ජාතික තවුහිද් ජමාද් සංවිධානයේ මොහොමඩ් සහ්රාන් හෂීම් 2016 වර්ෂයේ සිට අන්තවාදී ක්‍රියා සිදුකර ඇතැයි තමන් ඉහළ නිලධාරීට වාර්තා කර ඇතැයි රාජ්‍ය බුද්ධි සේවයේ හිටපු අධ්යක්ෂ, නැගෙනගිර පළාත භාර ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන මහතා පාස්කු ඉරුදින ප්‍රහාරය සම්බන්ධව විමර්ශනය කරන ජනාධිපති විමර්ශන කොමිසම හමුවේ සාක්ෂි ලබා දෙමින් ඊයේ (28) පැවසීය.
මාවනැල්ල බුදුපිළිමවලට හානි කිරීම සහ වනාතවිල්ලුව පුපුරණ ද්‍රව්‍ය සොයා ගැනීම සම්බන්ධයෙන් මොහොමඩ් සහ්රාන් යන අය සම්බන්ධ බව තමන් ජාතික ආරක්ෂක කවුන්සිලය වෙත ලිඛිතව සහ වාචිකවම දැනුම් දී ඇති බවද ජ්‍යෙෂ්ඨ නියෝජ්‍ය පොලිස්පතිවරයා සිය සාක්ෂියෙන් ඉදිරිපත් කළේයෙ. මෙහිදී වැඩිදුරටත් සාක්ෂි ලබා දෙමින් රාජ්‍ය බුද්ධි සේවාවේ හිටපු අධ්යක්ෂ, නැගෙනහිර පළාත භාර ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන මහතා මෙසේ ද ප්‍රකාශ කළේය.
බුරුමයෙන් පැමිණි සරණාගතයන් වන රෝහින්‍යා පිරිස මෙරටට පැමිණීම අපි දුටුවා. ඉන්දියාවෙන් පිටමං කරපු මේ අය බෝට්ටුවකින් තමයි අපේ රටට ආවේ. ඒ අය මුදල් ගෙනාවා. අපේ සිංහල සමාජය මේ අයගේ පැමිණීමට දැඩි ලෙස විරුද්ධ වුණා. මේ අය අතර අයි.එස්. සංවිධානයේ අය හිටියා කියලා තොරතුරු ලැබුණේ නැහැ. ඒත් මේ ප්‍රශ්නය බුද්ධියෙන් මානසිකව විසඳන්න ඕනෑ ගැටලුවක්. මොකද මේක ආගමික සටනක්. අයි.එස්. වගේ සංවිධානවල අය හැමතිස්සේම වන්ද්‍යාකරණය වගේ සමාජමය ගැටලු එද්දී වගේම අලුත්ගම වගේ ප්‍රශ්න එද්දී මේ අය හැසිරෙන්නේ මේ විදිහට. සහ්රාන් වුණත් අලුත්ගම ප්‍රදේශයේ සිද්ධියේදී වෙඩි වැදිච්ච තරුණයාගේ ගෙදරට ගිහින් එයාට ත්‍රිරෝද රථයක් අරන් දුන්නා. ඊට පස්සේ ඔහුට දීපු ටාගට් එක තමයි අන්තර්ජාලය එක්ක සම්බන්ධ වී සිටින්න කියලා. මේක තමයි සහ්රාන්ලා වැපුරුවේ.
කොමිසම : බුරුමයෙන් පැමිණි රෝහින්‍යා සරණාගතයන්ට ජමාත් ඉන්දියන් සංවිධානයක් උදව් කළා කියලා රාවයක් ගියා. මේ අයට ලංකාවේ ජමාතේ ඉස්ලාමික සංවිධානයෙන් උදව් කළාද?
සාක්ෂිකරු : ඒ ගැන සෘජු දැනුමක් නැහැ.
නියෝජ්‍ය සොලිසිටර් ජනරාල්වරිය : රෝහින්‍යා සරණාගතයන් සම්බන්ධයෙන් ඔවුන්ට උදව් කරන්න ඕන කියලා ශ්‍රී ලංකා රජය පියවර ගත යුතුයි කියලා සහ්රාන් හෂීම් උද්ඝෝෂණයක් කළාද?
