ගයාන් සූරියආරච්චි
මැදනාත්තන්ඩිය ප්‍රදේශයේදී පසුගිය 22 වැනිදා රාත්‍රියේ වෙඩි තබා ඝාතනය කෙරුණු මත්ද්‍රව්‍ය ජාවාරම්කාරියක බව කියන එදිරිසිංහ ආරච්චිලාගේ වසන්ති චතුරානි හෙවත් සුද්දී නමැති රූමත් කාන්තාවගේ ඝාතනයට අදාළව කරන ලද පරීක්‍ෂණවලදී හෙළි වූ තොරතුරු මත තරුණයෝ දෙදෙනෙක් පොලිසියේ දංකොටුව නිලධාරීන් කණ්ඩායමක් විසින් පෙරේදා මාදම්පේ, ඉරට්ටකුලම ප්‍රදේශයේදී අත්අඩංගුවට ගනු ලැබූහ. මෙසේ අත්අඩංගුවට ගැනුණේ ප්‍රදේශයේ ඉරට්ටකුලම තාවකාලිකව පදිංචිව සිටින ආරච්චිකට්ටුව, කෝට්ටපිටිය ස්ථීර පදිංචිකරුවකු වන විසි හය හැවිරිදි තරුණයකු සහ ඉරටන්කුලම ප්‍රදේශයේ විසි තුන් හැවිරිදි ත්‍රිරෝද රථ රියැදුරෙකි.
ආරච්චිකට්ටුව, කෝට්ටපිටිය ප්‍රදේශයේ 26 තරුණයාගේ සහෝදරියක විවාහ වී ඉරට් කුලම ප්‍රදේශයේ පදිංචිව සිටින අතර 26 හැවිරිදි තරුණයා ද එම සහෝදරියගේ නිවෙසේ තාවකාලිකව පදිංචිව සිට ඇත. වසන්ති චතුරානි හෙවත් සුද්දී නමැති කාන්තාව වෙඩි තබා ඝාතනය කිරීමෙන් අනතුරුව එම යතුරුපැදිය පදවාගෙන ගිය බව කියන යුද හමුදාවේ හිටපු සෙබළා එම යතුරුපැදිය විනාශ කිරීම සඳහා මෙම සැකකරුට ලබා දී තිබෙන බවට තොරතුරු ලැබී ඇතැයි උසස් පොලිස් නිලධාරියෙක් පැවැසීය. කෝට්ටපිටිය ප්‍රදේශයේ ස්ථීර පදිංචිකරුවකු වන තරුණයාගෙන් දීර්ඝ ලෙස ප්‍රශ්න කිරීමේ දී එම කාන්තාව ඝාතනය කිරීම සඳහා යාමට යොදාගත්තේ යැයි කියන යතුරුපැදිය සිය සහෝදරිය පදිංචිව සිටින නිවෙස පිටුපස ඇති වැසිකිළි වළට දමා ඇති බවට තොරතුරු හෙළිවිණි යැයි ද පොලිසිය පවසයි. සැකකාර තරුණයා හෙළි කළ තොරතුරු අනුව වෙන්නප්පුව දංකොටුව පොලිසියේ විශේෂ පොලිස් කණ්ඩායමක් එම වැසිකිළි වළ ඊයේ සෝදිසියට ලක් කර සඟවා තිබූ යතුරුපැදිය ගොඩ ගනු ලැබීය.
මත්ද්‍රව්‍ය ඡාවාරම්කාරියක බව කියන වසන්ති චතුරානි හෙවත් සුද්දී නමැත්තිය ඝාතනය කළ බව කියන පාතාල වෙඩික්කරුවකු යැයි පැවැසෙන පුද්ගලයා ත්‍රිරෝද රථයකින් ප්‍රවාහනය කිරීම සහ එම ඝාතනය සඳහා යොදාගත් ගිනි අවිය වත්තල ප්‍රදේශය දක්වා රැගෙන ගිය බවට පැවැසෙන ඉරට්ටකුලම ප්‍රදේශයේම පදිංචි 23 හැවිරිදි ත්‍රිරෝද රථ රියැදුරකු ද මේ සමග අත්අඩංගුවට ගෙන ඇත. ත්‍රිරෝද රථය ද පොලිස් භාරයට ගෙන තිබේ. මෙම කාන්තාව ඝාතනය කිරීම සඳහා යොදාගත් බව පැවසෙන වැසිකිළි වළක සගවා තිබියදී සොයා ගත් යතුරුපැදියේ අයිතිකරු කොළඹ ප්‍රදේශයේ පදිංචිකරුවෙකි. ඉරට්ටකුලම ප්‍රදේශයේ පදිංචි මේ වන විට ඉතාලියේ රැකියාවක නිරතව සිටින බලු සෙහාන් යන නාමයෙන් හැඳින්වෙන පුද්ගලයකු සහ මත්ද්‍රව්‍ය ජාවාරම්කාරියක බව කියන සුද්දී නැමැත්තිය අතර මත්ද්‍රව්‍ය මුදල් ගනුදෙනුවක් සම්බන්ධයෙන් අවුලක් තිබී ඇතැයි එම උසස් පොලිස් නිලධාරියා කීය.
එම මුදල් ආරවුල මත ඉතාලියේ පදිංචිච්ච සිටින බලු ෂෙහාන් නැමැත්තා ලබා දුන් කොන්ත්‍රාත්තුවක් මත මෙම ඝාතන සැලැස්ම ක්‍රියාත්මක වී ඇති බව ද පරීක්ෂණවලින් හෙළි වී ඇතැයි පොලිසිය කියයි. ජාත්‍යන්තර සහාය ඇතිව පොලිසියේ ඉදිරියේදී මෙම කාන්තාව ඝාතනය කිරීමට කොන්ත්‍රාත්තුව බාර දුන් බව කියන ඉතාලියේ පදිංචි ලාංකිකයා අඩංගුවට ගැනීමට පොලිසිය කටයුතු කරගෙන යයි. මෙම මත්ද්‍රව්‍ය ජාවාරම්කාරියට වෙඩි තැබූ පාතාල වෙඩික්කරු සහ වෙඩි තැබීමට යතුරුපැදිය පදවාගෙන ගිය ඉරට්ටකුලමේ පදිංචි හිටපු හමුදා සෙබළා ද අඩංගුවට ගැනීම සඳහා විශේෂ පොලිස් කණ්ඩායම් කිහිපයක් පුළුල් පරීක්ෂණ පවත්වා ගෙන යයි.
යතුරුපැදිය පදවාගෙන ගියේ යැයි කියන හිටපු හමුදා සෙබළාගේ තොරතුරු හෙළි වී ඇති නිසා ඔහු රටින් පලායෑම වැළැක්වීම සඳහා සියලු තොරතුරු අධිකරණ නියෝගයක් අනුව කටුනායක සහ මත්තල ගුවන් තොටුපොළට දැනුම් දී තිබෙන බව ද පොලිසිය කියයි.
