අනේ මම ඉස්පිරිතාලයට යනකොට මගේ සුදු නෝනා ටොලියක දාලා ඉන්නවා. ඇස් දෙක ඇරගෙන හිටියා යන්න එපා ඔය ගමන කියලා. ඒත් එයා කිව්වා අම්මේ අක්කලව ඇරලවා එනවනේ කියලා. එහෙම කියල ගිය මගේ සුදු නෝනයි, අයියගේ නෝනයි දුවයි පුතාටයි තමයි මේ විපත්තිය සිදුවුණේ දෙයියනේ” යැයි මීගොඩ දී හය දෙනකු මරුමුවට පත් කරමින් සිදු වූ රිය අනතුරින් මියගිය මලීෂා සත්සරනි දියණියගේ මව සිය දරාගත නොහැකි වේදනාවකින් පැවැසුවාය.
එකම පවුලක ඥාතින් සිවු දෙනෙකුගේ මරණය ගැන ආරංචිය ප්‍රදේශය පුරා පැතිර යාමත් සමග ඥාති හිතවතුන් එම නිවෙස්වලට එකතුව සිදු වූ අහස පොළොව නුහුලන අපරාධය ගැන දැඩි වේදනාවෙන් සිටිනු දක්නට ලැබිණි.
මිය ගිය පිරිස ගැන නැගූ අඳෝනාවෙන් ප්‍රදේශයම දැඩි කම්පනයට පත්ව තිබුණි.
හෝමාගම මීගොඩ හයිලෙවල් මාර්ගයේ බැද්දේ ගෙදර මුල් හංදිය ආසන්නයේ වෙසක් පොහොය නිමිත්තෙන් පැවති රොටී දන්සලක පෝලිමේ රැඳී සිටි පිරිසක් වෙතට කැබිරථයක් කඩා වැදීමෙන් සිදු වූ අනපේක්ෂිත අනතුරෙන් දිවි අහිමි වූ පිළියන්දල වෑවල පල්ලිය පාර ප්‍රදේශයේ පදිංචිව සිටි 15 හැවිරිදි දැරියගේ මව වන එච්. ඒ. චිත්‍රා රංජනී මහත්විය වාවා ගත නොහැකි වේදනාවකින් හඬා වැටෙමින් මෙසේද පැවැසුවාය.
මිය ගිය නවීශා හා ලසික ප්‍රියංකර වයස අවුරුදු 1 1/2 හා 07 වයසේ පසුවන කුඩා දරු දෙදෙනා සමග පිළියන්දල පල්ලිය පාර මවගේ නිවසට ඉකුත් (29) සෙනසුරාදා පැමිණ ඇති අතර ඔවුන් දෙදෙනා ඇතුළු දරු දෙදෙනා යළි අවිස්සාවේල්ල ඔවුන් පදිංචි නිවසට ඇරලවීම සඳහා මිය ගිය ඉන්ද්‍රානි සිය සැමියා සමග ඔහුට අයත් ත්‍රිරෝද රථයෙන් යාමට සූදානම් වීමේදී යාබද නිවසේ සහෝදරයාගේ දියණිය ද ඔවුන් සමග ගමනට එක්ව තිබිණි.
ඔවුන් අවිස්සාවේල්ල බලා යන අතරතුරදී ප්‍රදේශයේදී රොටී දන්සලක් තිබෙනු දැක ත්‍රිරෝද රථයේ රියදුරු වශයෙන් සිටි අනතුරින් මිය ගිය ඉන්ද්‍රානිගේ සැමියා සිය දියණියගේ වැඩිමල් දරුවා සමග ත්‍රීරෝද රථයේ සිටියදී සෙසු අය රොටී දන්සලේ පෝලිමට එක් වී ඇත.
සිය දියණිය සහ ඥාතීන්ට නොසිතූ නොපැතු අවස්ථාවක සිදු වූ අනපේක්ෂිත අනතුර සම්බන්ධයෙන් මහත් කම්පාවෙන් තවදුරටත් අදහස් දැක්වූ චිත්‍රා රංජනී මහත්මිය මෙසේද පැවසුවාය.
