දේශපාලන පක්ෂ කිහිපයක් සහ සිවිල් සංවිධාන කිහිපයක් එකතු වී ‘සර්ව ජන බලය' නමින් නව දේශපාලන ව්‍යාපාරයක් ඊයේ (27දා) පිහිටුවා ගත්තේය. 'එක්ව නංවන රටක් - සතුටු පිරුණු දැයක්' යන්න තේමා කරගනිමින් මෙම නව දේශපාලන ව්‍යාපාරය පිහිටුවා තිබේ.එම දේශපාලන ව්‍යාපාරය පිහිටුවීමේ ලිඛිත ගිවිසුමට ඊයේ (27දා) කොළඹදී අත්සන් තබනු ලැබීය.
මෙම නව දේශපාලන ව්‍යාපාරය සඳහා පිවිතුරු හෙළ උරුමය වෙනුවෙන් උදය ගම්මන්පිල, ජාතික නිදහස් පෙරමුණ වෙනුවෙන් විමල් වීරසිංහ, මව්බිම ජනතා පක්ෂය වෙනුවෙන් දිලිත් ජයවීර, ප්‍රජාතන්ත්‍රවාදී වාමාංශික පෙරමුණ වෙනුවෙන් නියෝජ්‍ය ලේකම් පී.පී.ඩී.වී. තිලකසිරි (වාසුදේව නානායක්කාර වෙනුවෙන්), ශ්‍රී ලංකා කොමියුනිස්ට් පක්ෂය වෙනුවෙන් වෛද්‍ය ජී.වීරසිංහ, යුතුකම ජාතික සංවාද කවය වෙනුවෙන් ගෙවිදු කුමාරතුංග සහ පාර්ලිමේන්තු මන්ත්‍රී මහාචාර්ය චන්න ජයසුමන මහතා ප්‍රමුඛ ස්වාධීන මන්ත්‍රී සංසදය ද මෙහි ගිවිසුම්ගත විය.මෙහිදී පක්ෂ නායකයන් අදහස් දැක්වීය.මෙහිදී අදහස් දක්වමින් ජාතික නිදහස් පෙරමුණේ නායක පාර්ලිමේන්තු මන්ත්‍රී විමල් වීරවංශ පැවසුවේ, 'වාමාංශික ලිබරල්වාදයට හා දක්ෂිණාංශික ලිබරල්වාදය යන දෙකටම ව්රුද්ධව ඇත්ත ජාතිකවාදී දේශපාලන ගමනක් යාම සඳහා සර්ව ජන බලය සමග එකතු වන ලෙස' ඔහු ජනතාවට ආරාධනා කළේය.
"අද ලෝකයේ ප්‍රධාන රටවල දේශපාලන දහම තමයි නව ලිබරල්වාදය, නව ලිබරල්වාදය කියලා කියන්නේ රාජ්‍ය අතුරුදහන් කරනවා. රාජ්‍ය භූමිකාව අහිමි කරන්න ඕන. ඒ වගේම සාමුහිකත්වය බිද දමන්න ඕන. ඕක තමයි නව් ලිබරල්වාද දර්ශනය. ඒ වගේම දක්ෂිනාංශ ලිබරල්වාදය බොරුවට හරී බුදුදහමට ගරු කරනවා. හැබැයි වාමාංශික ලිබරල්වාදය ඒ ගැන. මුකුත් නොකියා සද්ද නැතුව ඉන්නවා. දක්ෂිණාංශ ලිබරල්වාදය බොරුවට හරි දළදා මාලිගය වන්දනාමාන කරනවා මල් වට්ටියක් අරගෙන ගිහින්, වාමාංශික ලිබරල්වාදය දළදා මාලිගය පැත්ත පළාතේ නොගිහින් ඉන්නවා, ඒක දැක්කාම නයාට අඳුකොළ වගේ. දැන් බෞද්ධ සංස්කෘතියට දක්ෂිනාංශ ලිබරල්වාදය එළිපිට පහර දෙන්නේ නැහැ. මෙම ලිබරල්වාද දෙකටම විරුද්ධව ඇත්ත ජාතිකවාදී දේශපාලන ගමනක් යාම සදහා සර්ව ජන බලය සමග එකතු වෙන්න."යනුවෙන් පැවසීය.