සාක්ෂිකරු : බුද්ධි සේවාවක් විදිහට ඒක පාලනයෙන් ගිලිහී ගියා කියලා අපි පිළිගන්න ඕනෑ. සහ්රාන් එහෙම කළා කියලා අපි වාර්තවක් ඉදිරිපත් කළා. මේ ලේඛනය හිටපු බුද්ධි අධ්යක්ෂ වශයෙන් මා නීතිය සාමය පිළිබඳ අමාත්‍යංශයේ ලේකම්වරයා වූ පද්මසිරි ජයමාන්න මහතා වෙත යොමු කළා. එහි පිටු 04ක් තිබුණා. සහ්රාන්, ජිහාඩ් කියලා අර්ථ දැක්වූයේ අන්‍යාගමිකයන්ට එරෙහිව සිදුකරන සටනක් පිළිබදවයි. ජීවිතයේ විශාල කාලයක් මෙරට මුස්ලිම් පාසල් පද්ධතියේ නබිතුමා ගැන හරිහැටියට ඉගැන්වීමක් නොකරන බවත්, තරුණ පරපුර දෙවියන් වෙනුවෙන් මිය යාම භාග්‍යයක් බව ඔහු කියලා තිබෙනවා. මේ ආකාරයෙන් කියන වීඩියෝවක් ඔහු අන්තර්ජාලයට යොමු කර තිබුණා. එය මුස්ලිම් තරුණ සමාජය නරඹලා තිබුණා. සමහරුන් එයට ප්‍රතික්‍රියා දක්වා තිබුණා. මා මෙම ලිපියෙන් දන්වා සිටියේ දැඩි මතධාරි මුස්ලිම් තරුණයන් සහ්රාන් වටා එකතු වී ඇති බව නිරික්ෂණය වන බව. සහරාන් 2016 වර්ෂයේ සිටම අයි.එස්. ත්‍රස්ත ක්‍රියාකාරකම් අධ්‍යයනය කරමින් සිටියා. 2018 අප්‍රේල් 19 වැනිදා සහ්රාන් අත්අඩංගුවට ගන්න ඕන කියලා දැනුම් දුන්නා. සිරියාවෙන් තහනම් කළා ඒ රටට එන්න එපා තමගේ රටවල්වලට වෙලා ජිහාද් කරන්න කියලා. ඒක සහ්රාන්ට පොඩි තල්ලුවක් වුණා.
නියෝජ්‍ය සොලිසිටර් ජනරාල්වර්යා : අබු බැග්ඩැඩ් කොයි වගේ බලපෑමක් ද මුස්ලිම් ජනතාව වෙත කළේ?
සාක්ෂිකරු : ඔසාමා බින්ලාඩන්ට වඩා අබු බැග්ඩෑඩ් කෲර අයෙක්. 2017 දී ඔහු උපදෙස් දෙන්නේ තමන් ඉන්න තැන ඉඳලා අයි.එස්. සංවිධානයේ ඉදිරි ප්‍රගමනයට කටයුතු කරත්ත කියලා. ඔහු කියලා තියෙන්නේ ලැව් ගින්නක් ඇති කරන්න බෝම්බ ඕනෑ නැහැ, කොළ කෑල්ලක් අරගෙන කැලයක් ගිනි තියන්න කියලා. හාඩ් ටාගට් (අසීරු ඉලක්කය) එකක් කියන්නේ ජනාධිපති කෙනෙක්, එයාපෝට් එකක් වගේ ඒවාට ප්‍රහාර එල්ල කිරීම වගේ දේවල්. ඒවාට අමාරුයි. කාලයක් ඔත්තු බලලා කරන්න ඕනෑ දෙයක්. සොෆ්ට් ටාගට් (පහසු ඉලක්ක) වගේ එකක් කියන්නේ පිහියෙන් කැපුවා වාහනයක හැප්පුවා වගේ ලෙහෙසියෙන්ම කරන්න පුළුවන් දේවල්. 2015 දී මෙල්බන්වලදී පොඩි ළමයකුට තුවක්කුවක් දීලා පොලිස්කාරයකුට වෙඩි තියත්ත කියලා කිව්වා. පැරිස්වලදී සංගීත සංදර්ශනයකට ගැහුවා. ඩකාරිවල බේකරියකට ගැහුවා. ඒ වගේ සොෆ්ට් ටාගට්වලට ගහන්න කියලා තමයි අයි.එස් අය නිතරම කිවේ.
