ඩුබායිවලදී අල්ලද්දී චොකලට් කම්හලක වැඩ කරලා

 ශ්‍රීනාත් ප්‍රසන්න ජයසූරිය

අරුණ විදානගමගේ හෙවත් කජ්ජා සහ ඔහුගේ දරු දෙදෙනා වෙඩි තබා ඝාතනය කිරීමට ආධාර අනුබල දුන්නේ යැයි කියමින් කටුනායක ගුවන් තොටුපොළේ දී පෙරේදා (27) අත්අඩංගුවට ගනු ලැබූ අචිනි යන අන්වර්ථ නාමයෙන් හැඳින්වෙන කාන්තාව සම්බන්ධයෙන් වැඩිදුර පරීක්ෂණ පැවැත්වීම සඳහා දින තුනක කාලයකට ඊයේ (28) රැඳවුම් නියෝග ලබාගෙන ඇත.ඇය රූපලාවණ්‍ය ශිල්පිනියක යැයි රහස් පොලිසිය සඳහන් කරයි.

මෙසේ අත්අඩංගුවට ගත් මෙම 34 හැවිරිදි කාන්තාව කජ්ජා නමැත්තා ඝාතනය කිරීමට ආධාර අනුබල දුන්නේ යැයි කීමට අමතරව මහා පරිමාණ මත්ද්‍රව්‍ය ජාවාරම්කරුවන් සමග හවුල් වී මත්ද්‍රව්‍ය ජාවාරම්වල ද නිරතව සිට ඇති බවට රහස් පොලිසිය සැක කරයි.ඒ සම්බන්ධයෙන් කරුණු තහවුරු කර ගැනීම සඳහා මෙසේ රැඳවුම් නියෝග ලබාගෙන රහස් පොලිසිය මෙම කාන්තාවගෙන් තවදුරටත් දීර්ඝ ලෙස ප්‍රශ්න කරගෙන යයි.

 

ජාත්‍යන්තර පොලිසිය හරහා රතු නිවේදන ලබා සිටි මෙම කාන්තාව ඩුබායි සාජාහි චොක්ලට් කර්මාන්ත ශාලාවක සේවය කරමින් සිට ඇතැයි කියති.අරුණ හෙවත් කජ්ජා සහ ඔහුගේ අවුරුදු නවයක් වයස පුතා සහ අවුරුදු අටක් වයස දියණිය සමග යතුරුපැදියකින් ගමන් කරමින් සිටි අතරවාරයේ මිද්දෙණිය ප්‍රදේශයේ දී ටී පනස් හය වර්ගයේ ස්වයංක්‍රීය ගිනි අවියකින් වෙඩි තබා ඝාතනයට ලක්වූයේ පසුගිය වසරේ පෙබරවාරි 18 වැනිදාය.

අරුණ හෙවත් කජ්ජා නමැත්තා වෙඩි තබා ඝාතනය කිරීමෙන් පසු ඒ සඳහා ආධාර අනුබල දුන්නේ යැයි කියන රූපලාවණ්‍ය ශිල්පිනියක වන අචිනි යන අන්වර්ථ නාමයෙන් හැඳින්වෙන මෙම කාන්තාව එම වසරේම මාර්තු මාසයේ මුලින්ම කටුනායක ගුවන් තොටුපොළෙන් තායිලන්තයේ බැංකොක් නුවරට ගොස්, එහි සිට මැලේසියාවට ගොස් පසුව ඩුබායි රාජ්‍යයට ගොස් ඇතැයි ද පොලිස් ආරංචි මාර්ග වලින් දැන ගැනීමට ඇත. සහකාර පොලිස් අධිකාරී රොහාන් ඕලු ගල මහතා බව කියන පුද්ගලයා සහ ඔහු යතුරුපැදියේ තබාගෙන කැඳවාගෙන ආ බව කියන පුද්ගලයා ද එම වකවානුවේම පොලිසිය විසින් අත්අඩංගුවට ගනු ලැබූහ.

මෙම පරීක්ෂණවල දී මෙම ත්‍රිත්ව ඝාතනයට ආධාර අනුබල දුන්නේ යැයි කියන කිරම, කන්මල්ගම ප්‍රදේශයේ පදිංචි රූපලාවණ්‍ය ශිල්පිනියක වන අචිනි නමැති මෙම කාන්තාව ගැන තොරතුරු අනාවරණය වූ බව ද පොලිස් ආරංචි මාර්ග තොරතුරු අනාවරණය කළේය. ජාත්‍යන්තර පොලිසිය මෙම කාන්තාව අත්අඩංගුවට ගැනීම සඳහා රතු නිවේදන නිකුත් කර තිබියදී ඩුබායි ආරක්ෂක අංශවලට කොටුවී මාසයක පමණ කාලයක් එරට සිර කඳවුරක රඳවා තබාගෙන සිටියදී පෙරේදා මෙරටට පිටුවහල් කරනු ලැබුවාය.

කටුනායක ගුවන් තොටු පොළේ ආගමන විගමන ප්‍රධාන පොලිස් කණ්ඩායමක් මැලේසියාවට ගොස් අත්අඩංගුවට ගැනුණු පාතාල නායකයන් පස් දෙනෙකු අතර සිටි බැකෝ සමන් නමැත්තාගේ සැලැස්මකට අනුව කජ්ජා ඝාතනය කිරීමේ සැලැස්ම ක්‍රියාත්මක වී තිබෙන බව ද උසස් පොලිස් නිලධාරියෙක් පැවැසීය.කජ්ජා නමැත්තා ඉලක්ක කර ගනිමින් තැබූ වෙඩි ප්‍රහාරයෙන් ඔහුගේ දරු දෙදෙනා ද මියගිය අතර, මෙම ත්‍රිත්ව ඝාතනයට අදාළ පාතාල වෙඩික්කරුවකු නිලධාරීන් විසින් මෙරටට පිටුවහල් කරන ලද මෙම රූපලාවණ්‍ය ශිල්පිනිය ගුවන් තොටු පොළේ රහස් පොලිස් ඒකකයට බාරදීමෙන් පසු අත්අඩංගුවට ගනු ලැබුවාය.

ඇය කොළඹ රහස් පොලිස් මූලස්ථානයට රැගෙනවිත් වැඩිදුර පරීක්ෂණ පවත්වාගෙන යයි.පොලිස්පති නීතිඥ ප්‍රියන්ත වීරසූරිය මහතාගේ අධීක්ෂණය යටතේ මේ සම්බන්ධයෙන් රහස් පොලිසිය වැඩිදුර පරීක්ෂණ පවත්වයි.