ශාන්ත ප්‍රදීප් කුමාර කුලරත්න
පෙර පාසලට ගොස් යළි නිවසට එමින් සිටි යතුරු පැදියක් ලොරි රථයක ගැටී සිදු වූ අනතුරින් බරපතළ තුවාල ලබා රෝහල්ගත කිරීමෙන් පසුව මියගිය සිව් හැවිරිදි දරුවාගේ මරණයට හේතුව අනතුර සිදුවන අවස්ථාවේ දී දරුවාගේ හිස කාපට් පොළොවේ ගැටී මොළයට සිදුවූ මොටබල තුවාල බව හෝමාගම හදිසි මරණ පරීක්ෂක සාම විනිසුරු චින්තක උදය කුමාර මහතා පැවසීය.
මෙසේ මිය ගොස් ඇත්තේ වග, පින්නවල, නො 332/ බී හි පදිංචි සසේන් නිම්හස් හෙට්ටිආරච්චි නමැති සිව් හැවිරිදී පිරිමි දරුවකු බව පොලිසිය කියයි.මෙම දරුවා පෙර පාසල ඇරී සිය මව සමග නිවසට ඒම සඳහා මවගේ මිතුරියකගේ ස්කූටි වර්ගයේ යතුරු පැදියක නැගී පැමිණ ඇති අතර, එම යතුරු පැදියේ පැදිකාරියගේ පෙර පාසල් දරුවා ඇතුළු සිවු දෙනකු පැමිණ තිබේ.
ඒ එන අතරතුරදී පාදුක්ක ලියන්වල ප්‍රදේශයේදී පිටුපසින් පැමිණි ලොරි රථයක් යතුරුපැදියේ ගැටී අනතුරක් සිදුව තිබූ අතර, එම අවස්ථාවේදී යතුරුපැදියේ ගමන්ගත් කුඩා ළමයින් දෙදෙනා සහ ඔවුන්ගේ මවුවරුන් ඇතුළු සිවුදෙනා මාර්ගයේ පසෙකට විසි වී තුවාල සිදුව තිබේ.
එම අවස්ථාවේදී පැදිකාරිය සහ පසු පැදිකාරිය අතර ගමන් කළ එක් දරුවකු විසි වී කාපට් අතුරා සංවර්ධනය කර තිබූ මාර්ගයට වැටී හිස කාපට් පොළොවේ ගැටී බරපතළ තුවාල සිදුව සිටි අතර එම අවස්ථාවේදී එම දරුවා හිස් වැසුමක් පැලඳ සිට නොමැති බවට හදිසි මරණ පරීක්ෂණයේදී කරුණු අනාවරණය වී තිබේ.අනතුරින් අනිත් තිදෙනාට සුළු තුවාල සිදුව තිබේ. පසුව මොවුන් ප්‍රතිකාර සඳහා පාදුක්ක දිසා රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා හෝමාගම මූලික රෝහලට මාරු කර එවීමෙන් පසුව හදිසි ප්‍රතිකාර ඒකකයේ ප්‍රතිකාර ලබමින් සිටියදී එම දරුවා මරණයට පත්ව ඇත.
ඒ අනුව මියගිය දරුවාගේ මෘත දේහය පිළිබඳව හදිසි මරණ පරීක්ෂණය හෝමාගම හදිසි මරණ පරීක්ෂක සාම විනිසුරු චින්තක උදය කුමාර මහතා විසින් සිදු කළ අතර මෘත දේහය පිළිබඳ පශ්චාත් මරණ පරීක්ෂණය හෝමාගම මූලික රෝහලේ විශේෂඥ අධිකරණ වෛද්‍ය පණීත සෙනෙවිරත්න මහතා විසින් සිදු කෙරිණි.එහිදී ඉදිරිපත් වූ සාක්ෂි සහ පශ්චාත් මරණ පරීක්ෂණ වෛද්‍ය වාර්තාවට අනුව මාර්ගයේ ගමන් ගත් ලොරි රථයක් යතුරුපැදියක ගැටී සිදු වූ අනතුරකින් දරුවාගේ මොළයට මොටබල තුවාල සිදුවීම හේතුවෙන් මරණය සිදුව ඇති බවට හදිසි මරණ පරීක්ෂක සාම විනිසුරු චින්තක උදය කුමාර මහතා නිගමනය කළේය.
එහිදී තවදුරටත් අනාවරණය වූ කරුණු අනුව යතුරුපැදියක දෙදෙනකු ගමන් කළ හැකි වුවත් අපරීක්ෂාකාරීව හා අනතුරුදායක ලෙස කුඩා දරුවන් දෙදෙනකු ද නංවාගෙන ඉන් එක් දරුවකුට හිස් වැසුමක් හෝ නොමැතිව ගමන් කිරීමෙන් පැදිකාරිය වරදක් සිදුකර ඇති බවට කරුණු අනාවරණය වන නිසා වහාම ඇය අත්අඩංගුවට ගෙන බල ප්‍රදේශයේ අධිකරණයට ඉදිරිපත් කරන ලෙසට ද හදිසි මරණ පරීක්ෂක සාම විනිසුරු චින්තක උදය කුමාර මහතා පොලිසියට නියෝග කළේය.මියගිය දරුවාගේ මාපියන් විවාහ වී වසර පහකින් පමණ පසුව මෙම දරුවා උපත ලබා ඇති අතර එම පවුලේ එකම දරුවා ද මොහු බවට කරුණු අනාවරණය වී ඇත.
පශ්චාත් මරණ පරීක්ෂණයෙන් අනතුරුව දේහය මව්පියන්ට බාර දී තිබේ. සිද්ධිය සම්බන්ධයෙන් පාදුක්ක පොලිසියේ පොලිස් සැරයන් (47673) වීරසූරිය පරීක්ෂණ මෙහෙයවීය.
