ශ්‍රී ලාංකේය සම්භවයක් සහිත භවිත‍්‍රා ගණනාථන් නම් 19 හැවිරිදි රංගන ශිල්පිනිය, ලන්ඩනයේ OVO Arena Wembley හි පැවැත්වීමට නියමිත "Diwali Story: The Journey of Ram - A Musical" දැවැන්ත රංග සංදර්ශනයේ සීතාගේ චරිතය නිරූපණය කරමින් සිය වෘත්තීය රංගන දිවිය ආරම්භ කිරීමට සූදානම් වෙයි. 2026 සැප්තැම්බර් 27 වන ඉරිදා පැවැත්වෙන මෙම ප්‍රසංගයේදී රාම්ගේ චරිතය රඟදක්වන කිරන් කානන් සමඟ ඇය ප්‍රධාන චරිතයෙන් රංගනයෙන් එක්වන අතර, වෘත්තීය රංගන ශිල්පීන්ට අමතරව සියයකට ආසන්න ප්‍රජා රංගන ශිල්පීන් පිරිසක් ද මෙයට දායක වෙති. නොවැම්බර් මස රෝයල් ඇල්බට් හෝල් හි පැවැති සියලුම ප්‍රවේශ පත්‍ර අලෙවි වූ සාර්ථක දැක්මෙන් පසුව සංවිධානය වන මෙම නව නිෂ්පාදනයට නව අංග සහ තනු ඇතුළත් වේ. ලේඛිකාවක මෙන්ම විශ්වවිද්‍යාල ශිෂ්‍යාවක ද වන භවිත‍්‍රා, වයස අවුරුදු පහේදී 'The Little Mermaid' නිෂ්පාදනයක උර්සුලාගේ චරිතය නිරූපණය කරමින් රංගනයට පිවිසියා ය.
පසුව වසර 14 ක කාලයක් පුරා ජාතික යොවුන් රංගපීඨය සහ රෝස් රංගපීඨය වැනි ආයතන හරහා පුහුණුව ලැබූ ඇය, දැනට Collective Acting Studio හි පුහුණුව ලබන අතර 2024 දී National Iris Breuer Writing සම්මානය ද දිනා ගත්තා ය. අවුරුදු හතේ සිට සිය නැන්දණිය වන මීනා ඉලංකුමාරන් යටතේ භරතනාට්‍යම් හැදෑරූ ඇය 2025 මාර්තු මාසයේදී සිය අරංගේත්‍රම් රංගනය අවසන් කළ අතර, වයස අවුරුදු 12 සිට කර්නාටක සංගීතය ද හදාරා ඇත. සීතාගේ චරිතය සහ ශ්‍රී ලංකාව අතර ඇති සම්බන්ධය පිළිබඳව අදහස් දක්වමින් භවිත‍්‍රා සඳහන් කළේ, රාමායණ කතාවේ වැදගත් කොටසක් ශ්‍රී ලංකාව හා සබැඳෙන බැවින් මෙම චරිතය නිරූපණය කිරීම තමාට විශේෂ අර්ථයක් ගෙන දෙන බවයි. එමගින් දිවයිනේ භූ දර්ශනය, ඉතිහාසය සහ සම්ප්‍රදායන් සමඟ ඇති ප්‍රබල සබඳතාව ගවේෂණය කරමින් මෙම කාලානුරූපී කතාව අලුත් පරම්පරාවකට දායාද කිරීමට අවස්ථාව ලැබෙන බව ඇය පැවසුවා ය.
මෙම සංගීතමය නාට්‍යය ආරම්භ වන්නේ නූතන බ්‍රිතාන්‍ය පවුලක ලව් නමැති යොවුන් තරුණයාට ඔහුගේ සීයා සහ මිත්තණිය විසින් රාම් සහ සීතාගේ කතාවේ ගැඹුරු අර්ථය පැහැදිලි කරදීමත් සමඟ ය. විවිධ පරම්පරාවල ප්‍රේක්ෂකයින් ආකර්ෂණය වන පරිදි සකස් කර ඇති මෙම නිෂ්පාදනය මගින් පිටුවහල් කිරීම, කැපකිරීම්, යුතුකම සහ දුෂ්කර තීරණ පිළිබඳව ප්‍රේක්ෂකයා හමුවේ තබයි. ඉන්දීය සංගීත නිර්මාණක රාහුල් රනඩේගේ මුල් තනු සහ සංගීතය ඇතුළත් වන මෙම ප්‍රසංගයට ප්‍රකට ගායිකා පද්මශ්‍රී කවිතා ක්‍රිෂ්ණමූර්ති ද නව සංගීත තනුවලින් දායක වේ. මෙහි අලුතින් එකතු කරන ලද තෙවන කොටස මගින් දීපාවලි උත්සවයේ දින පහ සහ නූතන පවුල් සම්ප්‍රදායන් කෙරෙහි රාමායණයේ සදූපදේශයන්හි බලපෑම ගවේෂණය කෙරේ. සාමීර් භම්රාගේ අධ්‍යක්ෂණයෙන් සහ සහ-ලේඛනයෙන් නිර්මාණය වන මෙම ප්‍රසංගය Sanatan Events Ltd ආයතනය විසින් The Palan Foundation සහ Golden Tours සමඟ එක්ව සංවිධානය කරනු ලබයි.