සිදු වූ එම අනතුරින් ඇයගේ බාල දියණිය වන පිළියන්දල වැවල ආනන්ද සමර කෝන් විද්‍යාලයේ 10 වන වසරේ අධ්‍යාපනය ලබන මලීෂා සත් සරති දියණිය, මෙන්ම ඇයගේ නැන්දනීය වන පී. බි. ඉන්ද්‍රාණි (56) අවිස්සාවේල්ල පදිංචිව සිටි ඇයගේ දියණිය වන ( දෙදරු මවක් වන) නවීශා නිලක්ෂි (35) හා ඇයගේ ස්වාමි පුරුෂයා වන ගුවන් හමුදාවේ සේවය කරන ලසික ප්‍රියංකර නානායක්කාර යන අය (38) සහ තුන්නානේ පදිංචි සොහොයුරන්වන ඉෂාන් ප්‍රියංකර (38) සහ නිෂාන් ප්‍රියංකර (36) යන අය මියගියහ. මම අයියටත් කිව්වා ඔය ගමන යන්න එපා අයියේ කියලා. එයා කිව්වා නැ මම මෙයාලව අවිස්සාවේල්ලට ඇරලා දැම්ම එනවා හෙට මට වැඩ වගයක් තියෙනවා කියලා.
රෑ දොළහට විතර කෝල් එකක් ආවා මේ ගොල්ලන් රොටී දන්සලක ඉන්නකොට කැබ් එකක් ඇවිල්ලා සේරම ඇදගෙන
ගිහිල්ලා අනතුරක් වෙලා ඉස්පිරිතාලේ නවත්තලා කියලා අපිට වෙන කිසි දෙයක් කිව්වේ නෑ.
අනේ මම යනකොට මගේ දුව ටොලියක දාලා ඉන්නවා ඇස් දෙක ඇරගෙන හිටියා. මගේ දුව නැතිවෙලා ගේන්න කොටම නැතිවෙලා කියලා තමයි මට දැනගන්න හම් බවුණේ යැයි ඇය ඉකිබිඳිමින් පැවැසුවාය.
පැය කීපයකට ඉස්සෙල්ලා විනෝදයෙන් කතාබහ කරලා යන්නම් අමීමේ. යන්නම් පුංචි, යන්නම් නංගි කියල ගිය ඒ ගොල්ලන් පැය කීපයක් තුළදී මේ වගේ අනතුරකට මුණ දෙන්න වෙයි කියලා හීනෙන්වත් හිතුවේ නෑ. අනේ දෙයියනේ ඒ ගොල්ලන් ඔක්කොම අපිව දාල යන්න ගියා. අනතුරින් මියගිය ඉන්ද්‍රාණිගේ මව වන සී.ඩී. ඉන්ද්‍රාණී මහත්මිය හැඩූ කඳුළින් මෙසේ පැවසුවාය.
පුතායි, ලේලියි මගේ මිනිබිරිලා දෙන්නයි. එක මිනිබිරියක් ගේ මහත්තයයි තමයි මේ අනතුරින් නැති වුණේ
ඒ දෙන්නවයි, එයාලගේ දරුවො දෙන්නයි අවිස්සාවේල්ලට ඇරලවල එන්න කියලා තමයි පුතා, ලේලි සහ අනෙක් මිනිබිරියත් එක්කගෙන ගියේ.
අපිට කෝල් එකක් ආවා වාහනයක හැප්පිලා අනතුරක් වේලා කියලා
ගෙදර කට්ටිය ඉස්පිරිතාලට ගියාම තමා දැනගත්තේ මේ වගේ ලොකු විපත්තියක් වෙලා කියලා. අනේ කුරා කුඹියෙකුටත් මේ වගේ දුකක් වෙන්න එපා.