ලංකාවේ වගේ තැන් කිහිපයකම තායිලන්තයේත් ප්‍රහාර එල්ල වුණා. ඒත් ලංකාවේ තරම් ප්‍රබල වුණේ නැහැ. මේ අය බුදු පිළිමවලට වඳින එක ගැන විරුද්ධයි. ඒක දකින්නේ වැරදි විදිහට. මේ අය එල්.ටී.ටී.ඊ. එකේ අය වගේ නොවෙයි. මේ අය රට ගිහිල්ලා තියෙනවා. සල්ලි තියෙනවා. කෝටිපතියෝ. බී.එම්.ඩබලිව් වල යන්නේ. සහ්රාන් මැරුණේ ඇයි කියලා ප්‍රශ්නයක් තිබුණා. සහ්රාන් කියන්නේ ඒ අය අර්ථකථනය කරන නායකයෙක්. කොළඹ ඉන්න සහෝදරයෝ දෙන්නා එක්ක ගියේ. ස්ථාන 8ක් පුපුරන්න හිටියා. 6යි පිපිරුවේ. පල්ලියකට ගිහිල්ලා වඳින එක ගැන ඒ අය අධ්‍යයනය කළා. පොළොව ලෙයින් තෙත් කරන එක ගැනයි ඒ අධ්‍යයනය කළේ. බැග්ඩෑඩ් එළියට ඇවිල්ලා කියනවා සහ්රාන් ඒ අයගේ වීරයෙක් කියලා. ඒ අය හිතපු දේ අවශ්‍ය දේ එයාලා කරගත්තා. පාකිස්ථානය, ඇෆ්ගනිස්ථානය, ඉන්දියාව, බංග්ලාදේශය සහ ශ්‍රී ලංකාව යන රටවල්වලින් ලංකාවේ පත්වුණ අමීර්වරයා වශයෙන් සහ්රාන් පත්වෙලා තිබුණා. අමිර් ඔෆ් සහ්රාන් වශයෙන්. බංග්ලාදේශයෙන් ද අමීර් කෙනෙක් බිහි වුණා කියලා ආරංචි වුණා.
ජාතික තවුහිද් ජමාද් සංවිධාංගනයේ නායකත්වය පිළිබඳව ගැටලුවක් එඩේරමුල්ල ගෙදරදී ඇතිවුණා. කෙසේ වෙතත් සහ්රාන් නෙමෙයි මෙහි නිර්මාතෘ. නවුෆර් මවුලවි තමයි මෙහි නිර්මාතෘ.
මා හිටපු පොලිස්පති පූජිත් ජයසුන්දර මහතා වෙත ලිපියක් යොමු කළා. සහරාන් ඇතුළු කණ්ඩායම වීඩියෝ පටයක් අන්තර්ජාලය වෙත යොමු කළා කියලා. මා එම ලිපියෙන් සඳහන් කර සිටියේ සහ්රාන් අත්අඩංගුවට ගත යුතුයි කියලා. ඒ වගේ මා නීතිය හා සාමය පිළිබඳ අමාත්‍ය රංජිත් මද්දුම බණ්ඩාර මහතා වෙතද ලිපියක් යොමු කළා. නිසි ක්‍රමවේදයකින් තොරව ආගමික ස්ථාන පවත්වාගෙන යාම ගැටුම්කාරී තත්ත්වයකට හේතුවක් කියලා මම ඒ ලිපියෙන් දැනුම් දුන්නා. ආගමික කරුණු හේතුකොටගෙන මෙරට යම් ගැටලුවක් මතුවිය හැකි බවත් ඒ සඳහා යම් පොදු නීති මාලාවක් හඳුන්වාදිය යුතු බවත් මා අමාත්‍යවරයා වෙත එම ලිපියෙන් දැනුම් දුන්නා.
