දිනේෂ් උපේන්‍ද්‍ර
හෙරොයින් ග්‍රෑම් 2යි මිලිග්‍රෑම් 350ක් සමග අත්අඩංගුවට ගැනුණු ශ්රී ලංකා ක්රිකට් කණ්ඩායමේ හිටපු වේග පන්දු යවන්නකු ජූනි 1 වැනිදා දක්වා රදවා ප්රශ්න කිරීමට කුලියාපිටිය මහේස්ත්‍රාත් රන්දික ලක්මාල් ජයලත් මහතා අවසර දුන්නේය.මෙසේ රැදවුම් නියෝග ලැබුණේ හෙරොයින් ග්‍රෑම් 2 මිලිග්‍රෑම් 350ක් සමගින් පෙරේදා (25) අත්අඩංගුවට ගැනුණු කලක් ශ්රී ලංකා ජාතික ක්රිකට් කණ්ඩායම නියෝජනය කළ වේග පන්දු යවන්නකු වූ ෂෙහාන් මධුසංක නැමැත්තෙකි.
පන්නල පොලිසිය සැකකරු බී වාර්තාවක් මගින් ඊයේ (26) ඉදිරිපත් කරමින් සැකකරුගෙන් රඳවා ප්රශ්න කිරීමට නියෝගයක් ලබා දෙන්නැයි පොලිසිය කළ සලකා බලමින් ඉහත නියෝග කළේය. පන්නල ඇලබඩගම ප්‍රදේශයේ පදිංචි මෙම සැකකරු අධිකරණයට ඉදිරිපත් කරමින් පොලිසිය කියා සිටියේ මීට පෙර අවස්ථාවකදී ද මොහු මෝටර් රථයෙන් මත්කුඩු ප්‍රවාහනය කරමින් සිටියදී අත්අඩංගුවට ගෙන සිටි බවයි.නිවෙසේ හෙරොයින් තබාගෙන සිටින බවට ලද තොරතුරකට අනුව නිවෙසට ගොස් පරීක්ෂා කිරීමේදී මෙම ක්රිකට් ක්‍රීඩකයා පුටු සැටියකට මුවා වී සිටි බවත් ඔහුට අයත් ක්රීඩා කුසලාන පිරික්සීමේදී හෙරොයින් තොගය සොයාගත් බවත් පොලිසිය අධිකරණය හමුවේ කියා සිටියේය.
පොලිසිය මෙහිදී කරුණු දක්වමින් ඉල්ලා සිටියේ සැකකරුට හෙරොයින් ලැබෙන ආකාරය පිළිබඳව පුළුල් පරීක්‍ෂණයක් කළ යුතු බැවින් රඳවා ප්රශ්න කිරීමට අවශ්‍ය බවය.පන්නල පොලිස් නඩු මෙහෙයුම් ස්ථානාධිපති උප පොලිස් පරීක්‍ෂක තිලකරත්න මහතා සැකකරු ඉදිරිපත් කරමින් එම නියෝගය ඉල්ලා සිටියේය.
