පැතුම් නිස්සංකට ටෙස්ට් තරගාවලියත් අහිමි වෙයි

 

 දමින්ද විජේසූරිය

පාකිස්තානයේ පැවැත්වීමට නියමිත ටෙස්ට් තරග දෙකකින් සමන්විත තරගාවලියෙන් ඉවත් වීමට ශ්‍රී ලංකා ආරම්භක පිතිකරු පැතුම් නිස්සංකට සිදුවී තිබේ. ඔහුගේ වම් පාදයේ කලව පසුපස මස්පිඬුවේ ඇති වූ ආබාධයකින් තවමත් සුවය ලබා නොමැති වීම ඊට හේතුවයි.

සැප්තැම්බර් මාසයේදී එංගලන්තයේ පැවති සීමිත ඕවර තරගාවලිය අතරතුරදී පැතුම් නිස්සංක මෙම ආබාධයට ලක් වූ අතර, ඒ හේතුවෙන් ඔහුට ඉන්දීය පිලට එරෙහිව ශ්‍රී ලංකාවේදී පැවැති ටෙස්ට් තරගාවලියත් අහිමි විය. පාකිස්තානු සංචාරය ආරම්භයේදී පාකිස්තානයට එරෙහිව පැවති විස්සයි20 තරගාවලියට ද ක්‍රීඩා නොකළ පැතුම් නිස්සංකගේ බලාපොරොත්තුව වූයේ මේ දිනවල පැවැත්වෙන එක්දින තරගාවලියට හෝ එක් වීමයි. එහෙත් එක්දින තරගාවලිය මෙන්ම නොවැම්බර් මාසයේදී පැවැත්වෙන ටෙස්ට් තරගාවලියත් පැතුම් නිස්සංකට අහිමි වී තිබේ. ටෙස්ට් තරගාවලිය සඳහා මුලින් නම් කරන ලද ක්‍රීඩකයින් 15 දෙනාගෙන් යුත් සංචිතයට පැතුම් නිස්සංක ඇතුළත් කර තිබුණද, වෛද්‍ය නිර්දේශය මත, ශාරීරික යෝග්‍යතාව තහවුරු වුවහොත් පමණක් ඔහුට සංචාරයට එක්වීමට අවස්ථාව හිමි වීමට නියමිතව තිබුණි. එහෙත් තරගාවලිය ආරම්භ වීමට පෙර ඔහුට සුවය ලැබීමට නොහැකි වූ බව ශ්‍රී ලංකා ක්‍රිකට් ආයතනය නිවේදනය කළේය.

ටෙස්ට් තරගාවලිය සඳහා පැතුම් නිස්සංක වෙනුවට තවත් ආරම්භක පිතිකරුවෙකු වන ළහිරු උදාර කැඳවා තිබේ. ඔහු දැනටමත් දැන් පැවැත්වෙන තුන්කොන් තරගාවලියේ අතිරේක ආරම්භක පිතිකරුවා ලෙසින් එක්දින සංචිතය සමඟ පාකිස්තානයේ රැඳී සිටී. පාකිස්තානු සංචාරය සඳහා ටෙස්ට් සංචිතය

තෝරාගැනීමේදී ළහිරු උදාරට සිය ස්ථානය අහිමි වූ නමුත් පැතුම් නිස්සංක තුවාල ලැබීම හේතුවෙන් ඔහුට නැවතත් අවස්ථාව හිමි වී තිබේ. ළහිරු උදාර මේ දක්වා ටෙස්ට් තරග 5 කට සහභාගී වී ඇති අතර, පසුගිය ජූනි මාසයේ බටහිර ඉන්දීය කොදෙව් දූපත් හි කළ සංචාරයේදී ඇන්ටිගුවා හි පැවති තරගයේදී ඔහු ලකුණු 188 ක් රැස් කිරීමට සමත් විය.

ශ්‍රී ලංකාව සහ පාකිස්තානය අතර පැවැත්වෙන තරග දෙකකින් යුත් ටෙස්ට් තරගාවලිය ලෝක ටෙස්ට් ශූරතාවලියට ඇතුළත් තරගාවලියකි. ලෝක ටෙස්ට් ශූරතාවලියේදී ශ්‍රී ලංකා කණ්ඩායම 7 වැනි ස්ථානයේත් (ජයග්‍රහණ ප්‍රතිශතය 33.33%) පාකිස්තානය 9 ස්ථානයේත් (ජයග්‍රහණ ප්‍රතිශතය 4.63%) සිටිති. කුසල් මෙන්ඩිස් ශ්‍රී ලංකා ටෙස්ට් කණ්ඩායමේ නායකත්වයට පත්වීමෙන් පසුව ඔහු මුහුණ දෙන පළමු තරගාවලිය මෙයයි. පළමු ටෙස්ට් තරගය නොවැම්බර් 9 වැනිදා සිට 13 වැනිදා දක්වා රාවල්පිණ්ඩි නුවරදී පැවැත්වේ. දෙවැනි ටෙස්ට් තරගය නොවැම්බර් 17 වැනිදා ආරම්භ වේ.

ශ්‍රී ලංකා ටෙස්ට් සංචිතය:

කුසල්මෙන්ඩිස් (නායකයා), පසිඳු සූරියබණ්ඩාර, දිනේෂ් චන්දිමාල්, කමිඳු මෙන්ඩිස්, සොනල් දිනුෂ, ධනංජය ද සිල්වා, අංජල බණ්ඩාර, කේශර නුවන්ත, ප්‍රභාත් ජයසූරිය, මිලාන් රත්නායක, ළහිරු කුමාර, අසිත ප්‍රනාන්දු, ඩිල්ෂාන් මදුශංක, එෂාන් මාලිංග සහ ළහිරු උදාර.