සිද්ධියෙන් තුවාල ලබා හෝමාගම රෝහලේ ප්‍රතිකාර ලබන මාවනැල්ල උතුවන්කන්ද ප්‍රදේශයේ පදිංචිකරුවෙකු වන එච්. කේ.චමින්ද ගුණසේකර (39) මහතා මෙසේ පැවසීය.
මගේ බිරිඳගේ ගම අවිස්සාවේල්ල. අපි පවුලේ සහ නෑදෑ කට්ටිය බිරිඳගේ නිවෙසට පැමිණ වෙසක් බැලීමට හෝමාගම පැත්තට ආවා. අපේ පිරිස 9 දෙනෙක් පමණ හිටියා. අපි පනාගොඩ ආමි කෑම්ප් එකේ වෙසක් සැරසිලි බලාගෙන එමින් ගමන මෙතන රොටී දන්සලක් තියෙනව දැකල නතර කළා. පනහක් පමණ සෙනඟ හිටියා. සෙනඟ අඩු නිසා තමයි නතර කරන්න හිතුවේ.
අපි හිටියෙ පාරෙ අයිනෙ සුදු ඉරටත් පිටින් තියෙන කොන්ක්‍රීට් තහඩු උඩ. සමහරු සුදු ඉරේ වගේ හිටියා. මම වාහනයක් එනවා දැක්කෙ නෑ. හුළඟක් විතරක් ඇඟට දැනුණා. කැබ් එක වීමෙන් ඉස්සර කරගෙන ගිහින් තියෙන්නේ.
එතකොටම මගේ ඇස් කළු වෙලා ගිහින් ඇදගෙන වැටුණා. ටික වෙලාවකින් ඇස් ඇරල බලන කොට කීප දෙනෙක් වැටිල හිටියා. අවුරුදු 15 ක වගේ ගැනු ළමයෙක් සහ තවත් දෙන්නෙක් මගේ ළඟම වැටිලා හිටියා. ඒ තුන්දෙනාම මැරිල කියල මට හිතුණා.
පස්සෙ බලන කොට මගේ අක්කත් වැටිලා හිටියා. අක්කයි තව දෙතුන් දෙනෙකුයි වාහනේට දාල රෝහලට යැව්වා. මගෙත් කකුල තුවාල වෙලා කොන්දත් අමාරුයි.
මෙම අනතුර සිදුවන අවස්ථාවේදී රොටී දන්සල අසල විශාල පිරිසක් රැඳී සිටි බවටයි වාර්තා වි තිබුණෙ. ඔවුන් අතරින් පෝලිමේ පසුපස රැඳී සිටි කිහිප දෙනෙකු කැබ් රථය පෝලිමේ රැඳී සිටි පිරිස හප්පා පලායන අයුරු දැක ඇති බවයි ඔවුන් පවසන්නේ.
රොටී දන්සලේ පෝලිමේ රැඳී සිටි තරුණයෙක් මෙසේ කීය.
මම දන්සැලේ පිටිපස්සෙ හිටියේ මට දහ දෙනෙකුට වගේ ඉස්සරහින් හිටපු පිරිසගේ ඇගට එක පාරටම අවිස්සාවේල්ල පැත්තෙ ඉඳලා ආපු කැබ් රථයක් කඩා වැදුන. ඒ කැබ් එක ආවේ අධික වේගයෙන්, මිනිස්සුන්ගේ ඇගේ වැදුන ගමන් කැබ් එක ආපහු අවිස්සාවේල්ල පැත්තට හැරෙන්න වගේ ගියා. එත් රියදුරා වාහනය පාලනය කරගෙන කොළඹ දෙසටම හරවාගෙන අධික වේගයෙන් පලා ගියා. ඊට පස්සේ අපිත් අපි මොකක් කරන්නද කියලා හිතා ගන්න බැරි වුනා.. එතන හිටිය ගොඩක් අය තැන තැන බිම වැටිලා කැ ගහන්න ගත්තා.
