කොළඹ මහනුවර ප්‍රධාන මාර්ගයේ වරකාපොළ උඩුකුඹුර ප්‍රදේශයේදී පෙරේදා 10 දා රාත්‍රි පදික මාරුවකින් කාන්තාවක් සිය දරු දෙදෙනා සමඟ ප්‍රතිකාර ලබා ගැනීමට ගමන් කරමින් සිටියදී කොළඹ සිට
පේරාදෙණිය දක්වා ධාවනය වෙමින් තිබූ වෑන් රථයක ගැටී මව සහ වැඩිමහල් පුතා මියගොස් අත දරුවකු බරපතළ තුවාල ලබා කැගල්ල මහ රෝහලට ඇතුළත් කර ඇතැයි වරකාපොළ පොලිසිය කියයි.
මෙලෙස ජීවිතක්ෂයට පත්ව ඇත්තේ නෙළුන්දෙණිය, ඔත්නාපිටිය, ලූල්පොළ පදිංචිව සිටි ඩයනා වෙරෝනිකා
තෝමස් නමැති 27 හැවිරිදි කාන්තාවක් හා ඇගේ වයස අවුරුදු 11 ක් වූ අන්දරවාස් පටබැඳිගේ ආකේෂ් ගුණවර්ධන දරුවා බව පොලිසිය කියයි.
අනතුරින් මවගේ තුරුලේ සිටි අවුරුද්දකුත් මාස හතරක් වූ කුඩා පිරිමි දරුවා ඇයගෙන් ගිලිහී මාර්ගය අයිනට විසිවී තුවාල ලබා කෑ ගසමින් සිටියදී ප්‍රදේශවාසීන් වරකාපොළ රජයේ රෝහලට ඇතුළත් කිරීමෙන් අනතුරුව වැඩිදුර ප්‍රතිකාර සඳහා කෑගල්ල මහ රෝහල වෙත මාරුකර යවා ඇත.
මියගොස් ඇති කාත්තාවගේ සැමියා මීගමුව ප්‍රදේශයේ රැකියාවක් කරන අතර මොවුන් මීගමුව ප්‍රදේශයේ සිට මීට මාස කිහිපයකට ඉහතදී නළුන්දෙණිය ප්‍රදේශයේ කුලියට ලබාගත් නිවෙසක පදිංචියට පැමිණ ඇති බවද පොලිසිය කියයි.
සිද්ධිය වූ පෙරේදා 10 දා කාන්තාවගේ සැමියා මීගමුවේ රැකියාවට ගොස් තිබුණු අතර ඇය
නිවසේ සිට ඇත්තේ දරුවන් හා ඇගේ මව සමගය. පෙරේදා දරුවෙකුට ඇතිවූ අසනීප තත්වයකට ප්‍රතිකාර ලබා ගැනීම සඳහා උඩුකුඹුර ප්‍රදේශයේ පෞද්ගලික වෛද්‍ය ප්‍රතිකාර මධ්‍යස්ථානයක් වෙත දරු දෙදෙනා සමග රාත්‍රි 8 ට පැමිණ ඇති බව ද පොලිසිය කියයි. මොවුන් මුඛආවරණ පළඳා නොසිටීම හේතුවෙන් මවෙද්‍යවරයා මුඛආවරණ පළඳවාගෙන එන ලෙස දන්වා තිබුණි.
පසුව විරුද්ධ දෙස තිබූ ඔසුසල වෙත ගොස් මුඛ ආවරණ පළඳවාගෙන පදික මාරුවේ අත දරුවා වඩාගෙන සෙසු දරුවා අතින් අල්ලාගෙන ගමන් කරමින් සිට ඇති බව පොලිසිය කියයි.
පේරාදෙණිය ප්‍රදේශයේ සිට පිය පුතු දෙදෙනකු වෑන් රථයකින් කොළඹ රෝහලක දරුවකුගේ සැත්කමකින් පසු ආපසු
පේරාදෙණිය නිවස දක්වා ගමන් කරමින් සිටියදී උඩුකුඹුර පදික මාරුවේ ගමන් කරමින් සිටි මව සහ දරු දෙදෙනා යට කරගෙන
වෑන් රථය නොනවත්වා කෑගල්ල මූලස්ථාන පොලිසියට පැමිණ සිද්ධිය සම්බන්ධයෙන් ප්‍රකාශයක් ලබාදී තිබූ බව පොලිසිය කියයි.
වෑන් රථයේ රියදුරු වන පේරාදෙණිය ඒ දඬුවාව ලිපිනයේ පදිංචි 62 හැවිරිදි විශ්‍රාමික හමුදා නිලධාරියකු ඔහුගේ පුත්‍රයා වන 33 හැවිරිදි පුද්ගලයා අත්අඩංගුවට ගෙන තිබේ.
සැකකාර පිය පුතු දෙදෙනා ඊයේ 11 දා වරකාපොළ තුල්හිරිය මහෙස්ත්‍රාත් අධිකරණය වෙත ඉදිරිපත් කිරීමට නියමිතව තිබුණි. මියගිය මවගේ හා දරුවාගේ හදිසි මරණ පරික්ෂණ ඊයේ 10 දා වරකාපොළ හදිසි මරණ පරික්ෂක විමලසිරි රාජපක්ෂ මහතා විසින් පැවැත්වීමට නියමිතව තිබුණි.
කෑගල්ල කොට්ඨාස බාර ජ්‍යෙෂ්ඨ පොලිස් අධිකාරි කීර්තිරත්න සහකාර පොලිස් අධිකාරී ජයන්ත අතුකෝරල මහතාගේ උපදෙස් පරිදි කෑගල්ල කොට්ඨාස රථවාහන අංශයේ ස්ථානාධිපති පොලිස් පරික්ෂක ඩී. එස් මාවඩවිලගේ, වරකාපොළ පොලිසියේ රථවාහන අංශයේ ස්ථානාධිපති පොලිස් පරික්ෂක ධර්මරත්න, කෑගල්ල අපරධ ස්ථාන පරිණ බලධාරිහු වැඩිදුරටත් පරික්ෂණ පවත්වති.
(කෑගල අධිකරණ චමින්ද වැවතැන්න වරකාපොළ රුවන්
පතිරණ හා කෑගල ජයරත්න විල්ලර)
