හිටපු පාතාල කල්ලි සාමාජිකයකු වන ගණේමුල්ලේ සංජීව නමැත්තා කොළඹ අතිරේක මහේස්ත්‍රාත් අධිකරණ විත්ති කූඩුවක් තුළදී වෙඩි තබා ඝාතනය කිරීමේ සිද්ධිය සම්බන්ධයෙන් අත්අඩංගුවට ගෙන රක්ෂිත බන්ධනාගාරගත කර සිටින සැකකරුවන් 14 දෙනාගේ හා එම ඝාතන සැලසුම සකස් කළ බව කියන ඉෂාරා සෙව්වන්දි නමැත්තියගේ සියලුම බැංකු ගිණුම් වාර්තා අධිකරණයට ඉදිරිපත් කරන ලෙස කොළඹ ප්‍රධාන මහෙස්ත්‍රාත් තනූජා ලක්මාලි මහත්මිය මහ බැංකු මූල්‍ය බුද්ධි ඒකකයට නියෝග කළාය.
මෙම සිද්ධිය සැලසුම් කළ බව කියන මේ වන විට සැඟව සිටින ඉෂාරා සෙව්වන්දි නමැත්තියට ඉංග්‍රීසි බසින් විවෘත වරෙන්තු නිකුත් කරන ලෙසටද අධිකරණයෙන් නියම විය.එම ඝාතන සිද්ධිය මුදල් කොන්ත්‍රාත්තුවක් මත සිදුව තිබේද යන්න පිළිබඳව හඳුනාගැනීමට අවශ්‍යව ඇති බැවින් සියලු බැංකුවල තිබෙන එම සැකකරුවන්ගේ පූර්ණ බැංකු ගිණුම් වාර්තා කොළඹ අපරාධ කොට්ඨාසයට ලබා දෙන ලෙසට මහ බැංකු මූල්‍ය බුද්ධි ඒකකයට නියෝගයක් නිකුත් කරන ලෙසට හා සැඟව සිටින ඉෂාරා සෙව්වන්දී නමැත්තියට ඉංග්‍රීසි බසින් විවෘත වරෙන්තුවක් නිකුත් කරන ලෙස එම අපරාධ කොට්ඨාසය කරන ලද ඉල්ලීමක් සලකා බලමින් අධිකරණයෙන් එසේ නියම කෙරිණි.
සිද්ධිය සම්බන්ධයෙන් මේ වන විට සිදුකරන විමර්ශනවලට අනුව විදේශගතව සිටින සංවිධානාත්මක අපරාධ කල්ලියක වුවමනාව මත මෙම ඝාතනය සිදුකර ඇති බවට කරුණු අනාවරණය වන බවද එම අපරාධ කොට්ඨාසය අධිකරණයට දැනුම් දුන්නේය. මෙම ඝාතන සිද්ධියේ වෙඩික්කරු බවට හඳුනාගෙන ඇති දමිදු ලක්‍ෂාන් හා ඔහුට ඒ සඳහා අනුබල දුන් බව කියන මහේෂ් සම්පත් ප්‍රියදර්ශන නමැති සැකකරුවන් දෙදෙනා මේ වන විට වරාය පොලිසියේ රඳවා තබාගෙන ප්‍රශ්න කරමින් සිටින බවද විමර්ශන නිලධාහු අධිකරණය හමුවේ පැවැසූහ.
මෙම සිද්ධිය සම්බන්ධයෙන් අත්අඩංගුවට ගෙන රක්ෂිත බන්ධනාගාරගත කර සිටින ජේලර්වරයා එම සිද්ධියට සම්බන්ධ බවට කරුණු අනාවරණය නොවන හෙයින් ඔහුට ඇප ලබාදෙන ලෙසට ඔහු වෙනුවෙන් පෙනී සිටි නීතිඥ අසංක පෙරේරා මහතා අධිකරණයෙන් ඉල්ලා සිටි අතර එම ඇප ඉල්ලීම සම්බන්ධයෙන් සලකා බැලීම සඳහා එම සැකකරු පිළිබඳව සාක්ෂි සම්පිණ්ඩන වාර්තාවක් අධිකරණයට ඉදිරිපත් කරන ලෙසටද මහෙස්ත්‍රාත්වරිය කොළඹ අපරාධ කොට්ඨාසයට නියෝග කළාය.
ලහිරු ප්‍රසන්න ඇතුගල, ජනක උදය කුමාර, හසිත රොෂාන්, දමිදු ලක්‍ෂාන්, දමිත් අංජන නයනජිත්, ජමෝත් ගිම්හාන, චමිදු තිවංක වීරසිංහ, දේවගේ සමන්ති, උදාර සිල්වා ගුණරත්න, නලින් දුෂාන්ත, මනෝජ් උදයකාන්ත හා ජූලියන් මාධවන් යන සැකකරුවන් සිද්ධිය සම්බන්ධයෙන් රක්ෂිත බන්ධනාගාර ගතකර සිටින අතර ඔවුන් ස්කයිප් තාක්ෂණය ඔස්සේ අධිකරණය වෙත ඉදිරිපත් කෙරිණි.රක්ෂිත බන්ධනාගාර ගත කර සිටින සැකකරුවන්ට ඇප ලබාදෙන ලෙසට ඔවුන් වෙනුවෙන් පෙනී සිටි නීතිඥවරුන් අධිකරණයෙන් ඉල්ලීමක් කළ නමුත් මෙම සිද්ධියට අදාළව තවදුරටත් විමර්ශන සිදු කරන බැවින් සැකකරුවන්ට ඇප නියම නොකරන ලෙසට කොළඹ අපරාධ කොට්ඨාසය කරන ලද ඉල්ලීමක් සලකා බලමින් ඔවුන් මැයි මස 9 දින දක්වා එසේ තවදුරටත් රක්ෂිත බන්ධනාගාරගත කිරීමට මහෙස්ත්‍රාත්වර්ය නියම කළාය.
ඝාතන සිද්ධියට අදාළ හඬ පටයක් පෞද්ගලික ගුවන් විදුලි නාළිකාවක් හරහා ප්‍රචාරය කළ බව කියන එහි වැඩසටහන් අධ්‍යක්ෂවරයකුට මෙම මස 9 දින අධිකරණය හමුවේ පෙනී සිටීමට නොතීසි නිකුත් කරන ලෙසටද අධිකරණයෙන් නියම විය.
- කුමුදු උපුල් ශාන්ත