු ලෙස හොඳින් සාර්ථක නොවීම, දසුන් අන්තිම තරගාවලි කිහිපයේම පිතිකරණ අංශයෙන් හොඳින් ක්‍රීඩා කළේ නැහැ. එනිසයි නව සැලසුමත් එක්ක කුසල් තෝරාගත්තේ.
වනිදුගෙන් විස්සයි20 ලෝක කුසලානයට යන්න බලාපොරොත්තු වෙනවා. ශල්‍යකර්මයෙන් පසු ඔහු සුවවීගෙන එන්නේ. ඔහු අන්තර්සමාජ ක්‍රිකට් තරගාවලියේ මේ වනවිට තරග දෙකක් ක්‍රීඩා කරලා තියෙනවා. ඒ අනුව කණ්ඩායමේ භෞතචිකිත්සක වාර්තා අනුව සිම්බාබ්වේට එරෙහි තරගාවලියේ තෙවැනි එක්දින තරගයේ සිට කණ්ඩායම සමග එක්වීමට වනිදුට හැකිවෙයි.
ඒ වගේම තරුණ ක්‍රීඩකයන්ගෙන්ම යන්න ඕන කියලා අපි විශ්වාස කරන්නේ නැහැ. අපේ ජාත්‍යන්තර තරග ක්‍රීඩා කළ අත්දැකීම් තියෙන ක්‍රීඩකයන් රැසක් සිටිනවා. ඒ නිසා ඔවුන් දක්ෂතා අතර ඉන්නවා නම්, ෆිට්නස් නම් යම් කිසි කාලයකට වුණත් කණ්ඩායමට ගන්න පුළුවන්නම්.
කෙසේ නමුත් ධනංජය ද සිල්වා ඇතුළු ජ්‍යෙෂ්ඨ හා තරුණ ක්‍රීඩකයන් කිහිප දෙනෙකුම සිම්බාබ්වේට එරෙහි ශ්‍රී ලංකා එක්දින සංචිතයට නම්කර නොමැති අතර, ඔවුන් කණ්ඩායමේ නොමැති වීම පිළිබඳ මෙහිදී විමසනු ලැබීය.
"අපි විශ්වාස කරනවා ධනංජය හොඳින්ම පිතිකරණයේ යෙදිලා තියෙන්නේ මුල් පිතිකරුවන් තිදෙනා අතර ස්ථානයක ක්‍රීඩා කරද්දී. නමුත් ඔහු අවසන් කාලයේ ක්‍රීඩා කළේ අංක 06, 07 වගේ. ඒ නිසා ඔහු එක්දින කණ්ඩායමට එනවා නම්, මුල් තුනේ තමයි ඔහුව ක්‍රීඩා කරවන්න බලාපොරොත්තු වන්නේ.
ඒ වගේම චන්දිමාල් අතහැරලත් නැහැ. චන්දිමාල් ක්‍රීඩාකරන්නේ අංක 04 හෝ 05. නමුත් මේ අවස්ථාවේදී සදීරත්, චරිත් අසලංකත් ඒ ස්ථාන දෙකේ හොඳින් ක්‍රීඩා කරනවා. ඒ නිසා චන්දිමාල්ට ස්ථානයක් ගන්න අමාරුයි. අපි බලාපොරොත්තු වෙන්නෙ ක්‍රීඩකයන් කණ්ඩායමට ගෙනල්ලා, ස්ථාන වෙනස් කරන්නේ නැතිව ඔවුන්ට ආවේණික ස්ථානයේ වැඩිපුරම ක්‍රීඩාකරන්න අවස්ථාව ලබාදෙන්න.
ඒ වගේම අවිශ්ක එක්දින විතරක් ක්‍රීඩා කරවන්නේ, ඔහුගේ විස්සයි20 දක්ෂතා එතරම් නොමැති නිසා. ඒ නිසා අපට විශ්වාසයෙන් කියන්න පුළුවන්, අපි කාටවත් පක්ෂග්රාහී වෙන්නේ නැහැ කියලා. අපි දක්‍ෂතාවලට තමයි මුල්තැන දෙන්නේ.