විදේශ ආධාර ලබමින් ඉස්ලාම් භක්තිකයින් පල්ලි ඉදිකරනවා. බැංකු ගිණුම් බැලුවම රුපියල් පනස්දහයි තියෙන්නේ. ඒත් ඉඩමයි බිල්ඩිමයි රුපියල් කෝටි දෙකක් තුනක් වෙනවා. පිටකොටුවේ මනි එක්ස්චේන්ජ් එකට ගිහිල්ලා බැලුවාම මේ සල්ලි කොහොමද ලැබෙන්නේ කියලා පේනවා. මා මේ ගැන ආරක්ෂක කවුන්සිලයට නිතරම දැනුවත් කළා. මේ මුදල් ගලා එන්නේ කොහෙන්ද කියලා තේරෙන්නේ නැහැ. ආගමට හරවා ගැනීමට මේ අය මුදල් වියදම් කළා. අබ්දුල් රාසික්ගේ සංවිධානය හරහා පුලස්තිනි නොහොත් සාරා නමැත්තිය හස්තූන්ට කසාද බැන්දුවා කියලා දන්නවා.
පුලස්තිනිගේ අම්මා කියන්නේ ඇය බලෙන් ආගමට හැරෙව්වා කියලා. සහ්රාන් විශුද්ධිකාරක බද්ද හෙවත් “සකාත්" යන්න ගැන දැනුවත් කර තිබුණා. සහ්රාන් කියන්නේ අනුගාමිකයින් තමන් උපයන මුදලින් කොටසක් නබිතුමා වෙත යෙදවිය යුතු බවත් කුරානය අනුව එම සකාත් මුදල බෙදා දෙන්න ඕනෑ කියලා කියනවා. ආදායම් ලබන කට්ටිය නිදහස ලැබීමට සිටින මහලු අයට, ණය ලබාගෙන ගෙවීමට නොහැකි අයට වගේම ආගමට බැඳෙන අයට ලබාදීමට සහ්රාන් සකාත් බෙදිය යුතු ආකාරය ගැන සඳහන් කර තිබුණා.
සහ්රාන් 2016 වසරේ සිට අන්තවාදී ක්‍රියා සිදුකර ඇති අතර 2017 මාර්තු 18 වැනිදා කාත්තන්කුඩි ප්‍රදේශයේ ගැටලුකාරී තත්වයෙන් අධිකරණය මගහැර සැඟවී සිටියා. ඔහු සිටින ස්ථානය පිළිබඳව මා දැනුම් දුන්නා. ඒ පිළිබඳව හිටපු පොලිස්පති පූජිත් ජයසුන්දර මහතා වෙතද මා දැනුම් දුන්නා. ඒ වග්ම මා දැනුම් දුන්නා ටෙලිග්‍රෑම් ගිණුම හරහා සහ්රාන් සිය අනුගාමිකයන් අමතන බව. සහ්රාන් සිය අනුගාමිකයන් අමතා කියා තිබුණා තමන් විදේශගත වෙලා කියලා. ඒත් ඔහු නාරම්මල කැකුණගොල්ල ප්‍රදේශයේ බිරිඳගේ නිවෙස් සැඟවී සිටියා. සහ්රාන්ගේ එෆ්බී ගිණුම ප්‍රතිත්‍රස්ත විමර්ශන කොට්ඨාසය විසින් අක්‍රිය කළා කියලා මට දැනගන්න ලැබුණා. සහ්රාන් කළ බුද්ධි මෙහෙයුමක් ගැන මා ජාතික බුද්ධි ප්‍රධානියාට දැනුම් දුන්නා. ශයිනි කියන පුද්ගලයා ඔහුගේ සංවිධානයෙන් 2018 අගෝස්තු 31 වැනිදා ඉවත් කළ බව සඳහන් සිද්ධියක් ගැන එහි සඳහන් වෙලා තිබුණා. අපරාධකරුවන් කෙරෙහි