හෝමාගම පොලිස් සිරමැදිරියේ මියගිය එක්දරු පියාගේ මරණයට විවෘක තීන්දුවක්

 

ශාන්ත ප්‍රදීප් කුමාර කුලරත්න

හෝමාගම පොලිසිය මගින් අත්අඩංගුවට ගෙන සිරමැදිරියක් තුළ රඳවා සිටියදී මියගිය බවට සැක කෙරෙන පුද්ගලයාගේ සිරුරේ කොටස් රජයේ රස පරීක්ෂකවරයා වෙත යොමුකොට විවෘත තීන්දුවක් ලබාදීමට (27)දා පියවර ගත් බව කළුබෝවිල ශික්ෂණ රෝහල පවසයි.මෙසේ මිය ගොස් ඇත්තේ කිරිවත්තුඩුව මුනමලේ වත්ත 17 වන පටුමගේ අංක 1913/ ඩී හි පදිංචි ෆ්‍රැන්සිස් දුරගේ ඉෂාර හර්ෂ කුමාර නමැති එක් දරු පියෙකි.

මොහු ඉකුත් 25 දා අලුයම හෝමාගම පොලිසිය මඟින් සැකපිට අත්අඩංගුවට ගෙන සිර මැදිරියේ රඳවා සිටිය දී ඇති වූ අසාත්මිකතාවක් හේතුවෙන් ප්‍රතිකාර සඳහා හෝමාගම මූලික රෝහලට ඇතුළත් කිරීමෙන් අනතුරුව වෛද්‍යවරුන් පවසා ඇත්තේ ඔහු මිය ගොස් ඇති බවයි.

පසුව මේ සම්බන්ධයෙන් මියගිය පුද්ගලයාගේ බිරිය ඇතුළු පවුලේ ඥාතීන් පවසා සිටියේ අත්අඩංගුවට ගැනීමෙන් අනතුරුව ඔහුට සිදු කළ අමානුෂික පහර දීම් හේතුවෙන් මිය ගොස් ඇති බවයි.ඒ අනුව හෝමාගම ජ්‍යෙෂ්ඨ කොට්ඨාස භාර  පොලිස් අධිකාරි චන්දන ලියනගේ මහතාගේ උපදෙස් මත සහකාර පොලිස් අධිකාරිවරයකුගේ ප්‍රධානත්වයෙන් අභ්‍යන්තර විමර්ශනයක් ආරම්භ කෙරිණි.

 

පසුව මහජන ආරක්ෂක අමාත්‍ය ආනන්ද විජේපාල මහතා පොලිස්පතිවරයාට උපදෙස් දී තිබුණේ සිද්ධිය සම්බන්ධයෙන් පුරණ හා කඩිනම් විමර්ශනයක් සිදුකොට වාර්තාවක් ලබා දෙන ලෙසයි.එවන් පසුබිමක් යට තේ හෝමාගම පොලිසියේ විමර්ශන අංශයේ අපරාධ ස්ථානාධිපති, සුළු පැමිණිලි අංශයේ ස්ථානාධිපතිවරයා සහ පොලිස් කොස්තාපල්වරයකුගේ සේවය වහාම ක්‍රියාත්මක වන පරිදි (26)දා සිට අත්හිටු වීමට පොලිසිය පියවර ගෙන තිබුණි.

 

මේ අතර හෝමාගම පොලිසියට සහ මෘත දේහය තැන්පත් කර තිබූ හෝමාගම රොහලට මහේස්ත්‍රාත්වරයා පැමිණ මහේස්ත්‍රාත් පරීක්ෂණය සිදුකොට පොලිසියට නියෝග කර තිබුණේ දේහය පශ්චාත් මරණ පරීක්ෂණය සඳහා කළුබෝවිල ශික්ෂණ රෝහලට රැගෙන ගොස් එහි විශේෂඥ වෛද්‍යවරයා ලවා මෘත දේශය පිළිබඳ පශ්චාත් මරණ පරීක්ෂණය සිදුකොට එහි වාර්තාව අධිකරණයට ඉදිරිපත් කරන ලෙසටයි. 

ඒ අනුව පශ්චාත් පරීක්ෂණය සඳහා දේහය හෝමාගම මූලික රෝහලේ කළු බෝවිල ශික්ෂණ රෝහල වෙත ඉකුත් (26) දා දහවල් රැගෙන ගොස් එහිදී සිරුර එක්ස්රේ පරීක්ෂණ ඇතුළු මූලික විමර්ශන සිදුකොට දේහය පිළිබඳ පූර්ණ පශ්චාත් මරණ පරීක්ෂණය ( 27 ) දා සිදු කිරීමට පියවර ගෙන තිබුණි.ඒ අනුව කළුබෝවිල ශික්ෂණ රොහලේ විශේෂඥ අධිකරණ වෛද්‍ය රවී නානායක්කාර මහතාගේ උපදෙස් මත අධිකරණ වෛද්‍ය චාමර කරුණාතිලක මහතා ඇතුළු වෛද්‍ය කණ්ඩායමක් විසින් දේහය පිළිබඳ පශ්චාත් මරණ පරීක්ෂණය සිදු කරන ලදී.

එහිදි මියගිය පුද්ගලයාගේ මරණයට හේතුව නොදක්වා සිරුරේ. කොටස් රජයේ රස පරීක්ෂකවරයා වෙත යොමුකොට විවෘත තීන්දුවක් ලබා දීමට පියවර ගත් බවත් පසුව භූමදානය කිරීම සඳහා දේහය මියගිය පුද්ගලයාගේ බිරියට භාරදුන් කළුබෝවිල ශික්ෂණ රෝහල පවසයි.