නායකයෙක් තෝරා පත්කර ගැනීමේදී ඔවුන්ගේ විනය හැසිරීම පිළිබඳ සැලකිල්ලක් නොදක්වන්නේ දැයිද මෙහිදී විමසනු ලැබීය. ඊට හේතු වූයේ කුසල් මෙන්ඩිස් ඉකුත්දා පැවති අන්තර් සමාජ එක්දින ක්‍රිකට් තරගාවලියේ බ්ලූම්ෆීල්ඩ් ක්‍රීඩා සමාජයට එරෙහිව පැවැති තරගයේදී ක්‍රීඩාගාරයේ දොරකට හානිකර තිබීමයි.
"විනය කියන එක සෑහෙන්න වැදගත්. කණ්ඩායම් ක්‍රීඩා කරද්දී විශේෂයෙන් බලනවා. ඒ නිසා නායකයාගේ විනය ඉතා වැදගත්. කුසල්ගේ සිදුවීම ගැන අපි ක්‍රිකට් ආයතනයෙන් විමසීමක් කළා. එහිදී ඔවුන් කීවේ අපට වාර්තාවක් දෙන්නම් කියලා.
නමුත් මේ දක්වා ඒ වාර්තාව අපට ලැබිලා නැහැ.
වත්මන් පළමු පෙළ එක්දින ක්‍රිකට් තරගාවලියේදී සමස්තයක් ලෙස බොහෝ ක්‍රීඩා සමාජ ආකර්ෂණීය ලකුණු පුවරු ගොඩනැගීමට අසමත්වීම පිළිබඳ තේරීම් කමිටුවේ මතයද මෙහිදී විමසන ලදි.
"ක්‍රීඩාකිරීමට ලැබෙන තණතීරු ගැන නම් සතුටුවෙන්නේ නැහැ. ක්‍රීඩකයන් එක්ක කතා කළාම ඔවුන් කියන්නෙත්, ජාත්‍යන්තර තණතීරු හා මේවා හාත්පසින්ම වෙනස් කියලා. ඒ නිසා තමන්ට ඊද්මය පවත්වාගෙන යන්න අමාරුයි කියලා.
නමුත් මේක ගොඩක් කාලයක ඉදන් පැවතගෙන එන එකක්. ඒ නිසා ක්‍රිකට් ආයතනය සැලසුම්කර තිබෙනවා ඔවුන්ගේ අධීක්‍ෂණය යටතේ ලබන වසරේ දේශීය ක්‍රිකට් තරගාවලියේ සිට ජාතික තණතීරු සකසන්නන් පස්දෙනෙක් යොදාගෙන තණතීරු සකසන්න.
මෙහිදී අවසන් වශයෙන් විමසා සිටියේ, ඉදිරියේදී ආරම්භවීමට නියමිතව ඇති ඇෆ්ගනිස්තානයට එරෙහි ටෙස්ට් තරගයේදී ශ්‍රී ලංකා ටෙස්ට් නායකත්වයේ වෙනසක් සිදුවනවා දැයි යනුවෙනි.
"ටෙස්ට් කණ්ඩායමේද වෙනසක් කර තිබෙනවා. නායකයා ලෙස ධනංජය ද සිල්වා හා උපනායකයා ලෙස කුසල් මෙන්ඩිස් පත්කර තිබෙනවා. කෙසේ නමුත් මම පෞද්ගලිකව කැමැති ආකෘති තුනටම එක් නායකයෙකු පත්කරනවාට, නමුත් අපේ තියෙන තත්ත්වයත් එක්ක අපට හිතුණා ඒක කරන්න බැහැ කියලා” යනුවෙන් පැවසීය.