අල්ලා දෙවියගේ ශාපය තීව්‍ර වී ඇත කියලා. ඔහු මේ බව අන්තර්ජාලය මගින් තමයි ප්‍රචාරය කරලා තිබුණේ. කුරුසකරුවන්ගේ සිංහාසනය විනාශ කරමු මැයෙන් වීඩියෝ පටයක් ද සහ්රාන් අන්තර්ජාලයට නිදහස් කරලා තිබුණා. යුදෙව්වන්ට බිය නොවන්න, අන්‍යාගමිකයන්ගේ හිස ගසා දමන්න ආදී වශයෙන් එහි තිබුණා. අපි ප්‍රජාතන්ත්‍රවාදී කුඩුවක සිරවී සිට අන්‍යාගමිකයන්ට බියෙන් සිටිනවා යනුවෙන් ද සහ්රාන් එහි සඳහන් කර තිබුණා. සහරාන්, අක්‍රම් බින් අබු වශයෙන් හැඳින්වුවා. අබු නාමයෙන් හඳුන්වන්නේ වීරත්වය. සෙයිලානි යන වචනය යොදා ගත්තේ ශ්‍රී ලංකාව සම්බන්ධයෙන් සඳහන් කිරීමේදීයි. ප්‍රථමයෙන්ම සිරියාවේදී මියගිය ශ්‍රී ලාංකිකයා වූ නිලාම්ටත් ඒ වගේ නමක් දාලා තිබ්බා. මා හිටපු පොලිස්පතිවරයාට ලිපියක් මගින් දැනුම් දුන්නා මාවනැල්ල බුදු පිළිම කැඩීමේ සිද්ධියට සහ්රාන් ඇතුළු කණ්ඩායමේ සම්බන්ධයක් ඇති බවට. මාවනැල්ල බුදුපිළිම සිද්ධිය හරියට විමර්ශනය කරන්නේ නැහැ කියලා ඒ ප්‍රදේශයේ මිනිස්සු කිව්වා .
කොමිසම : බුදු පිළිම වලට හානි කිරීමේ සිද්ධිය පිළිබදව කලින් තොරතුරු හොයාගන්න ඔබලාට බැරි වුණා නේද?
සාක්ෂිකරු : ඔව්.
කොමිසම : ඔබේ බුද්ධි අංශ අසමත් වෙලා නේද?
සාක්ෂිකරු : එම තොරතුරු ලබා ගැනීමට අසමත් වුණා. රාත්‍රියේදී සිදුවන ඒකල සිද්ධියක් පිළිබඳව බුද්ධි අංශය සක්‍රීය වෙන්නේ නැහැ.
කොසම : වනාතවිල්ලුව ලැක්ටෝවත්ත පුපුරන ද්‍රව්‍ය ගබඩාව ගැනවත් දැනගෙන හිටියේ නැද්ද ඔබලා? රාජ්‍ය බුද්ධ සේයට ඒ තොරතුරු ලැබිලා නැහැ. යුද හමුදා බුද්ධි අංශවලට මේ පිළිබඳ දැනිලා නැහැ. ලංකාවේ ක්‍රියාත්මක වෙච්චී කිසිම බුද්ධි අංශයකට මේ ගැන අනාවරණය වෙලා නැහැ. බුද්ධි අංශ මේකෙදී අසාර්ථක වෙලා නේද?
සාක්ෂිකරු : බයිසිකලයකින් ඇවිල්ලා බුදු පිළිමයක් කැඩුවා කියලා මගේ නිලධාරින්ට එහෙම බලපෑම් එල්ල කරන එක වැරදියි. මේ පිරිස් මානසික උන්මාදයෙන් පෙළෙන අය. මේ වනාතවිල්ලුව සිද්ධිය කිසිම බුද්ධි අංශයකට ආවේ නැහැ. සී. අයි.ඩී. එක තමයි අන්තිමට සොයා ගත්තේ. මේක ආගමික මතවාදයක් සහිත දෙයක්.
- නිමන්ති රණසිංහ -