ඊට පස්සේ පාරේ යන වාහන නවත්තලා ලෙඩිඩු හෝමාගම රෝහලට අරන් ආවේ. සිද්ධිය මතක් වෙන කොටත් මගේ ඇඟ හිරි වැටෙනවා යනුවෙන් පැවසීය.
එසේම එහි රැඳී සිටි තවත් තරුණයෙක් මෙසේ කීය.
අපි එකොළහට විතර දන්සලට ආවා. ඒ එතකොට රොටී ඉවර වෙන්න ළඟයි. අපි ආපහු හැරිලා යන්න හැදුවා. ඒත් සංවිධායකයින් කිව්වා මල්ලි යන්න එපා පිටි ටිකක් ඉතුරු වෙලා තිබෙනවා අපි ඔයාලට රොටී හදලා දෙන්නම් කියලා. ඒ අනුව අපි යාළුවො කට්ටිය එතන නැවතුනා. ඔන්න ඔය වෙලාවෙදි තමයි කැබ් එකක් ඇවිත් අපේ ඇඟේ වැදුණේ. මගෙත් අතේ වැදීගෙන ගියා. නමුත් වැඩිය අමාරු නෑ. දන්සල පැවති ස්ථානය අසල නිවසක පුද්ගලයෙක් මෙසේ පැවසීය.
සවස අපිත් රොටී දන්සලට ගිහිල්ලා රොටී කැවා. රෑ එකොළහ පහුවෙලා වගේ අපි නිදිය ගත්ත කියලා හැදුවා. ඔන්න ඔය වෙලාවෙදි තමයි දඩාස් ගාලා වාහන දෙකක් එකිනෙක හැප්පෙනවා වගේ ශබ්දයක් ඇසුනේ. ඒ පාර ගේට්ටුවත් ඇරගෙන මමයි නෝනයි දෙන්නම පාරට ගියා. ඒ යන කොට අපේ ගේ ඉස්සරහම වගේ දෙන්නෙක් බිම වැටිලා හිටියා.
ඒ දෙන්නම පාර ගියපු කාරි එකක දාගෙන හෝමාගම රෝහලට ගියා.
ඊට පස්සේ අවට බලද්දි තවත් කීපදෙනෙක් පාරේ තැන තැන වැටිලා කෑගහමින් හිටියා. ඔවුන්ව එක එක්කෙනා
ඩිමෝ බට්ටෙක් වගේ ලොරියකට පටවමින් හිටියේ. ඊට පස්සේ ඒ ලොරියෙන් හෝමාගම රෝහලට ලෙඩිඩු අරගෙන ගියා. ඊට පස්සේ අපට හිටිය අයගෙන් තමයි දැනගත්තේ කැබ් එකකින් දන්සලේ පිරිස හප්පගෙන ගියා කියලා. පිළියන්දල ප්‍රදේශයේ පදිංචි මියගිය කාන්තාවගේ ඥාති කාන්තාවක් මෙසේ කීවාය.
හැම අවුරුද්දේම අපේ පුතාලා වෙසක් බලන්න යනවා. මේ පාරත් වෑන් එක අරගෙන වෙසක් බලන්න ගියා. ඔය ගියපු අතරේ දන්සලක නවත්තලා ඉන්නකොට තමයි මේ අනතුර වෙලා තියෙන්නේ. ඊට පස්සේ අපිට ආරංචි වුනහම හෝමාගම රෝහලට ගියා. එහිදී තමයි දැනගත්තේ අපේ ඥාතීන් හතර දෙනකු මිය ගිහිල්ලා කියලා, ඒ අතරේ චූටි පුතත් තුවාල වෙලා ළමා වාට්ටුවේ ප්‍රතිකාර ගන්නවා. එයාට ගොඩක් අමාරු නැහැ.
සිද්ධිය සම්බන්ධයෙන් මීගොඩ පොලි සිය පරීක්ෂණ පවත්වයි.
