ගයාන් සූරියආරච්ච්
හෝමාගම පොලිස් නිලධාරීන් බාරයේ සිටි සැකකරුවකු හදිසියේ මියයෑම සම්බන්ධයෙන් හෝමාගම මූලස්ථාන ප්‍රධාන පොලිස් පරීක්ෂක සුමුදු පුජාන් සේනානායක මහතාගේ රාජකාරී වැඩ පොලිස්පතිවරයාගේ නියෝග මත තහනම් කරනු ලැබ ඇත.
ජ්‍යෙෂ්ඨ නියෝජ්‍ය පොලිස්පති (බස්නාහිර පළාත) විමසනතුරු ඒ සම්බන්ධව කිසිදු තොරතුරක් දැනුම් නොදීමෙන් මූලස්ථාන පොලිස් පරීක්ෂක ලෙස වගකීම් විරහිතව කටයුතු කර ඇතැයි පවසමින් හෝමාගම මූලස්ථාන ප්‍රධාන පොලිස් පරීක්ෂකවරයාගේ වැඩ මෙසේ තහනම් කර ඇත. අයිස් මත්ද්‍රව්‍ය ළඟ තබා ගත් බව කියන සිද්ධියක් සම්බන්ධයෙන් ඉකුත් 25 වැනිදා අත්අඩංගුවට ගෙන පොලිස් සිර මැදිරියේ රඳවා සිටි ඉෂාර හර්ෂණ කුමාර නැමැත්තාට පොලිසිය පහර දීම හේතුවෙන් අසාධ්‍ය තත්වයෙන් රෝහල්ගත කිරීමෙන් අනතුරුව මිය ගොස් තිබිණැයි ඥාතීහු චෝදනා කරති.
විමර්ශන නිලධාරීන් සැකකරු නිසි ලෙස අත්අඩංගුවට ගෙන නිවැරැදි සටහන් යොදා ඇද්ද යන්න පරීක්ෂා කර, අනතුරුව නිලධාරීන් හතර දෙනකු ඔහු ඇදගෙන නැවත සිර මැදිරියට දමා ඇති බවට ද ඥාතීහු චෝදනා කරති.නිසි නියෝග හා උපදෙස් දී සැකකරු සම්බන්ධව නිසි අධීක්ෂණයක් නොකිරීම. වගකීම අනතුරුව හැරීම. සැකකරුවකු අනීතිකව පොලිස් ස්ථානයේ රඳවා තබා ගැනීමට පොලිස් නිලධාරීන්ට අවස්ථාව ලබාදීම යන චෝදනා යටතේ මූලස්ථාන පොලිස් පරීක්ෂකවරයාගේ වැඩ තහනම් කර ඇත.
ඉෂාර හර්ෂණ කුමාර නැමැත්තා පොලිස් සිර මැදිරියේ සිටිය දී අපරාධ විමර්ශන කාර්යාංශයට රැගෙන ගොස් පහර දීමෙන් අනතුරුව නිලධාරීන් හතර දෙනකු ඔහු ඇදගෙන නැවත සිර මැදිරියට දමා ඇති බවටස ඥාතීහු චෝදනා කරති.
අනතුරුව එම සිද්ධිය සම්බන්ධයෙන් ඉෂාර හර්ෂණ කුමාර නැමැත්තාගේ ඥාතීහු පොලිසියේ ඉහළ නිලධාරීන්ට සහ පොලිස් මූලස්ථානයට පැමිණිලි කළහ. එම සිද්ධිය සම්බන්ධයෙන් ස්වාධීන පරීක්ෂණයක් කරන ලෙස මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල මහතා ද පොලිස්පතිවරයාට උපදෙස් දුන්නේය.
ඒ අනුව හෝමාගම මූලස්ථාන පොලිසියේ අපරාධ විමර්ශන අංශයේ ස්ථානාධිපතිවරයා වශයෙන් කටයුතු කළ උප පොලිස් පරීක්ෂකවරයා ද පෙරේදා (28) බස්නාහිර පළාත් දකුණ අපරාධ කොට්ඨාසයේ නිලධාරීන් කණ්ඩායමක් විසින් අත්අඩංගුවට ගනු ලැබීය.
0 comments:
Post a Comment
Note: Only a member of this blog may post a comment.