පිවිතුරු හෙළ උරුමයේ නායක උදය ගම්මන්පිල පැවසුවේ, "සමහරු බලාගෙන හිටියේ මෙවර මැතිවරණයෙන් ජාතික ව්‍යාපාරය වළ දාලා මල බත කන්න, ජාතික ව්‍යාපාරය මරන්නත් බැහැ, මැරෙන්නෙත් නැහැ. අපි සැම එකතුවෙලා ඒක මරන්න දෙන්නෙත් නැහැ, මව්බිම ගිනිගන්නා විට මේ මව්බිම ගිනි තැබුවේ කවුදැයි සොයමින් එකිනෙකාට ඇගිලි දිගු කරනවා මිස මේ ගින්න නිවන්න. උත්සහ කරන්නේ නැහැ. අද අපි එකතු වෙන්නේ ඒ විවේචන ගොන්නට අලුත් විවේචනයක් එකතු කරන්න නෙවේ. විසදුම කුමක්ද කියන හරවත් සංවාදය මේ සමාජය තුළ ඇති කර ගැනීමටයි. ඒ නිසා තමයි අපි ජාතියට පොරොන්දු වෙන්නේ ආර්ථික සංවර්ධනයත් සමග තුලනාත්මකව ඉදිරියට යාම සඳහා අප සමග එකතු වෙන්න." යනුවෙන් පැවසුවේය.මෙහිදී අදහස් දැක්වූ පාර්ලිමේන්තු මන්ත්‍රී චන්න ජයසුමන මහතා, 'මීළඟ නායකයා කවුදැයි තීරණය කිරීම සදහා ඇති අභියෝගයට මුහුණ දීම වෙනුවෙන් සර්වජන බලය ආරම්භ කළ' බව සඳහන් කළේය.
"මේ රටේ ජාතික ව්‍යාපාරයට ලක්ෂ කියක් තියේද, අපි ඒ තරම් දුර්වල නැහැ. අපි නැගිට්නවා අළු ගසා දාලා, ඒකාන්ත වශයෙන්ම මේ රටේ ඊළග ජනාධිපති බිහි කරන්නෙත්, අගමැති බිහි කරන්නෙත් අපට ඕන කෙනයි. අපේකම සමග කාටවත් සෙල්ලම් කරන්න දෙන්න. බැහැ. අපේ මිතුරන් සතුරන් කවුද කියලා අපි හොඳට දන්නවා. සැලකිය යුතු මන්ත්‍රීවරුන් සංඛ්‍යාවක් ඉදිරි සති කිහිපයේදී අප සමග එකතු වෙනවා. සර්වජන බලය සර්වජන වශියක්ම වේවා යැයි මම ප්‍රර්ථනා කරනවා." යනුවෙන් ද පැවසීය.
එහිදී අදහස් දැක්වු මව්බිම ජනතා පක්ෂයේ නායක දිලිත් ජයවීර මහතා මෙසේ පැවසීය. "මව්බිම ජනතා පක්ෂය පසුගිය කාලයක් තිස්සේ දැඩි ලෙස උත්සහ කළා ජාතිකවාදී කඳවුර එක්තැන් කර ගන්න. අපි වසර 30කට ආසන්න කාලයක් උත්සහ කළා ලංකාවේ ජාතිකත්වය අපේ ජාතිකවාදී කඳවුර දැක ගැනීමට, මම හැමවිටම නියෝජනය කළ කඳවුර අද තීරණාත්මක ලෙස එකතු වී තිබෙනවා. මෙහි ප්‍රධාන මහා පොදු සාධකය ජාතිකත්වය සහ මනුස්සකම, ඒ වගේම සත්භාවය. ප්‍රධාන ධාරාව වන ජාතිකත්ව ධාරාව අපේ රටේ ජීවනාලිය. එය රැක ගැනීම සඳහායි අපි හැමදාම උත්සහ කළේ. ඒ සඳහා මම දැනට පාර්ලිමේන්තුවේ සිටින මන්ත්‍රීවරුන් 193කු හමු වෙලා තියෙනවා. මම ඉන් 53කු සමග සමීපව සාකච්ඡා කළා. තව මිතුරන් අප සමග එකතු වෙයි.
රට වෙනුවෙන්, ඔබ වෙනුවෙන්, ජනතාව වෙනුවෙන් දේශපාලනය ඉතුරු වෙලා තියෙන තැන තමයි සර්වජන බලය, ඒ නිසා අපිට අපේ රට නැති වෙන්නට යන මේ තීරණාත්මක මොහොතේදී ඔබ සියලු දෙනා එකතු වෙන්නට ඕන. ඔබගේ පෞද්ගලික පටු අභිලාෂයන් පැත්තක තියලා එකට යන්න පුළුවන් ගමනක් නිර්මාණය කරගෙන යමු. ඒ සඳහා අපි සමග එකතු වෙන්න." යනුවෙනි.
නවෝද්‍යා පවනී
